Bandièra01 1180x150: Comuna de Tolosa

Actualitats

Rugbi XIII: Tolosa sèrva lo bloquièr Max Rousié

Los Tolzans son tornar campions!
Los Tolzans son tornar campions! | TO

Caliá aver un brave don d’ubiquitat e de bons mejans de transpòrt per seguir l’actualitat tretzista de la dimenjada a l’entorn de las pelenas o suls pòstes de television de Colomièrs a Brutus, d’Entraigas a Sydney... amb per recompensa qualques partidas de tria.


Tolosa mai realista que Carcassona
 
7500 espectators se ramosèron dissabte a Colomièrs per seguir las finalas d’Elèit. En juniors, los avinhonencs realizèron lo doblat en dominant largament los limosencs: 38-18.
 
En Elèit 1, la partida demorèt indecisa per la marca fins a la fin. Lo planchòt se dobriguèt de part e d’autra per una penalitat. Al quart d’ora, la palma fasiá l’anar-venir dins la largor del terren pels Canaris sus un cinquen tengut: en cap de linha, Sobeiràs puntava l’ensag. Los audencs ensajavan de reprodusir lo jòc magic de la mièja finala. Tolosa jogava mai seriós amb son menaire Ford que destillava de candelas a tocar lo solelh. A la mièja ora, Tolosa s’installèt dins los 20 mètres jaunes e finiguèt que marquèt per Hulme (transformacion Keirallah) per dintrar als vestiaris amb un cort avantatge de 8-6.
 
Tre la represa, lo capitani Planàs bonificava una penalitat en alongant lo braç per pausar lo balon darrièr la rega magica. 14-6 pel TO. Carcassona ensagèt, mas se metèt a tombar tròp de palmas per poder trompar una defensa blava en plaça. A l’ora de jòc, lo segonda linha tolzan Quintilla confirmava la superioritat dels campions per un tresen ensag: 20-6. L’AEC tornariá pas, la fanfara podiá plan reprene Aquela Trivala... e l’ensag sus la còrna del dobertura Gressèque cambièt pas lo sòrt de la partida. Sus una marca de 20-12, los tolzans sèrvan lo bloquièr Max Rousié per aver jogat d’un biais mai realista, per aver causit la bona estrategia per contrar l’estrambòrd canari que venguèt de mai en mai magrinèl dins la durada de la partida. Foguèt ça que la un brave moment de rugbi que prepausèron las doas esquipas.
 
 
E Zebulon apareguèt
 
A Brutus, èran 9000 a seguir la recepcion del campion St. Helens pels Dracs. La partida se dobrissiá per un ensag anglés d’Adam Swift. A la 20a minuta, aprèp dos ensages signats Garcia e Taià, los Dracs menavan 12-4. Mas, en dètz minutas, la marca passava a 12-20 amb tres ensages angleses, l’arbitre tampant los uèlhs (o, benlèu, eissorbat pel solelh catalan) per doblidar doas passas enabans dels blancs. Aürosament, just abans la pausa, Scott Dureau dintrava dins la defensa anglesa, trapava Whitehead a nautor que mandava d’una longa passa Garcia darrièr la rega: 20-18 per St. Helens.
 
Lo segond temps vegèt un equilibri de las fòrças. Dureau egalizèt sus penalitat. Carney, que joguèt la partida sus una camba, servissiá a son interior Morgan Escarré que fasiá parlar sas cambas de fuòc: 26-20 pels Dracs. Mas Adam Swift i anava de son quatren ensag (lo còp del capèl, amb una pluma!) de la vesprada: novèla egalitat. A tres minutas del tèrme, servit als 30 mètres angleses, Zeb-Zebulon Taia se transformava en perinqueta abans de se ronzar coma un atalentat en retard per una cargolada cap als pals dels Sants: Dureau transformava l’ensag e metiá un punt final al rescontre amb un tombat sus la darrièra cadena de la partida. Victòria que fa un grand ben pels Dracs: 33-26. Se replaçan atal en setena posicion dins un peloton gropat en mitan de classament. Autre tròç bèl a venir: Wigan a Brutus lo dissabte 23 de mai.
 
Dins las resultas de la jornada, de notar los cartons de Wigan contra Castleford, 28-0, e de Hull KR contra Wakefield, 54-6; la victòria aisida d’Huddersfield a Salford, 19-0; mai susprenent, la victòria del darrièr Hull FC a Warrington 27-26 e lo cap de fila Leeds batut a Widnes 38-24.
 
 
Un torn de Cup
 
La dimenjada serà consagrada als oitens de la Cup. Dimenge, a 5 oras del vèspre, los Dracs recebràn una formacion del Championship, Featherstone. Quatre autras partidas metràn a las presas formacions de Superliga e de Championship, St. Helens-York e Dewsbury-Warrington, divendres; Widnes-Batley e Wakefielld-Leigh dimenge. Tres confrontacions entre formacions de Superliga son tanben al programa: Wigan-Hull KR, divendres; Leeds-Huddrsfield e Hull FC-Castleford, dissabte.
 
 
En NRL
 
En Austràlia, los Broncos de Brisbane demòran al cap del classament aprèp una corteta victòria sus Penrith: 8-5. D’autras partidas s’acaban amb de diferéncias bèlas: 36-4 per Pols-Tigres e 56-16 entre Raiders e Titans.
 
 
Vilagalhenc-Argon o Ferrals?
 
Un títol escaparà pas a una formacion audenca: aquel de la Nacionala 1A. En mièja finala, a Entraigas, Ferrals de las Corbièras marquèt a la darrièra minuta per eliminar Clairac 39-36 mentre que Vilagalhenc-Argon ganhèt aisidament lo dèrbi contra Vilanòva de Menerbés: 35-8.
 
En Nacionala 1B, la resèrva de Limós, Preissa-lo Lauquet, se qualifica per la finala en escartant Sauvatèrra de Comenge 39-30. Rescontrarà Ramonvila en finala. Las doas finalas de 1A e 1B se debanaràn justament a Ramonvila lo dimenge 24 de mai.
 
De notar que dimenge a Tonens, Preissa-lo Lauquet e Ferrals disputaràn la finala de la Copa Déjean. Que siá Carcassés, Cabardés, Limós, las Corbièras o Menerbés, los païses d’Aude son una brava tèrra tretzista!
 
 
Rescontre internacional juniors
 
Una brava escomesa pels juniors U18 occitans e catalans amb la partida de jogar aqueste dissabte de vèspre a Carcassona (estadi Domèc, 16h30) contra una formacion anglesa que compren qualques jogaires qu’an ja evoluit en Superliga. Serà tanben lo cas per l’alièr catalan Fouad Yaha que ven de disputar tres partidas amb los Dracs. L’an passat, los angleses ganhèron a la fin 34-30 e l’enquadrament tecnic nòstre a multiplicat los estagis per arribar a ganhar aqueste còp.
 
 
Finala d’Elèit 2
 
Aqueste dimenge 17, a l’estadi Sabathé a Montpelhièr, se debanarà la finala tarnesa del campionat d’Elèit 2 entre Albi e l’Escura. E tant que sèm a dire un mot de Montpelhièr, cal senhalar que Loló Nicollin ven de dire que son grop seriá lo principal partenari del club tretzista del Clapàs la sason venenta. Òm se pren a somiar d’un retorn dels Roge e Blanc en Elèit 1!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Per pas èsser en concurréncia amb USAP-Agen, Dracs-Featherstone se jogarà a 7 oras del vèspre.
En principi, s'anatz pas a Brutús, lo rescontre se poirà seguir sus BeInSport.

  • 2
  • 0

Escriu un comentari sus aqueste article