Bandièra01 1180x150: Comuna de Tolosa

Actualitats

Traversaràn los Pirenèus en bicicleta en quatre jorns per l’independéncia del Bascoat e de Catalonha

Amb un desnivèl de 26 800 mètres e 942 quilomètres, anaràn de Portbou a Hendaia en traversant los Pirenèus occitans

Un total de 941,5 quilomètres, de trenta còls de montanha e de 26 800 mètres de desnivèl positiu, aquò es la distància que separa Portbou (Catalonha) d’Hendaia (Bascoat) a travèrs dels Pirenèus. Es la distància qu’un desenat de ciclistas experimentats, dirigits per Eduard Sardurní e Iban Gartzia, an decidit de percórrer en solament quatre jorns, de l’11 al 14 de julhet, per reclamar l’independéncia de Catalonha e del Bascoat e per arborar l’importància de lors seleccions esportivas pròprias.
 
Lo projècte començarà l’11 de julhet a 10 oras del matin de Portbou amb un acte que comprendrà una ceremònia. En solament quatre jorns, lo grop de dètz ciclistas (cinc bascos e cinc catalans) an previst de crosar los Pirenèus, de la Mar Mediterranèa fins a l’Ocean Atlantic, en passant per Occitània. Los esportius percorreràn trenta pòrts de montanha coma lo Còl d’Agnès, la Trapa, lo Tormalet, Izpegi, Otxondo e Bagargi e en superant un desnivèl positiu de 26 783 mètres. Per exemple, lo primièr jorn an previst de far la maximala distància que pòscan, d’aperaquí 600 quilomètres, sens dormir.
 
A partir del segond jorn, ensajaràn far de penequets de qualques 30 minutas, de s’arrestar per se pausar un pauc quand lo còrs o demandarà, de manjar e dormir doas o tres oras per poder seguir los tempos tant exigents que se son causits. Malgrat la duretat de l’espròva, los ciclistas anaràn pas solets. Seràn acompanhats d’una esquipa de sosten formada majoritàriament d’amics e volontaris amb d’autocaravanas, un massatgista e un membre de comunicacion qu’explicarà suls rets socials cossí se pòrtan, ont son e que ne publicarà de fòtos.
 
“La nòstra intencion es de far d’actes mai simbolics quand passam en Catalonha Nòrd e al Bascoat, e mai, avèm vist que la nòstra arribada a Hendaia coïncidís amb lo Torn de França e aquò nos servirà per far un acte revendicatiu ont reclamarem que son a passar per la tèrra basca”, çò expliquèt Gartzia a l’ACN.
 
“La vertat es que se tracta d’un enjòc fòrça ambiciós”, çò apond Sadurní, “m’agrada fòrça lo projècte de jónher los dos pòbles, de trencar de frontièras e de reclamar la nòstra libertat”.
 
“Es una idèa que proven del mond del ciclisme mas que vòl reclamar l’independéncia dels dos païses e metre en relèu l’importància d’una seleccion esportiva pròpria. Revendicam que totes los esportistas ajan drech de defendre lors colors dins quina competicion que siá; es un element mai de l’independéncia que volèm”, çò soslinhan totes dos.
 
Per mai d’informacion, e per los sosténer, los podètz contactar per email e tanben sus Twitter e Facebook.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
2.

Endavant, i no pareu, necesitem actes com els vostres, siguin simbòlics o d'una altre manera, però amb ells en som cada dia mès conscients.
Gràcies.
De l'Ernest, "El Tàrrega".

  • 0
  • 0

Escriu un comentari sus aqueste article