Bandièra01 1180x150: Comuna de Tolosa

Actualitats

Estrasborg: la polícia amb l’armada contra los manifestants

De soldats armats amb de fusilhs d’assaut FAMAS ajudan la polícia a reprimir los estudiants que protèstan contra la reforma del còde del trabalh

La repression contra las manifestacions a passat l’òsca en Alsàcia. Lo 9 d’abril passat, la polícia francesa se serviguèt de l’armada francesa per reprimir una manifestacion d’estudiants que protestavan contra la reforma del còde del trabalh, la dicha Lei El-Khomri.
 
Segon La Feuille de Chou, la polícia s’encanhèt contra los manifestants, puèi sièis militars de l’operacion Sentinelle, armats de lors fusilhs d’assaut Famas, anèron secórrer los policièrs, coma se pòt veire dins lo vidèo seguent.
 

 
 
De soldats de l’armada francesa patrolhan dins tot l’estat francés dins l’encastre de l’operacion Sentinelle que, dempuèi los atemptats dels 7 e 9 de genièr de 2015 a París, mobiliza 10 500 personas per protegir los ponches sensibles del territòri.
 
 
De protèstas per tot l’estat francés
 
Lo movement dels indignats franceses nomenat Nuèch de Pè (Nuit Debout), que dempuèi lo 31 de març ocupa la Plaça de la Republica de París, s’estend per tot l’estat francés e quitament a Brussèlas, Berlin, Madrid, Saragossa e qualques vilas dels Païses Catalans. L’iniciativa amassa de milièrs de joves que cada jorn arriban a las plaças amb los afars per campar e s’organizar en assembladas e comissions.
 
En Occitània lo movement es arribat almens a Avinhon, Bordèu, Clarmont, Lemòtges, lo Telh, Marselha, Montpelhièr, Niça, Nimes, Pau, Rodés, Tolosa, Tula, Valença e Vilafranca de Roergue.
 
La protèsta seguís la cauma generala del 31 de març passat per protestar contra la reforma del còde del trabalh, la dicha Lei El-Khomri, e aquela cauma se tenguèt jos la crida dels principals sindicats interprofessionals, de qualques organizacions d’estudiants e de fòrça collectius. Pasmens, los manifestants ocupan las plaças e i demòran de nuèch, dreches, de pè, tanben per protestar contra l’estat d’emergéncia e d’autras luchas socialas. Per tant, lo movement es vengut una convergéncia dels movements ecologistas, antimilitaristas e d’autres ciutadans malcontents e decebuts a causa de las politicas del govèrn de Manuel Valls; que denóncian quatre ans de mesuras liberalas e reclaman un cambiament.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
5.

L'armada? Es que se crenta que decebuts de se veire negats dins o Grand Est los alsacians aurián envèja de tornar a èsser l'oèst del l'autre país?

  • 3
  • 0
francesc palma de mallorca
4.

La lei antiterrorista s'empra per disoldre manifestacions pels dreits del trabalhadors. Es pas acò Manelet, és pas acò Hollande.

  • 3
  • 0
Ernèst Guevara Jr. L'Avana
3.

Per tant, lo movement es vengut una convergéncia dels movements ecologistas, antimilitaristas e d’autres ciutadans malcontents e decebuts a causa de las politicas del govèrn de Manuel Valls; que denóncian quatre ans de mesuras liberalas e reclaman una governança d'esquèrra correspondent a la color majoritària eissida del sufratge universal segon l'anar mai ordinari d'una democracia. La dreita liberala es impausada de fòrça, manu militari, coma se vei aquí,. E los estudiants e autres joves non s'i enganan ges ni mica. Los integristas que son lors enemics son los integristas liberals, que botan lo mond sancèr de genolhós davant l'interès privat d'un ponherat de privilegiats injustificables.

  • 18
  • 0

Escriu un comentari sus aqueste article