Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaPreaups de Dinha

Tragèdia aeriana dels Alps: un an es passat

Lo 24 de març de 2015 un avion s’escrachèt sul Puèg dels Tres Evescats. Rendèron un omenatge sus plaça en seguida de las ceremònias oficialas a Barcelona e a Marselha

Un an es passat après la tragèdia aeriana qu'aguèt luòc al Puèg dels Tres Evescats (Prealps de Dinha). Après un omenatge a Barcelona e una polida ceremònia interreligiosa intima a Marselhase faguèr ièr sus l’endrech ont s’escrachèt l’avion una ceremònia oficiala per rendre omenatge a las 150 personas que i moriguèron. L’avion anava de Barcelona a Düsseldorf e foguèt escrachat volontàriament pel copilòt, Andreas Lubitz, un òme de 28 ans qu’aviá de problèmas de santat mentala.
 
 
Un an après l’accident
 
La tragèdia se passèt lo 24 de març de 2015 dins los Alps occitans. Un avion que s'èra enaurat de Barcelona (Catalonha) a 10h25, anava a Düsseldorf (Alemanha) e, aperaquí a 11h, s’escrachèt sul Puèg dels Tres Evescats, entre los Prealps de Dinha e Ubaia, dins la nauta val de Blèuna.
 
Segon l’informacion extracha de la segonda boita negra de l’avion, qualques jorns après, la tragèdia foguèt provocada deliberadament. Una primièra lectura de las donadas que la boita negra conten indiquèt que lo copilòt, Andreas Lubitz, empleguèt lo pilòt automatic per començar la descenduda e, puèi, faguèt aumentar la velocitat de la casuda de l’aparelh manualament per fin de l’escrachar contra la montanha. Lo copilòt auriá amagat un comjat per malautiá psiquatrica.
 
La primièra boita negra, amb l’enregistrament de las convèrsas dels pilòts dins la gabina e amb las torres de contraròtle, foguèt localizada lo meteis jorn de la tragèdia e permetèt ja alavetz al procuraire de Marselha de conclure que foguèt lo copilòt que decidiguèt de far escrachar l’avion: un pauc abans, tre que lo pilòt èra sortit de la gabina, lo copilòt aviá barrat la pòrta.
 
 
Solidaritat al país
 
La majoritat de las familhas dels mòrts qu’anèron sus plaça trobèron la solidaritat dels abitants dels vilatges vesins del sit de la tragèdia, que s’organizèron per los aculhir. L’edicion marselhesa de 20 Minutes i consagrava un reportatge.
 
 
Rapòrt final del BEA
 
Fa doas setmanas lo Burèu d’Enquèstas e d’Analisis per la seguretat de l’aviacion civila de França (BEA) presentèt son rapòrt final sus la tragèdia de l’avion de Germanwings que s’escrachèt arunan sul Puèg dels Tres Evescats (Prealps de Dinha) en provocant la mòrt de 150 personas.
 
Lo rapòrt ratifica la version que lo copilòt de l’aparelh, Andreas Lubitz, tombèt volontàriament l’avion e qu’èra malaut amb “de simptòmas d’una depression sevèra”. Lo document verifica atanben que Lubitz aviá consultat divèrses mètges dempuèi decembre de 2014, e que cap d’eles avertiguèt pas la companhiá aeriana nimai las autoritats de l’aviacion. Per tant, los expèrts qu’an fach lo rapòrt recomandan de poder revisar lo secret medical, que se deuriá pas observar dins lo cas de pilòts amb de problèmas psicologics. De fach, lo rapòrt destapa qu’un mètge aviá recomandat a Lubitz que se sonhèsse dins un espital psiquiatric qualques setmanas abans la tragèdia.
 
 
Decepcion de las familhas
 
Lo rapòrt se publiquèt lo dimenge 13 març, mas las familhas de las victimas ne poguèron conéisser los resultats lo dissabte, e manifestèron lor decepcion. Eles planhon que dins aquel rapòrt i aja pas mai d’informacions que çò que ja sabián e vòlon que s'examine se i aguèt negligéncia.
 
“Portarem lo clam als Estats Units perque, a l’escòla de vòl estatsunidenca ACTA, una filiala al 100% de Lufthansa, que realizèt son entraïnament, ja i aviá de simptòmas que lo copilòt auriá pas degut trabalhar coma pilòt. Aviá de tendéncias suicidàrias, preniá  de drògas psicotròpas e patissiá de fòrtas depressions, que son de faches que mostravan qu'èra pas apte a èsser pilòt”, çò expliquèt un dels avocats de las familhas de las victimas alemandas.



Le 18:18 - édition spéciale : émotion et...per LaProvence

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
1.

Tot acò es mentida,messorgos,sempre fan lo mateis,amenacas que se tancarem l'empresa e vos quedarets sense feina,que cobrerets pas res,que.....

  • 1
  • 0

Escriu un comentari sus aqueste article