Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaCrau

Chepic en Crau per una descarga de municions abandonadas

Lo sit acomola qualques milièrs d’obuses e almens 420 tonas de polvera en plen aire

| Agir pour la Crau
L’associacion de defensa de l’enviromanent, Agir per Crau, a denonciat una importanta descarga de municions abandonadas, çò es, qualques milièrs d’obuses e almens 420 tonas de polvera en plen aire a la Caronhada, un endrech a la sortida de Sant Martin de Crau. Segon Agir per Crau, aquela descarga entraïna de risques seguritaris e sanitaris.
 
Lo dorsièr ven d’èsser redobèrt après lo panatòri d’explosius del sit militar de Miramàs, a solament dètz quilomètres, e après las explosions e l’incendi del sit petroquimic de la Mar de Bèrra (País Marselhés), çò qu’a chepicat los ciutadans. “Après leis eveniments, la prefectura s’es un pauc inquietada. Ela a petaçat lei clausuras que protegisson pas manco tot lo sit, e fai pausar de panèus magnifics «Attention danger»” (atencion perilh), çò planh a Le Figaro Joëlle Longhi, pòrtavotz d’Agir per Crau, que reclama dempuèi 35 ans la segurizacion e la despollucion d’aquel sit de 35 ectaras, entornejat per d’esplechas agricòlas.
 
En 2002 i aviá ja agut una explosion dins lo sit, sens far de ferits. Mas aquel accident, qu’auriá pogut revelar de negligéncias dins la gestion de l’esplecha, se calèron dessús. “Degun a jamai comunicat sus lo subjècte, an ensajat d’estofar l’afaire”, çò planh l’associacion ecologista.
 
 
Un sit abandonat e liurat a tota aura
 
Dempuèi la fin de la Primièra Guèrra Mondiala, a la Caronhada s’emmagazinan de residús militars. Al mitan dels ans 1980, la Societat Industriala de Municions e Trabalhs (SIMT) prenguèt en carga la gestion del sit, en avent per client principal lo Ministèri de la Defensa francés. “Arribam pas de comprene extactament çò qu’elei an pogut faire pendent toteis aqueleis annadas. Aparentament se son acontentats d’enterrar e d’immergir d’obús”, çò explica Longhi. Mas la SIMT se placèt en liquidacion judiciària en 2006 e lo sit demorèt liurat a tota aura.
 
 
Enquèsta dempuèi 2008
 
En 2008 la comuna de Sant Martin de Crau demandèt a la prefectura de lançar una enquèsta publica, per la “perilhositat” del luòc e per “lo risc de pollucion dau jaç freatic” de Crau, un dels mai importants d’Euròpa pr’amor qu’alimenta aperaquí 350 000 personas. Lo verdicte comandèt d’evacuar 1,6 tona de municions e de tractar 2 tonas de polvera. E mai, la justícia obliguèt lo proprietari del sit d’assanir los terrens; mas après sa mòrt, al començament de l’annada, lo dorsièr es passat en mans de l’estat francés.
 
 
1200 obuses al fosfòr e 420 tonas de polvera
 
Segon Agir per Crau restarián sul sit 1200 obuses al fosfòr amb de bombas incendiàrias, 100 barricas de 4200 quilos de polvera explosiva e qualques milièrs d’obuses de 10 a 15 quilos.
 
De son costat, lo primièr cònsol de Sant Martin de Crau a refusat de respondre a las questions dels jornalistas de Le Figaro, per “de rasons de seguretat”, e la prefectura del departament assegura que de mesuras se son presas per menar a tèrme la despollucion totala del sit, mas que “lei causas prenon de temps car de nombrós servicis son concernits, entre lo Ministèri de la Defensa, la Direccion Regionala de l’Environament, lo Centre de Desminatge o encara la municipalitat”. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

d
2.

Ai "l'estranha" impression que lo prefècte es mai tilhós sus de subjèctes d'independentisme occitan, catalan, etc. mas que per de questions sanitàrias e de vivéncia normala de la populacion, passa après...

  • 3
  • 0
Pirolet
1.

Als temps ancians, los gigants lançavan pas que de pèiras (es per aquò que cresi qu'èran de balears loq que semenèron los clhaus de la Crau). Mas l'armament s'es a melhorar dempuèi los temps mitics.

  • 1
  • 0

Escriu un comentari sus aqueste article