Bandièra01 1180x150: Comuna de Tolosa

Actualitats

Rugbi XIII: rebomb fatal a Brutus

Whitehead marquèt dos ensages, mas Leeds ganhèt 38-22.
Whitehead marquèt dos ensages, mas Leeds ganhèt 38-22.

Catalonha Nòrd recebiá las partidas bèlas de la dimenjada tretzista: Dracs-Leeds a Brutus dissabte, Dragonets-Carcassona dimenge a Sant Estève.


Temps de davalada pels Dracs
 
Aprèp las doas desfaitas del costat d’Hull, los Dracs se devián reprene dissabte sus lor pelena. Lo sol problèma: esperavan la venguda dels Rinocèros de Leeds. Una infirmariá comola (Carney, Oldfield, Duport, Monís...) complicava la formacion de l’esquipa.
 
Los Dracs èran menats 10-6 a la pausa (ensag per Whitehead). Dintravan plens de determinacion a la represa e passavan tres còps la defensa blava (Whitehead/Capblanc tornar, Pelissièr al ras del tengut, Cardace al pè de la bandiereta)... E puèi, lo trauc negre. Leeds egalizèt amb dos ensages en doas minutas. Amb un còp de pè a seguir, Tonga lisèt susprés pel rebomb de la palma e Sutcliffe aplatussèt tranquillon en Tèrra Promesa. Leeds èra davant e confirmava la victòria per dos ensages de mai: Watkins servit a nautor per Burrow e Hardakerna a la còrna sens oposicion a la recepcion d’un remandadís cortet de jos las barras per signar un 38-22. De mai, Leeds pren la primièra plaça al clasasment aprèp la desfaita de St. Helens cò d’Hull KR 24-22.
 
E es lo temps subrecargat de Pascas que s’anóncia: desplaçament a Wakefield (actualament darrièr) tre dijòus e recepcion de Widnes (a egalitat de punts amb los Dracs) diluns. Los Dracs relegats en desena posicion al classament farián plan de signar doas victòrias que son a lor portada sul papièr. Mas la realitat del terren se trufa plan dels pronostics de papièrs...
 
Las lusors de prima se trapan dins lo comportament dels U19 que pleguèron solament dins las doas darrièras minutas fàcia als joves de Leeds, çò que se fa de melhor en Anglatèrra dins la categoria: 35-28.
 
 
Los caps tomban
 
Se St. Helens a perdut pel primièr còp en Superliga, del costat de l’NRL, los Lapinons an tanben conegut lor primièra desfaita: fàcia a las Anguilas de Paramatta: 29-16. Sols, los Cavalièrs de Newcastle an pas encara conegut l’amarum de la desfaita.
 
 
Las cambas de fuòc dels Dragonets
 
La setmana passada se remetèt, a causa de las pluèjas, la partida entre Sant Estève-XIII Catalan e l’AE Carcassona, rescontre decisiu per la qualificacion dirècta per las mièjas finalas de la fin d’abril a Tolosa. Las doas esquipas se trapèron doncas aqueste dimenge de vèspre sus la pelena pelada de l’estadi municipal del Riberal, amb un vent a desbanar totes los cagaròls de Catalonha. Los Dragonets prenguèron lèu l’avantatge en signant tres ensages (16-0), mas los Canaris tornèron a 16-12 abans la pausa. Lo segond temps vegèt la man mesa dels Dragonets sul rescontre. Multipliquèron las relanças e s’apiegèron sus una plan melhora circulacion de la palma fàcia a una formacion occitana en manca grèu d’èime que multipliquèt las fautas de man e las aproximacions. Lo planchòt final marquèt plan aquela diferéncia de comportament: 40-16 pels locals.
 
Carcassona passarà pels barratges. Rescontrarà lo ganhant de la partida Avinhon-Palau d’aquesta fin de setmana. L’autra partida qualificativa, Limós-Vilanuèva, designarà l’adversari de Lesinhan per aqueles falses quarts de finala. Lesinhan que serà en estagi a Sant Ciprian lo temps de Pascas per preparar al melhor la finala de la Copa del dissabte 11 d’abril fàcia als Dragonets. Los sostens de la formacion de las Corbièras preparan tanben activament la partida.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

• Avinhon-Palau, dissabte 4 a 17h30.
- Limós-Vilanòva, dimenge 5, a 15h15.

  • 2
  • 0

Escriu un comentari sus aqueste article