Una dimenjada tretzista un pauc tristoneta amb una novèla desfaita dels Dracs e la pluèja sus Rosselhon que retarda la decision dins la pola dels asses e la pola B.

Hull es mai luènh que Talteüll
 
Aprèp lo carpan pres contra Hull KR (50-20), los Dracs èran demorats en Anglatèrra per tornar veire lor sistèma defensiu. Mas cinc jorns de revisions sufiguèron pas per contrastar l’autra formacion locala. De mai, s’i ajustèron las nafraduras de l’alièr Oldfield (sens dobte, sason acabada: ligaments del genolh tocats) e tornar de Todd Carney tocat aqueste còp a la cuèissa, sens parlar de Morgan Escarré que se faguèt brandir las pelhas sus un placatge assassin. A la sortida, 33-22 per Hull FC.
 
La Superliga presenta un classament ressarrat ont los Dracs son ara seisens amb 9 esquipas que se tenon e se peltiran en dos punts. Darrièr St. Helens qu’a pas encara perdut (12 punts), seguisson Leeds (10 punts) e Warrington (8 punts) puèi una esquipa a 6 punts, 4 a 5 punts (coma los Dracs) e quatre esquipas a 4 punts.
 
La sason serà pas brica la partida de plaser que ne somiavan e cresián de viure los catalans amb lo recrutament efectuat e dins l’aviada de la sason passada. Un novèla espròva bèla s’anóncia per aqueste dissabte a Brutus al còp de 6 oras del vèspre amb la venguda dels Rinocèros de Leeds.
 
Qualques belugas d’espèr espelisson amb la primièra victòria dels juniors (U19 coma se ditz ara) catalans cò d’Hull FC: 46-20 . Una formacion que se poirà véser jogar dissabte en dobertura (15h30) contra los joves de Leeds.
 
 
La pluèja interven dins la fin
 
Dissabte, la pluèja tombava a ferratats sul ribieral e la comuna de Sant Estève prenguèt un arrestat per interdire l’utilizacion de l’estadi. Es doncas a priori dimenge que ven que se sauprà qual de l’AE Carcassona o dels Dragonets prendrà la segonda plaça qualificativa dirècta per las mièjas finalas.
 
Al Molin, dins una partida agradiva mas sens enjòc, Tolosa s’impausèt fàcia al CF Lesinhan 32-8.
 
En pola B, Limós ganha a Albi 44-12, mentre que la partida Palau-Vilafranca es remesa.
 
En pola C, Avinhon bat Baó 52-12 e acaba primièr del grop. Vilanuèva a de mal de ganhar a L’Escura 28-20.
 
Doncas, aquesta dimenjada, se n’acabarà amb la segonda fasa del campionat amb los rescontres Dragonets-AE Carcassona e Palau-Vilafranca (los oraris ne son pas fixats a l’ora ont escrivèm aquestas regas).