Bandièra01 1180x150: Comuna de Tolosa

Actualitats

Los escolans d’occitan son estats un còp de mai los protagonistas del festenal Escambis

La tresena edicion del festenal occitan de Carcin se debanèt del 20 al 22 de mai a Sant Seren e a Sant Joan de la Ginèsta, en assolidant son succès

| Festenal Escambis 2016
La tresena edicion del Festenal Escambis comencèt a Sant Seren (Limarga) pel tradicional recampament dels escolans d’occitan, de la mairala al licèu, que se retrobèron totes lo divendres 20 de mai de matin, a l’entorn de cants, de danças e de teatre. Lor aprèpmiègjorn se debanèt en preséncia del trio roergàs Pòm Pogo Dòm que contunhèt son concèrt en serada a la sala polivalenta pel mai grand plaser del public.
 
L’inauguracion de l’Espaci Occitan Carcinòl se debanèt en preséncia de Sénher Destic, cònsol de Sant Seren, de Madama Saint-Chamant (adjoncha cargada de la cultura), de Madama Martignac (consolessa de Sant Joan de la Ginèsta) e de Sénher Pradié (conselhièr regional), e mai dels membres e amics de l’associacion Aquí l’Òc.
 
Dissabte sul mercat artisanal, lo tornièr sus fusta, lo terralhièr, l’artisan del cuèr, lo gravaire sus veire e lo rodièr, entretrant, mostrèron lor saber-far e meravilhèron los nombroses passants. Pendent aquel mercat, Maria-Odila Dumeaux, contaira de talent, saupèt captivar pichons e grands per las divèrsas devinalhas e istòrias. Florian Vernet, ancian professor e escrivan, mostrèt a quin ponch l’occitan es ancorat dins nòstre quotidian per l’etimologia de nombroses mots passats dins la lenga francesa.
 
En fin de jornada, la corala de l’amicala dels ainats de Soçairac encantèt lo public de Sant Joan de la Ginèsta en interpretant un desenat de cançons. Aprèp lo repais, lo concèrt-balèti amb lo grop La Talvera auriá meritat un pauc mai de dançaires compte tengut de la diversitat del repertòri musical prepausat mas aquò levèt pas res a la qualitat de sa prestacion.
 
Enfin, lo dimenge aprèpmiègjorn s’acabèt amb Expression 176, actors remirables del Bas Carcin venguts pel primièr còp en Limarga, puèi amb Pèire Peguin e Deidièr Vergne, de l’AMTP Carcin, qu’interpretèron de nombroses cants populars e religioses, pontuats d’explicacions, e joguèron de divèrses instruments de musica coma l’aubòi, la cabreta e l’acordeon per exemple.
 
Dimenjada agradiva dins la jòia, la convivialitat e la bona umor. A l’annada que ven!
 
 
 
 
Estève Clerc
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma de mallorca
1.

Una bona festa amb moltes causes de la nostra cultura acompanhat de bon manjà e beure.

  • 1
  • 0

Escriu un comentari sus aqueste article