Bandièra01 1180x150: Comuna de Tolosa

Actualitats

Aurore Martin serà jutjada a Madrid lo 12 de genièr

L’estat espanhòl acusa Martin d’èsser militanta de Batasuna, un partit illegalizat en Espanha

Aurore Martin, militanta basca de ciutadaniá francesa, serà jutjada a Madrid lo 12 de genièr que ven. La jutjarà l’Audiéncia Nacionala espanhòla, un tribunal d’excepcion, que jutjarà a l’encòp 35 militants de l’esquèrra independentista basquista.
 
L’estat espanhòl acusa Martin d’èsser militanta de Batasuna, un partit illegalizat en Espanha e pas completament legal al Bascoat Nòrd. Martin precisament es originària del Bascoat Nòrd e legalament es ciutadana de l’estat francés.
 
Mas la justícia espanhòla li repròcha d’aver participat a de reünions publicas del partit Batasuna, e lo jutge a retengut contra ela la qualificacion de “participacion a una organizacion terrorista”.
 
 
Una arrestacion polemica
 
La militanta basca foguèt arrestada lo 1r de novembre de 2012 per de gendarmas pendent un contraròtle estradièr. Foguèt liurada sul pic a las autoritats espanhòlas, que n’avián sollicitada l’extradicion, acceptada pel tribunal de Pau (Bearn). Èra lo primièr còp qu’un tribunal de l’estat francés acceptava d’extradir un membre de Batasuna de ciutadanatge francés. Lo jutge de l’Audiéncia Nacionala espanhòla, Pablo Ruz, la mandèt en preson après li imputar un delicte d’integracion de banda armada amb gra de dirigenta.
 
L’arrestèron, en compliment d’un mandat d’arrèst europèu de la justícia espanhòla, e la transferiguèron a una preson de Madrid. Aquò generèt una enòrma polemica dins l’estat francés. Martin, qu’es ciutadana francesa, foguèt liberada un mes e mièg après jos una caucion de quinze mila èuros, que se paguèt gràcias a la collècta de fonzes mejançant d’activitats de tota sòrta menadas per de collectius independentistas del Bascoat francés, amassats jol nom de Bake Bidea (lo Camin de la Patz).
 
La decision del govèrn francés foguèt refusada tant pels politicians d’esquèrra coma pels de drecha, e quitament tres parlamentaris del partit del president François Hollande critiquèron l’alavetz ministre de l’Interior, Manuel Valls, per complir un mandat d’arrèst europèu que l’aviá pas aplicat lo sieu predecessor del govèrn Fillon, del temps del president Sarkozy. L’afar foguèt portat a totes los informatius e jornals de l’estat francés.
 
Divèrsas associacions se demandèron cossí èra possible qu’una ciutadana francesa, membre d’un partit legal en França, poguèsse èsser liurada a las autoritats espanhòlas solament pel fach qu’en Espanha avián decidit d’illegalizar aquel partit.
 
En mai d’aquò, i a la circonstància que lo president de la republica, François Hollande, aviá participat abans son eleccion a una manifestacion en 2011 contra la persecucion d’Aurore Martin per Espanha.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernest Guevara Jr. L'Avana
2.

Jutjada, la dròlla, per delicte d'opinion ! Plan venguts dins lo mond real…

  • 7
  • 0
Lutz
1.

Condemnada per sas idèias… ont es passada la libertat d'expression ? Dins l'Estat Espanhòl coma endacòm mai, la desencusa del «terrorisme» tua nòstras libertats fondamentalas.

  • 8
  • 0

Escriu un comentari sus aqueste article