Bandièra01 1180x150: Comuna de Tolosa

Actualitats

Adieu a Muhammad Ali, legenda de la bòxa

Activista politic e social, Ali èra malaut de Parkinson dempuèi qualques annadas

Lo legendari boxaire estatsunidenc Muhammad Ali es mòrt a 74 ans. Cassius Clay, que s'apelariá pus tard Muhammad Ali a causa de sa conversion a l’islam, èra malaut de Parkinson dempuèi qualques annadas e dijòus èra intrat dins un espital per una afeccion respiratòria.
 
Foguèt tres còps campion del mond dels peses pesucs e tanben campion olimpic de bòxa a Roma l’an 1960. Après se proclamar campion del Mond en 1964, se convertiguèt a l’islam e prenguèt lo nom de Muhammad Ali.
 
Après èsser empresonat per refusar d’anar far lo soldat a la guèrra de Vietnam, renovelèt en doas escasenças lo títol de campion del Mond e acabèt sa carrièra professionala en 1981. Un an pus tard, li diagnostiquèron la malautiá de Parkinson coma resultat de son activitat pugilistica.
 
La darrièra aparicion publica de l’èx-boxaire foguèt en abril passat dins l’encastre d’un sopar solidari que culhissiá de fonzes per la lucha contra la malautiá de Parkinson.
 
 
Activista politic e social
 
Ali es considerat coma un dels boxaires mai grands de l'istòria d’aquel espòrt, mas tanben se faguèt remarcar fòra lo ring pel sieu activisme politic e social. Campion del Mond en 1967, refusèt de servir l’armada estatsunidenca pendent la Guèrra de Vietnam per objeccion de consciéncia. “Ai pas res contra lo Vietcong”, çò diguèt. A causa d’aquel acte, li levèron lo títol mondial ganhat en 1967, li retirèron la licéncia per boxar e lo condemnèron a 5 ans de preson. Aquela senténcia foguèt revocada tres ans pus tard, per decisision unanima de la Cort Suprèma.
 
Lo renonciament a combatre dins l’armada e la conversion a l'islam lo faguèron devenir una figura discutida per una societat estatsunidenca qu'èra pas acostumada a aqueles gèstes de desobesissença. Activista politic, luchèt en favor dels dreches dels afroamericans e faguèt campanha contra lo racisme e la segregacion raciala en fòrça escasenças.
 
Dins los Jòcs Olimpics d’Atlanta de 1996, e afectat de Parkinson, Ali faguèt lo darrièr relèu de la flama olimpica e foguèt l’encargat d’alucar lo pairòl olimpic:
 

Vejatz lo vidèo de l’istoric combat que lo faguèt afrontar George Foreman e que lo transformèt en campion mondial. Lo duèl se debanèt a Kinshasa (Zaire, a l'ora d'ara, Republica Democratica de Còngo).
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma de mallorca
1.

Un home que s'atreví a dir qu'el aniria pas a la guerra del Vietnam, e hi anet pas. Que descanse en patz.

  • 1
  • 0

Escriu un comentari sus aqueste article