Bandièra01 1180x150: Comuna de Tolosa

Actualitats

Patric Roux: “Pòdi pas respondre a aquesta question e pòdi pas dire perqué”

Roux quita la direccion de l’Estivada en daissant de questions que i pòt pas respondre. Pasmens, la continuitat del Festenal Interregional de las Culturas Occitanas es assegurada “endacòm”

Tèxte legit

I a de garentidas que l’Estivada contunhe l’an que ven? Se lo festenal interregional de las culturas occitanas es menaçat a Rodés? “Pòdi pas respondre a aquesta question e pòdi pas dire perqué”, çò a respondut Patrick Roux, lo director de l’Estivada, dins una conferéncia de premsa que faguèt aqueste dissabte a 16h.


Lo director de l’Estivada de Rodés, Patric Roux, a anonciat aqueste dissabte dins una conferéncia de premsa que, “per de rasons personalas”, ongan es la darrièra Estivada qu’el dirigís. Ça que la, Roux a exprimit sa totala fisança a la còla del festenal e a manifestat que quitament s’èra malaut o s’aviá agut un accident, l’Estivada se seriá debanada gràcias a aquela còla. “Çò garentit es que l’an que ven, lo Festenal Interregional de las Culturas Occitanas se debanarà”. Pasmens, bòrd que lo nom “Estivada” es proprietat de la comuna de Rodés, a l’ora d’ara sabèm pas ont se debanarà aquel festenal e sabèm pas nimai cossí se nomenarà.
 
Roux a remarcat que lo festenal qu’el dirigís dempuèi 2008 recep la participacion de totas las regions d’Occitània, quitament de la Val d’Aran e de la region de Peitau-Charantas qu’a un territòri occitanofòn. Per el, “la vila qu’aculhís lo Festenal Interregional de las Culturas Occitanas o deu far amb fiertat e lo deu acompanhar. S’o fa pas, merita pas d’aver aquel festenal”.
 
Es lo cas de Rodés? “Pòdi pas respondre a aquesta question e pòdi pas dire perqué”, çò a respondut un còp de mai.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Un legeire Cevenas
7.

En escotant l'entrevista dau Sénher Patric Ros, me semble qu'ai comprés ce que voliá dire. E puèi, a fach allusion a de causas que me perméton de legir entre las linhas. Supause qu'a encontrat de problèmas emb de la comuna de Rodés, mai la region Miègjorn-Pirenèus. Semblariá que la comuna seguèsse pas pus ufanosa de son festenau coma a passat temps. E la reclama dinc la prèissa regionala i es estada absenta. O a dich, quò z-èra pro clar. De mai, a ajustat que se pòt trovar mièlhs per messatge de dovertura qu'un " Espère que l'Estivada (son los mòts a quicòm pròche) recamparà pro de monde e que menarà pas gaire bruch (au sens de bruch o de rambalh ?...). " De segur, coma ditz lo director : " L'Estivada deu èstre portada emb de fiertat ! " Vòu dire ce que vòu dire quò d'aquí. Es evident que la comuna es puslèu tebesa aqueste an. Se sent una resèrva. Adonc, res de marcat dinc los jornaus, una comuna que chamja de biais e de discors rapòrt als ans passats, un director de festenau que s'esprimís a mièja paraula ; curiosament, tot aquò capita l'annada dals novèls descopaments regionaus... Mès, de que se passa a l'escondut, dinc la rèire-scèna dau poder locau / regionau ? Se Patric Ros a creat sa còla novèla per l'an que ven, vai ben, tant mièlhs : la seguida es assegurada. De tot biais, o a afortit. Per ce qu'es dau luòc mai dau nom ? Aimariái mièlhs que lo nom dau festenau demorèsse en occitan. Per còntra, deguèsse se mudar l'Estivada, ieu veiriái ben que se desbanèsse a Clarmont d'Auvèrnha, o entre Clarmont d'Auvèrnha e Rodés (lai manca pas de vilas). Dise quò per 4 rasons : 1)– aquò donariá mai d'envam e de visibilitat a la dinamica occitana en Nòrd-Occitania ; 2)– aquò fariá s'endevenir centralitat geugrafica occitana emb de conscientizacion de las bolas e de l'espandi culturau / lengüistic occitans ; 3)– de mai, los lengadocians e provençaus auriáun aquí l'escasença de lai se gandir aisadament, en préner doas linhas dau camin de fèrre regionau : doas linhas vitalas (e en lucha !) que transpàsson lo Massís Centrau (la de Besièrs-Naussarga o la de Nimes-Clarmont (e au pièger l'A 75) ; 4)– enfin, aquò requilibrariá tanben lo bolegadís occitanista que, un còp mai en Lengadòc, nos programa, d'autom, una grand manifestacion per la lenga. A l'ora que fòrça occitans e occitanistas se planhísson d'una recuperacion lengadociana, despuèi quauquas annadas, de la manifestacion " Anem Òc ", me sembla judiciós de profichar l'escasença de desplaçar l'Estivada en Nòrd-Occitania : lo País d'Òc fariá veire ansin sa vastetat e sustot son afecion, son estacament per lo ròde arvèrno-lemosin un pauc deslaissat, mès de granda emportança. Sens vos comandar, sovetariái que la nòva còla d'organizaires de l'Estivada, lo novèl director e los decididors màgers, engatjats dinc l'organizacion dau festenau, seguèsson assaventats d'aqueste messatge, d'aquesta perpausicion que, segon ieu, s'ameritariá d'èstre discutida d'aicí l'an que ven, per non cavar mai aquela debuta silenciosa de trencadura. Tot aquò, per amor de ma / nòstra tèrra d'Òc dinc son entièr, de sos occitanofònes, de sos militants de la basa e de chasca jorn, se vos plai. Vos gramecie d'avança.

  • 12
  • 0
Terric Lausa Quilhan
6.

Mas de qué i a darrièr totes aquestes mistèris?

Es amenaçat o pressionat En Patric Ros? Per qui? Per qué?

Un festenal es pas pus un acte de la vida publica? Es confinat al secrèt defensa ara?

Òsca e coratge a Patric Ros e a tota sa còla.

  • 15
  • 0
Precision de talha
5.

A! L'usatge polissemic de "poder"... :-(

= Ai pas lo drech de respòndre?
= Sabi pas leis informacions?

  • 7
  • 0
Barba Tòni La Begua dal Borg
4.

Un bèl signe pro occitan per festar la fusion regionala MP abo LR!
Enfin una volentat politica duraïssa que non es somesa al bòn voler personal d'un o dos elegit!
...
Me drevelho, la realitat es ges lo sòmi. Pechaire.
Luchèm totjorn fàcia al bòn o marrit voler de gents qu'escafan 20 ans de trabalh despí lor burèl d'un trach de piuma...

  • 4
  • 0
Pirolet
3.

E ben! Valiâ la pena de far virar Rodês a esquèrra! Aquel PS es pas ges de fisar!

  • 11
  • 0

Escriu un comentari sus aqueste article