Bandièra01 1180x150: Comuna de Tolosa

Actualitats

Se clavèt ièr a Barcelona la 7a Mòstra de Cinèma Occitan

La Mòstra 2014 es arribada a 30 localitats catalanas e occitanas

La Mòstra de Cinèma Occitan clavèt ièr la 7a edicion après aver engrandit significativament son accion, doncas qu’es passada de 19 a 30 localitats, amb una vasta preséncia dins los dos païses.


Amb la volontat de venir una fenèstra d’ont se pòsca aver una vision panoramica de la lenga e la cultura occitanas, per mejan de creacions audiovisualas, la Mòstra de Cinèma Occitan clavèt ièr sa tornada après passar dins un trentenat d’endreches. La clavadura oficiala se debanèt ièr a Barcelona amb las intervencions de la directritz generala de la politica lingüistica de la Generalitat de Catalonha, Ester Franquesa, e del director adjonch de la Filmotèca de Catalonha, Octavi Martí. Dins l’eveniment se projectèt lo filme Frederic Mistral, un documentari de ficcion realizat per Alain Glasblerg en 2004, qu’ongan es estat projectat dins 24 localitats de la Mòstra en s’apondent als actes de commemoracion del centenari de la mòrt de l’escrivan provençal. L’acte s’acabèt amb un brèu acte musical del grop Fononèsia, ont la soprano Mireia Latorre, acompanhada a la viòla de camba per Peter Kriba, interpretèron de composicions a partir de tèxtes mistralencs.
 
La Direccion Generala de la Politica Lingüistica del Departament de la Cultura de la Generalitat de Catalonha organiza la Mòstra de Cinèma Occitan amb la collaboracion d’institucions e d’entrepresas catalanas e occitanas que ne garentisson la preséncia en territòri occitan e catalan. La tòca es de promòure la coneissença e la realitat de la lenga occitana en Catalonha, e d’impulsar la creacion cinematografica dins la lenga nòstra. Dins aquesta edicion 2014, s’es programat 8 filmes sus un total de 51 sessions.
 
 
Exposicion
 
En escasença d’aquel acte, la Filmotèca de Catalonha aculhiguèt l’exposicion entitolada Frederic Mistral, la tèrra e los sons, qu’an coproducha la Generalitat de Catalonha, la deputacion de Lhèida e l’Universitat de Lhèida, qu’a tanplan collaborat al sostitolatge dels filmes en catalan.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tàrrega Igualada (PP.CC.)
1.

Sigueu benvinguts a Catalunya, tant de bò us poguesiu quedar mès.

  • 0
  • 0

Escriu un comentari sus aqueste article