La dimenjada tretzista a confirmat las tendéncias per las qualificacions dins la pola bèla de la segonda fasa del campionat d’Elèit, la Copa Lord Derby a reservat son lòt costumièr de suspresas e los Dracs preparan conscienciosament la debuta de la sason de Superliga.

Lesinhan e los Dragonets cap a la pola bèla
 
Se l’AS Carcassona e lo campion Tolosa son ja assegurats de jogar la segonda fasa dins la pola bèla, aqueste dimenge a permés a Lesinhan e als Dragonets de prene una opcion mai que seriosa per las doas autras plaças. Vilanuèva, batuda sus sa pelena per l’AS Carcassona 34-20, daissa la tresena plaça a Lesinhan, venceire aisit de Palau 40-8, e vei sa quatrena plaça téner a un fial: un sol punt d’avança sus Sant Estève-XIII Catalan (qu’a una partida en retard de jogar, lo 5 de genièr a Limós). Los Dragonets an apichonit fòrtament las darrièras esperanças limosencas: 34-16. Tolosa s’es impausat en Provença fàcia als valeroses avinhonencs: 28-10. Pel compte de la tretzena jornada, veirem se jogar dimenge 22 de vèspre los dèrbis Limós-Carcassona e Dragonets-Palau. Vilanuèva aurà benlèu pas las fòrças per contrastar Tolosa e Lesinhan se deurà mesfisar en Avinhon.
 
 
Clairac e Vilagalhenc-Argon en Pichons Pocets de la Copa
 
Aquesta dimenjada, se teniá lo primièr torn de la Copa Lord Derby entre las 12 formacions d’Elèit 2 e quatre representantas de la Nacionala 1. Se Ferrals (batut per Sant Gaudenç: 20-36 ) e El Soler (despassat per Carpentràs: 44-10) arrèstan aquí lor preséncia dins la competicion, es pas lo cas de Clairac e de Vilagalhenc-Argon, autors de las proesas de la dimenjada: dissabte, Clairac a batut d’un punt La Reula 23-22 e dimenge, Vilagalhenc-Argon capitèt a gardar dos punts d’avança, 22-20, suls vesitaires lioneses. Dins las oposicions entre formacions d’Elèit 2: los tarneses s’impausan a domicili: L’Escura contra los Tolosa-Broncos, 18-154, e Albi fàcia a Baó, 38-24. Doas formacions van quèrre la qualificacion al defòra: Vilafranca de Roergue a Montpelhièr, 28-4, e la tresena esquipa de Tarn, Realmont, a Tonens, 26-16. Los uèit qualificats e las uèits esquipas d’Elèit 1 jogaràn los oitens de finala al mes de genièr.
 
 
Vesita australiana
 
L’esquipa dels liceans e estudiants australiana, los Schoolboys, es en tornada en Euròpa. Dissabte, perdèron contra Anglatèrra: 28-14. Aqueste diluns, jògan a Brutus contra la seleccion francesa U19 e dijòus a Tolosa contra los U18.
 
 
Los Dracs en preparacion e comunicacion
 
Totòm a représ l’entraïnament cò dels Dracs qu’an presentat la formacion al centre de Perpinhan. Abans la debuta de la Superliga (lo 6 de febrièr, cò del campion St. Helens) jogaràn doas partidas amicalas: lo 17 de genièr a Brutus contra los London Broncos e lo dissabte 24 de genièr a Carcassona fàcia a una seleccion audenca de jogaires d’Elèit 1: los Chivalièrs Catars!
 
 
 
 
Alan Roch