Bandièra01 1180x150: Comuna de Tolosa

Actualitats

De mercenaris colombians desbarcan en Iemèn

Un autre factor que nos fa pensar que la guèrra que i a uèi a l’Orient Mejan es plan mai qu’una guèrra regionala es que lo nombre de païses implicats creis de mai en mai. Ara, l’Arabia Saudita a engatjat de centenats de mercenaris de Colómbia per ganhar la guèrra qu’aquel país desvolopa contra los huthis en Iemèn. Aquel movement militar se podiá pas pensar solament fa qualques ans, mas ara ven mostrar la terribla realitat de la guèrra que i a al nòrd e al sud d’Arabia.
 
Aital, de centenats de militars qu’abans avián trabalhat per lo govèrn colombian contra la guerrilla de las FARC arriban ara en Iemèn, pagats per la coalicion que lucha contra la nacion huthi e, de la man de l’Arabia Saudita, en un movement que remembra mai una guèrra medievala coma la Guèrra de Cent Ans que non pas una guèrra del sègle XXIn.
 
Aqueles soldats son estats engatjats per l’Arabia Saudita amb un salari de mai de 1000 dolars per setmana e la promessa finala que poiràn aver la nacionalitat dels Emirats Arabis Units l’Union dels Estats Arabis sul pic. Non son pas de iemenitas paures e desesperats coma los huthi, mas de mercenaris sens cap de valor morala que tuan per d’argent e que viatjan ont son demandats. Es una rason de mai per s’inquietar.
 
Divèrses mèdias latinoamericans ja ne parlan dempuèi de meses. Segon qualques unes, coma lo jornal colombian Tiempo, ja son mai de 800 e lèu n’arribaràn qualques centenats de mai per anar a Aden d’en primièr, puèi a la primièra linha del front per luchar contra la coalicion huthi que sembla que, fins ara, ganha la guèrra contra l’Arabia Saudita, lo govèrn de Iemèn e divèrses autres païses implicats en aquel conflicte.
 
 
Un segond front dobèrt mai al sud
 
La vertat es que totes los europèus avèm l’agach pausat sus la guèrra que i a en Iraq pr’amor dels refugiats benlèu, mas al sud de l’Arabia Saudita ongan s’es dobèrt un segond front militar entre l’EI e Al Qaida, los huthis e lo govèrn de Iemèn. E coma aqueste darrièr non podiá pas ganhar, a demandat l’ajuda militara de l’Arabia Saudita, dels USA e d’autres païses arabis que dempuèi luchan en una guèrra tant o mai sagnosa que la d’Iraq e Siria.
 
Per ara, los mercenaris solament auràn de restar fins a tres meses en tèrras iemenitas, mas es sauput qu’aquel tipe de guèrra non se sap pas jamai coma s’acaba. La decisision foguèt presa dempuèi de la destruccion d’un depaus d’armas en la província de Marib ont 300 soldats sauditas, dels emirats e de Bahrayn perdèron la vida. Va solet qu’aqueles atacs se fan sens la permission de l’ÒNU e que tot aquò es dins una guèrra que ja a agut  mai de 6000 mòrts e 13 500 nafrats. La situacion es doncas de mai en mai pièger.
 
 
 
 
Christian Andreu


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pèire Vidal Castèl de Fanjau
2.

#1 Tornar a l'Edat Mejana seriá tornar als poètas andaloses e als trobadors, al reialme occitano-catalan e la cortesiá inventada dins la granda Aquitània. Aicí, es mailèu a la barbariá que tornam, ni mai ni mens. Paratge es luènh e oblidat…

  • 2
  • 0
Joan Francés Blanc
1.

Es aquò lo progrès: tornar a l'atge mejan. (Edat mejana, s'aimatz melhor)

  • 5
  • 0

Escriu un comentari sus aqueste article