Bandièra01 1180x150: Comuna de Tolosa

Actualitats

Fotbòl: avénguer prometedor per Occitània

Dimars 30 de deceme de 2014. 18h. Estadi deu COAT a Tolosa. Occitània bat l’Isla de Man 5-1 (pausa: 2-0). Butaires per Occitània: Gabriel (40a), Fitte (45a), Delpech (49a, 67a, 73a). Espectators: 100.


Es sus lo terrenh sintetic dens un estat perfèit deu club tolosenc deu COAT (Club Olimpic de l’Aerospaciala de Tolosa) e per un fred de debuta d’invèrn (3 gras) que l’Associacion Occitana de Fotbòl recebèva l’esquipa de l’Isla de Man.
 
L’ambient hestiu èra assegurat per un grop deus Indians (suportaires deu Club de Fotbòl de  Tolosa) tapatjós coma cau e la part musicala peu Ramelet Mondin, grop de danças tradicionalas.
 
Tre la debuta, se sentissèva que l’esquipa locala possediva plan lo subjècte e la pelòta circulava plan dens accions bastidas collectivament. En fàcia, la defensa manx èra en plaça e los occitans n’avón pas nada occasion de s’apressar de la gàbia. Se l’AÒF avèva lo pè sus la pelòta la màger part deu temps, ne s’i escadèva pas de’s muishar dangerosa, e quitament los manxes obtengón un cornèr pendent lo purmèr miei temps.
 
Es au moment que la pausa se sarrava que los convidats avón shens dobte un relaish fatau. Per contra, los occitans gahèn l’aviada e trobèn dus còps pet a pet lo camin deus hialats per Gabriel (40a) e Fitte (45a). Las duas esquipas se’n tornèn au vestiari dab una mèrca benlèu drin flatosa peus roges de 2-0, quitament s’èra luenh d’estar panat.
 
A la represa, s’atenguèva una reaccion deus manxes, mes per contra, estoc lo susprenent atacant Simon Delpech, enchafrat “lo Bisont”, que pausèc una banderilha de mès sus l’esquina de la bèstia. Solide, un còp aquesta diferéncia assegurada, los occitans avón un floishèr de bon comprénguer (mes que caleré evitar totun dens una competicion) e estón los vriulets de l’Isla de Man que’s muishèn mès d’un còp dangeroses.
 
Mes lo vent tornèc virar e los occitans acabèn de “tuar l’encontre” gràcias, un còp de mès, a un suberbon Simon Delpech dens una vòga de las granas qu’inscrivoc duas realizacions après una sèria de dus cornèrs premonitòris.
 
Ende acabar, los visitaires, deus quaus cau notar un polit vam dinc a la fin, non perdèn pas hitge e obtengón un penalty en seguida. La mèrca ne demorère aquiu.
 
L’entraïnaire, Deidièr Amiel, que responoc dens un occitan remirable (que l’ensenha) a France 3 venguda cobrir l’eveniment; digoc lo son contentament d’aver uei lo dia una esquipa vertadèra dab a còps “tròp” de jogaires per lo medish pòst.
 
Lo dusau aspècte positiu es que l’esquipa possedís ara una ataca vertadèra e quauques jogaires que podón hèr la diferéncia dens un encontre, deus quaus podèm citar solide “lo Bisont” que shens dobte non a pas acabat de hèr parlar d’eth.
 
E, a la question pausada: “Quin objectiu vos fixatz per la Copa deu Monde de junh que veng (que se debanarà sus l’Isla de Man)?” Lo Deidièr Amiel balha una responsa clara: “La victòria.”
 
La seleccion occitana a totas las cartas en mans ende aquò, segon çò que nos muishèc uei.
 
 
 
 
Joan-Marc Leclercq
 
 
 
 
_____
— Entrevista de Nicolas Desachy, president de l’Associacion Occitana de Fotbòl (AÒF)
— Entrevista de Deidièr Amiel, entraïnaire seleccionaire de la seleccion occitana de fotbòl

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Terric Lausa Quilhan
3.

La brava còlha nòstra! Òsca a elhis!

Tanbens me som congostat de lhegir'l lengatge de jornalisme esportiu de Joan-Marc Leclercq. Òsca!

  • 5
  • 0
Ricard Tarragona
2.

Bascos i Catalans van jugar un partit amistós, quan podrem veure un amistós entre Catalunya i ,Occitània, Bon any nou a tothom

  • 6
  • 0
Julian
1.

Òsca a l'AOF e grandmercé a Joan-Marc Leclercq per aquel article !! Lo nivèl me sembla fòrça bon. Cal far la promocion d'aquel fotbòl. Son de jogaires que se veson pas gaire mas que practican un polit jòc pr'aquò. Son pas pagats e d'unes s'ameritarián benlèu de remplaçar d'unas cabras que jògan per de clubs de Liga 1(lo TFC per exemple) o de Liga 2. I aviá pas qu'un centenat d'espectators arser: aquò fa dòl e li fariá sofracha a l'AOF d'aver mai d'afogats !

  • 6
  • 0

Escriu un comentari sus aqueste article