Bandièra01 1180x150: Comuna de Tolosa

Actualitats

“El caloret”: un discors vergonhable es vengut un fenomèn social

Lo ridicul de la consolessa de Valéncia en ensajant de parlar catalan a las multituds a produch tota sòrta de parodias e de cançons que s’entendon pertot

Un polemic e ridicul discors de la consolessa de Valéncia, Rita Barberá, que lo faguèt lo 22 de febrièr passat, a generat una reaccion enòrma sul ret e quitament sus lo panorama politic valencian. Barberá parlèt a la multitud per inaugurar las fèstas de la vila, que se debanaràn fins a la tradicionala cremada de las falhas lo 19 de març, e ensagèt d’o far dins la lenga del país. Mas ela aviá subreavalorat sa capacitat de parlar una lenga qu’a totjorn mespresat e que jamai aviá pas parlat. Lo resultat tant òrre e vergonhable se maximizèt sul pic sus Internet ont l’etiqueta #caloret encara fa furor. Lo mot caloret que Barberá repetiguèt mai d’un còp dins son discors èra son biais de dire caloreta, que tant en occitan coma en catalan es un mot femenin, e mai s’en espanhòl es masculin.
 
Lo discors de la consolessa generèt de parodias de tota sòrta e en aprofechar sas paraulas, se n’es fach fòrça versions musicalas. Una d’aquelas versions, entitolada justament El caloret e creada pel ditgèi Ivan Lagarto, es venguda un fenomèn de massa e s’entend ja dins la màger part de las fèstas popularas pertot dins los Païses Catalans. En mens d’una setmana a atench mai de 760 000 vesitas sus Youtube.
 
 
La Lei dels signes d’identitat per lo País Valencian
 
Aquel fach pòt empedir la reeleccion de la consolessa del Partit Popular (PP) a la municipalitat de la capitala valenciana, que i es dempuèi 1991. Mas sustot aquel rambalh provocat per sa desconeissença de la lenga del país arribèt qualques jorns abans que lo parlament valencian aprovèsse, solament amb los vòtes del PP, una polemica Lei dels signes d’identitat per lo País Valencian. Lo País Valencian i es nomenat Comunautat Valenciana pel partit drechista. Es una lei qu’entretant favoriza lo secessionisme lingüistic valencian a respècte del catalan.
 
Dins aquel sens, Accion Culturala del País Valencian demandèt que se retirèsse aquel projècte de lei abans lo vòte. Segon l’associacion valencianista, “los responsables de las institucions valencianas se deurián illustrar per la dignificacion de la cultura, e son emplec non partidista e mai per un comportament exemplar en public”. Creson que la Lei dels signes d’identitat es una manòbra politica.

 
 
 
Lo discors de Rita Barberá:




Cançon El caloret d’Ivan Lagarto:
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Ai! Rita Rita Rita, reina del menfotisme! Si el Visantet no fa un miracle, si te diuen "per aci l'eixida", si te quedes a la lluna de Valéncia, no ploris i canta:
"Que nos quiten lo bailao!"

  • 1
  • 0

Escriu un comentari sus aqueste article