Bandièra01 1180x150: Comuna de Tolosa

Actualitats

Uèch regions occitanas s’acampan a l’Estivada per parlar de politica lingüistica

Los responsables en matèria de politica lingüistica de diferentas regions occitanas se son reünits queste dimecres a l’Estivada de Rodés per metre sus la taula lo besonh d’agir ensemble per melhorar la situacion de la lenga occitana sus tot lo territòri.


Una Charta interregionala de cooperacion transfrontaliera de desvolopament de la lenga occitana es estada redigida e signada per las regions Aquitània, Miegjorn-Pireneus, Lengadòc-Rosselhon, Ròse-Aups e Lemosin, en preséncia de representants de diferents departaments, d’aglomeracions de comunas e de l’Estat francés. La Generalitat de Catalonha s’es engatjada a i aderir tanben.

A la taula, i aviá, per òrdre d’intervencion, Guilhèm Latrubesse (Miegjorn-Pireneus), Yvonne Griley (Generalitat de Catalonha), David Grosclaude (Aquitània), Gustau Aliròl (Auvèrnhe), Belkacem Lounés (Ròse-Aups) e Sarah Vidal (comuna de Rodés).

Fau soslinhar qu’en 2013 se creará un Ofici public per l’occitan en Aquitània, que vòu pas remplaçar lo trabalh que fai la societat civila mas au contrari l’acompanhar institucionalament, e que se fará en collaboracion coma Miegjorn-Pireneus, mai benleu Lengadòc-Rosselhon. En Auvèrnhe, la situacion es mens avançada, mas la signatura d'una convencion per l’ensenhament es previsda emb lo rectorat de Clarmont e un elegit sirá designat per se charjar dau patrimòni occitan. La region Ròse-Aups s’es mesa a s’ocupar de quilhs afars nonmàs en 2009, mas a aderit au Congrès Permanent de la Lenga Occitana e au mes de junh passat a començat de las reünions emb los agents culturaus per ‘mor de metre en comun los esfòrç de la societat civila.

Ben siá que la situacion es lonh d’èsser la mesma pertot, totas las regions fan d’investiments per desvolopar mai l’occitan, e cerchan a farjar un quadre d’accion comun per poder dialogar emb l’Estat e avançar tots ensemble: l’union fai la fòrça.




Rafèu Sichel-Bazin

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Castèths Lanas Negas
11.

#9 Occitan majoritari ?!!

  • 0
  • 1
Rafèu
10.

#5 L'ambient s'eschaufet pas gaire, au contrari, i aguet pusleu 'na bona ententa entre tots los participants. Sus la fòto, lo Guilhèm Latrubesse senhala las gents qu'an damandat la paraula a la fin de la taula redonda per lur balhar lur torn, pas mai!

  • 2
  • 0
Rafèu
9.

#2#3 La reünion se passet en tres lengas: occitan majoritari, francés pro present, e catalan pendent l'intervencion de l'Yvonne Griley.

  • 0
  • 0
Castèths Lanas Negas
8.

Que s'i pòt véder taben que n'i a pas digun...

  • 0
  • 0
Jakin
7.

se parla de 8 regions en títol, mas n'i a que 5 qu'an firmat aquel document. Ont son las 3 autras ?

  • 4
  • 0

Escriu un comentari sus aqueste article