Espelirà en setembre que ven una nòva revista numerica en occitan. Entitolada Sapiéncia, cèrca d’èsser una referéncia dins de tematicas coma la sciéncia e l’istòria mas tanben dins d’autras, estant qu’a tanben divèrsas seccions coma Lingüistica, Geografia, Tecnologia, Paleontologia o Divèrses ont i pòdon intrar tanben de tematicas d’actualitat de tota sòrta.
 
Après una estapa de creacion informatica, Sapiéncia es a bastir una còla de redaccion bona e professionala. “Avèm realizada aquesta iniciativa per balhar mai de normalitat a la lenga occitana dins l’encastre de la sciéncia e de l’istòria”, çò ditz son cap redactor, Christian Andreu, collaborator e opinant de Jornalet. A l’ora d’ara la revista a pas cap de revengut e, per aquela rason, cèrca las collaboracions benevòlas e apela a “la bona fe dels occitans”.
 
L’objectiu de la revista es d’agrandir la còla per multiplicar las publicacions per setmana, e lèu trabalhar amb d’autras revistas ja existentas, en tot gardar al cap la creacion futura d’una version papièr. “I a pas res d’impossible dins aqueste Mond. Se n’i a la volontat, tot se pòt far: Sapiéncia e plan d’autras revistas que la lenga occitana n’a besonh per se normalizar un pauc mai”, çò ditz Andreu a La Setmana que ne publica un retrach.
 
 
 
<hr align="left" size="1" width="33%" />
sapiencia.eu