Bandièra01 1180x150: Comuna de Tolosa

Actualitats

Los Dracs transforman los Lops en anhèls

Aquesta dimenjada se vegèt unas marcas bèlas dins las partidas tretzistas.


Todd Carney, pastre dels Dracs
 
Los Dracs recebián aqueste dissabte de vèspre los Lops de Warrington a Brutus. Laurenç Fraissinós aviá gaire d’embarràs per causir son grop: Elima e Pelissièr suspenduts, Bòsc e Casty nafrats, mas dintrada del menaire de jòc Todd Carney a la dobertura. Se crentava un afrontament bèl de las linhas d’avants, mas los Dracs saupèron escartar las palmas. En defensa, probable que lo president Guasch lor organizèt un estagi secret dins las cambras fredas de son entrepresa pel manejament de la carn. Al cap de dètz minutas, lo centre Willie Tonga marcava son primièr ensag Sang e Aur. En cap de linha, Miquèl Oldfield pausava la palma al pè de la bandiereta. Sus l’autra ala, Vincenç Duport mistificava son adversari sus un quadratge-desbordament de tablèu negre: 18-0 pels Dracs a la pausa.
 
Los Lops tornavan amb las dents agusadas. Marcavan dos còps; Dureau los tornava metre a distància amb una penalitat. Una contrataca catalana partissiá de l’en-but, cinc passas e un tengut mai luènh, Zeb Taïa marcava. Sul còp de pè en relançar, Todd Carney traucava la defensa blava e trapava Zeb Taïa a nautor: novèl ensag catalan. Se los angleses marquèron un ensag de mai, lo darrièr mot revenguèt a Miquèl Oldfield que recuperèt la passa al pè de Scott Dureau sul cap de son defensor. 38-18: sièis ensages e un festenal al pè de Scott Dureau (sèt reüssidas sus sèt temptativas!). De mai, se notèt una bona entenduda prometeira dels mièges: de Dureau amb un Todd Carney qu’a l’uèlh e lo biais de faire jogar sos companhs amb de passas netas e precisas. Lo public s’arregalèt e ne torna demandar. Per exemple, tre aqueste dissabte amb la recepcion dels Diables Roges de Salford (a las 4 e mièja del vèspre).
 
Los Dracs se plaçan en tresena posicion al classament menat per Saint Helens e Leeds (tres victòrias per tres partidas), mentre que los Tigres de Castleford e los Gigants d’Huddersfield an pas encara conegut las jòias de la victòria. Dins las marcas bèlas de la jornada es de notar lo 58-16 passat per Widnes als Gats Fèrs de Wakefield.
 
 
Debuta del campionat NRL
 
De l’autre costat de la planeta, lo campionat de l’NRL començarà aqueste dijòus 5 per una partida entre doas formacions vistas en Anglatèrra per las World Cup Series: los Cavals Fòls de Brisbane e los novèls campions del mond dels clubs, los Lapinons de Sydney Sud.
 
 
Tolosa e los Dragonets cap a las mièjas finalas
 
En Pola dels Asses, Dragonets e Lesinhan joguèron a Brutus aprèp la partida de Superliga. Butats per l’exemple de la primièra, los Dragonets se mostrèron los mai actius e daissèron gaire d’espèrs als audencs: 44-24. Dimenge, a Carcassona, a la suspresa generala, los locals trapèron pas los mejans de contrastar lo vam tolzan en preséncia del president de la Federacion Internacionala, l’anglés Nigel Wood. Los Canaris foguèron lèu-lèu menats 18-0 amb tres corrents d’aire dins la defensa. Al còr del segond temps, capitèron a tornar a 20-16, mas lo campion ne tornèt metre una sisa: 38-16 a la sortida!
 
Tolzans e catalans prenon una oportunitat de qualificacion dirècta per las mièjas finalas. Lesinhan es fòra corsa e Carcassona a encara dreit d’esperar un briconet.
 
Dissabte, Tolosa recebrà los catalans mentre que dimenge a Domèc se tendrà lo dèrbi audenc Carcassona-Lesinhan.
 
En pola B e C, los clubs d’Elèit 1 contunhan de batre las esquipas d’Elèit 2: Palau-Albi, 52-10; victòria de Limós a Vilafranca, 42-6; e d’Avinhon a Lescura, 26-8. Vilanuèva se deu emplegar per ganhar a Baó: 24-17. Aqueste dimenge, a L’Agulha, partida decisiva entre Limós e Palau per la primièra plaça de la pola B.
 
 
Eth match de rugbi
 
L’illustracion es tirada de l’Alman’Òc 2015 del Cercle Occitan Pèire Lagarda (Fois). Acompanha la novèla Eth match de rugbi, signada per Gèli Morendon, que conta los malastres d’un arbitre que fiulèt una penalitat pels vesitaires a la sortida d’un escambi viril e generalizat!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L'Alan Carcassona
1.

• Per la dimenjada dels 14 e 15 de març :
Mièja-finalas de la Copa de França :
Carcassona-Lesinhan
Avinhon-Dragonets

Mièja-finalas de la Copa juniòrs Luc-Nitard :
Carcassona-Palau
Avinhon-Limós

  • 2
  • 0

Escriu un comentari sus aqueste article