Bandièra01 1180x150: Comuna de Tolosa

Actualitats

Es començada la batalha de Mossol

Mentre que l’armada iraquiana ataca Mossol, l’armada siriana ataca Palmira. L’Estat Islamic poiriá èsser desfach per l’oèst e per l’èst a l’encòp

| Radio Allen
L’armada iraquiana a començat l’assaut de la vila de Mossol, a las mans de l’Estat Islamic (o Daish) dempuèi 2014. La primièra partida de l’ofensiva de l’armada iraquiana foguèt de conquistar divèrses vilatges al près de Mossol. Los iraquians comptan amb l’ajuda —tre lo començament d’aquela batalha— dels avions estatsunidencs, de tropas curdas e de fòrças paramilitaras shiitas.
 
Ça que la, los analistas an confirmat que de prene Mossol —una vila amb mai de 2 milions d’abitants e la segonda mai granda d’Iraq— serà malaisit, pr’amor que, segon los rapòrts de l’intelligéncia aliada dins la vila, i a de mai en mai de soldats de l'Estat Islamic.
 
E mai s’òm ditz que la conquista d’aquesta vila se poiriá far en un an, de fonts de l’armada iraquiana ja an confirmat las primièras reüssidas militaras. “La primièra fasa de l’operacion Fatah foguèt de lançar l’assaut sus divèrses vilatges al près de Mossol, que son ja conquistats”  —çò dison de militars iraquians—. “Mas la batalha per la reconquista de la província de Niniva es ja començada”.
 
 
D'aquel temps, l’armada siriana ataca Palmira
 
Mentre que los iraquians e lors aliats atacan Mossol, l’armada siriana a tanben entamenat l’assaut sus la vila del desèrt sirian de Palmira, que tombèt a las mans de Daish al començament d’ongan. L’armada siriana recep tanben l’ajuda de divèrsas milícias aliadas e tanben de l’aviacion russa.
 
Aquesta batalha serà considerada coma un succès per l’armada siriana s’es ganhada pr’amor qu’aquò implicariá d'atacar e véncer l’Estat Islamic per l’oèst e per l’èst a l’encòp. La populacion de Palmira, totun, a patit d’assasinats collectius pendent tot l’an 2016.
 
L’armada sirian a confirmat tanben que la vila de Palmira poiriá èsser presa dins qualques oras mas la situacion a l’ora d’ara es establa. Divèrsas televisions sirianas mòstran la vila de luènh. Ça que la, divèrses analistas internacionals ja an alertat que l’Estat Islamic a fòrça soldats dins la vila e qu’aquestes pensan de bombardar los tresaurs arqueologics de Palmira abans que la vila siá presa per las tropas de Bashshar Al Assad.
 
 
 
 
Christian Andreu

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
1.

Força soldats que luitats per la libertat de la vostra terra Siria e Irac, los vostres esforços estan aconseguin acabar amb aquesta escoria, degradacion humana,barbarisme,terror. Ara es l'hora de donar-los lo sieu merescut, dur e bona punteria.

  • 2
  • 0

Escriu un comentari sus aqueste article