Bandièra01 1180x150: Comuna de Tolosa

Actualitats

Compte enrèire per la creacion de l’intercomunalitat del Bascoat Nòrd en genièr de 2017

Lo 70% de las comunas vòtan per establir un organisme pròpri per Iparralde. Los cònsols opausats presentan un recors davant lo Ministèri de l’Interior

Los representants politics nòrd-bascos an decidit de començar los trabalhs per definir cossí serà l’intercomunalitat del Bascoat Nòrd, la primièra institucion politica pròpria qu’aurà aquel país dins l’istòria de la Republica Francesa. L’organisme deu intrar en foncionament lo 1r de genièr de 2017. Abans, deurà resòlver un recors interpausat pels opausants a la creacion d’aquel organisme.
 
L’intercomunalitat del Bascoat Nòrd fusionarà las dètz intercomunalitats existentas a l’ora d’ara en Iparralde. Prendrà la forma d’un establiment public de cooperacion intercomunala (ÈPCI), un tipe d’estructura administrativa francesa qu’amassa de municipalitats e met en comun de competéncias municipalas.
 
Demièg las competéncias dels ÈPCI i a lo desvolopament economic, las politicas urbanas, la gestion dels residús e la gestion de l’aiga. La lei francesa permet als ÈPCI de causir de gerir de competéncias suplementàrias, dont las culturalas, las environamentalas, las lingüisticas e las que tòcan la cooperacion transfrontalièra.
 
Dins lo comitat que pilotarà la creacion de l’entitat nòrd-basca, las dètz intercomunalitats actualas seràn representadas.
 
 
Larga majoritat en favor de l’ÈPCI Bascoat
 
Los trabalhs per definir las caracteristicas concretas de l’ÈPCI començaràn quand auràn acabat los vòtes dins totas las comunas del Bascoat Nòrd. Sus 158 municipis, 111 (lo 70%) se son prononciats per e 47 contra. Per que l’ÈPCI avance cal que la majoritat absoluda de las comunas vòte per, e qu’aquelas comunas ajan la majoritat absoluda de la populacion del territòri. Los dos critèris se son complits.
 
La creacion d’un organisme public qu’amasse tot lo territòri d’Iparralde èra una revendicacion istorica del nacionalisme basco.
 
 
Recors contra l’ÈPCI
 
Abans que l’ÈPCI se meta en marcha, lo ministèri de l’Interior deu resòlver un recors presentat pels cònsols bascos opausats a la creacion d’aquel organisme. Lo recors demanda al ministre Bernard Cazeneuve d’anullar lo decret ont lo prefècte dels Pirenèus Atlantics, Pierre-André Durand, definiguèt en 2015 los limits del futur ÈPCI, en los fasent coïncidir amb los d’Iparralde e del Bas Ador.
 
 
 
Ací Gasconha demanda que se prenga en compte la cultura gascona del Bas Ador
 
L’Associacion Ací Gasconha, basada a Anglet (Bas Ador), mandèt en novembre passat una letra al prefècte en planhent que lo projècte d’un “ÈPCI Bascoat” inclutz lo territòri occitan del Bas Ador sens prene en consideracion la cultura gascona.
 
La nòva institucion, que poiriá intrar en vigor en 2017, seriá la primièra dins l’istòria de la Republica Francesa que coïncidiriá amb los limits d’Iparralde e del Bas Ador, e se i reconeisserà lo caractèr basco. Lo gavidaire de l’associacion occitanista, Bernat Dauga, demanda d’inclure la cultura gascona dins lo projècte amb un nom que rebata la realitat de las divèrsas culturas del territòri, e que prepausa aital un nom coma “ÈPCI Bascoat-Ador”.
 
Dauga remembrava tanben que l’Ofici Public de la Lenga Occitana “poderé lhèu estar finançat e aver competéncias sus aqueth ÈPCI dit «Bascoat»”.
 
 
 
 
 
Aquesta nòva es adaptada de Nationalia amb qui Jornalet a un acòrdi de cooperacion.
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

lo catòion
2.

"Ací Gasconha demanda que se prenga en compte la cultura gascona del Bas Ador"

Al prefècte? Mas los Bascos son pus amics de l'occitan que lo prefècte. O l'objetiu es benleu d'arrestar tot?

  • 1
  • 0
Pirolet
1.

Ara amb aqueles arlèris de jacobins nos trapam que van acusar de voler devesir los que se vòlon reünir!

  • 1
  • 0

Escriu un comentari sus aqueste article