Bandièra01 1180x150: Comuna de Tolosa

Actualitats

crotz-tolosaCreated with Sketch.Comtat de NiçaCostiera Niçarda

Niça: Christian Estrosi se fa fiular en dirècte sus France 2

Montèt sus scèna dins una emission en dirècte sus la Fèsta de la Musica e lo public l’escridassèt

Lo cònsol de Niça, Christian Estrosi, conegut per sos prepauses islamofòbs, se faguèt fiular dissabte passat durant l’emission de France 2 nomenada la Fête de la Musique, du Soleil et des Tubes, qu’emetiá en dirècte la Fèsta de la Musica a Niça. Convidat a pojar sus scèna per l’animator de television lemosin Patrick Sébastien, Estrosi se faguèt escridassar fòrtament pel public niçard.
 
La cadena francesa de television aviá decidit d’emetre de Niça estant la Fèsta de la Musica un pauc d’avança, amb un espectacle ambiciós en dirècte qu’arborava d’artistas nombroses, joves e vièlhs. Lo programa èra animat per Virginie Guilhaume e Patrick Sébastien, e justament Sébastien aguèt idèa de far pojar sus l’empont Christian Estrosi.
 
“I a una persona que cèrche dempuei lo començament de la serada, perque es un vielh companh”, çò diguèt en francés lo showman lemosin, “es lo vòstre cònsol”, çò nuancèt. Aquí se comencèt d’entendre las primièras fiuladas. “O vos permete pas, vos demande d’arrestar”, çò diguèt alavetz Sébastien en tot parodiar Edouard Balladur. L’animator expliquèt que s’èra ja conegut amb Estrosi dins un cabaret niçard nomenat la Madonette e insistiguèt per lo far montar sus scèna, solament per lo saludar.
 
Quand Estrosi pogèt sus scèna, Sébastien diguèt al cònsol “quò quí es la politica, laissa faire”, per levar d’importància a la fòrta escridassada del public. Mas Estrosi, impassible, mercegèt “lu cent mila niçards que son esto sera e que fan la fiertat de la nòstra vila”. E contunhèt sos mercés: “Mercé a France Télévision, a Daniela Lambroso, a vos Virginie Guilhaume, a tu lo mieu vielh companh Patrick. Que de bonaür per Niça esto sera e esto bonaür sabi qu’intra dins toti li familhas francesi. Mercé ai niçards e mercé a França”.
 
Per Patrick Sébastien, la fiulada foguèt simplament “lo fach de tres conàs”. E mai se i aviá de bruch.
 
Estrosi es conegut per sas sortidas polemicas. Après aver pres un arrestat municipal contra “l’utilizacion ostentatòria” de las bandièras estrangièras pendent lo Mondial de fotbòl d’arunan, declarèt que França deviá afrontar “li cinqueni colomnas” islamistas e qu’una “tresena guèrra mondiala” èra declarada per “l’islamofaissisme”.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Guilhèm Thomàs Tolosa
3.

Es estranh cossí l'animator presenta en public sa relacion amb Estròsi ...

... es gaireben quicòm coma "Sèm amics dempuèi longtemps. Nos sèm coneguts dins un vièlh bordèl nissard, per l'entremesa de Gigi, la vièlha ostalièra italiana, qu'aviá las tetas que tocavan sos genolhs, mas qu'èra bravassa coma tot. Ah que me regaudisse d'aqueles remembres de joinesse ! Ah veni Cristian ! S'avèm partejat las meteissas putas podèm partejar la meteissa scèna.".

Non, verai, aquò's estranh... :)

  • 5
  • 0
gogo dançaira
2.

Fèsta de la musica en frança, un resumit:
Tf1: Emission musicala en dirècte de las arenas de Nimes
France Tv (france 2): Emission musicala en dirècte del palatz Nikaïa de Niça...

Conclusion: Le sud, c'est la fête...?

  • 5
  • 0
lachaud dornasac (87)
1.

Aqueus que se semblan, s'assemblan.
Ai auvit Patrick Sebastian dire dins unas de sas emissions a una gamina de Tolosa : "tu n'as pas encore perdu ton accent toulousain?"

  • 8
  • 0

Escriu un comentari sus aqueste article