Bandièra01 1180x150: Comuna de Tolosa

Actualitats

Argeria: las dificultats de la lei contra las violéncias conjugalas

Malgrat lo vòte de la lei lo 3 de març, se revòltan los elegits islamoconservators

Una lei per protegir las femnas

Fins ara, dins lo mond arabomusulman, Tunisia se fasiá remarcar per sa volontat de far avançar los dreches de las femnas. Per exemple, l’article 46 de la Constitucion tunisiana de 2014 se fixa coma tòca l’egalitat e afortís l’objectiu d’eradicar las violéncias que son fachas a las femnas. Tanben un òme que turta sa molhèr risca fins a cinc ans de preson.

Lo 3 de març, sa vesina maugrabina, Argeria, semblava de voler seguir son exemple. Malgrat l’oposicion d’una partida dels deputats argerians, en particular los islamistas de l’Aliança de l’Argeria Verda, la cambra bassa del parlament, l’Assemblada Populara Nacionala, aprovèt una lei que criminalizava las violéncias conjugalas: desenant un marit violent podiá patir dètz e mai vint ans de detencion, segon la gravitat dels faches.

 
La fòrta oposicion dels islamoconservators

Lo 22 de març, veniá a la cambra nauta, lo Senat, de se prononciar. Totun, an pas marcat lo projècte de lei a l’òrdre del jorn e se sap pas quora i serà. D’efièch, se son revoltats una coalicion d’islamoconservators, de còps dintre lo quite partit al poder, l’FLN. Pausan mai de 140 questions al ministre de la justícia per alentir lo procès legislatiu, organizan de campanhas mediaticas per exigir de retirar la lei, segon d’arguments religioses (una pretenduda non-conformitat amb la sharia), de politica familiala (cal pas far espetar la familha, cal pas encoratjar las molhèrs a se rebellar contra lors esposes), e mai netament e clara misogins (s’apren a las femnas se son agredidas o s’excitan los òmes, çò dison, e las caldriá obligar de portar un cairat dins los endreches publics). Un deputat independent, Ahmed Khelif, afortiguèt quitament que la lei legitimariá las relacions extraconjugalas, puèi qu’un òme s’estimariá mai d’aver una amanta qu’una esposa per defugir de problèmas eventuals amb la justícia.
 
En nom de la justícia

Pasmens, segon lo quotidian argerian El Watan, las chifras oficialas (necessàriament inferioras a la realitat, que fòrça femnas gausan pas denonciar las agressions) son espantantas. En 2014, 40 femnas foguèron assassinadas mentre que 23 autras cugèron morir. 6 886 patiguèron de nafraduras e de còps volontaris, sovent de lors marits o d’un membre de lor familha. Se comptam los còps diches leugièrs, los cases de secutament, los violaments e los insultes publics contra de femnas, arribam almens a 15 707 afars. Segon d’autras fonts, entre 100 e 200 femnas moririán cada an a causa de violéncias familialas en Argeria.

Per combatre lo flagèl, la lei prepausa ara que los marits violents risquen entre un e vint ans de preson, e mai la detencion perpetuala se las victimas pèrdon la vida. Tanben vòl aparar las molhèrs de las temptativas de contraròtle forçat de lors bens.

Se los progressistas, eles, son pas consents amb la possibilitat legala que la victima perdone a son agressor e abandone ansin sa denóncia, pensan pasmens que la nòva lei es un progrès e vòlon resistir a las pressions dels islamoconservators.

En nom dels dreches de las femnas e, simpletament, de la justícia.




GJB

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

antalya apraquital
2.

#1 Segur n'avem atanben d'alucats dem cervel e de totas menas. pr'aquò deurias anar fa femna dins un país musulman.... apèi vèiràs....

  • 2
  • 0
Pirolet
1.

I a mai qu'a Argeria, que los "islamoconservators" a nòstre n'avèm e son de la meteissa fusta.

  • 2
  • 0

Escriu un comentari sus aqueste article