Bandièra01 1180x150: Comuna de Tolosa

Actualitats

Alemanha reconeis lo genocidi armèni e provòca una crisi amb Turquia

Per Erdoğan, “las relacions diplomaticas, economicas, comercialas, politicas e militaras ne resultaràn damatjadas”

| Cezary Piwowarski
Lo parlament alemand a aprovat una mocion que descriu coma “genocidi” lo chaple que patiguèron los armènis de part dels otomans en 1915. La resolucion, escricha per de parlamentaris de l’Union Democratica Alemanda (CDU), del Partit Socialdemocrata (SPD) e dels Verds, a recebut lo sosten de totes los partits. Aital, Alemanha ven lo vint e seten país que reconeis lo genocidi armèni. Per una question d’agenda, èran pas presents al vòte ni la cancelièra Angela Merkel, ni lo sieu numèro dos e cap de l’SPD Sigmar Gabriel, ni lo ministre dels afars exteriors Frank-Walter Steinmeier.
 
Lo primièr ministre turc, Binali Yıldırım, diguèt qu’aquel vòte èra “ridicul” e que metiá en perilh “l’amistat” entre los dos païses en un “moment sensible”. En mai d’aquò, Yıldırım planguèt qu’aquela mocion èra un pretèxt per distraire los alemands dels problèmas politics intèrnes qu’afèctan la republica.
 
La reconeissença se produtz après que lo president turc, Recep Tayyip Erdoğan, aja remés en causa mai d’un còp las condicions del pache entre l’Union Europèa e Turquia per i transferir los refugiats. En mai d’aquò, Erdoğan avertiguèt que las relacions entre Turquia e Alemanha se tibarián se s’aprovava la mocion: “s’Alemanha se daissa enganar per aquò, alavetz las relacions diplomaticas, economicas, comercialas, politicas e militaras ne resultaràn damatjadas”.
 
Lo govèrn turc a totjorn refusat de reconéisser lo chaple e la persecucion d’un milion e mièg d’armènis dins l’Empèri Otoman. Segon lo primièr ministre, lo genocidi “foguèt un dels multiples eveniments que pòdon arribar dins quin país que siá, dins quina societat que siá, jos las condicions de la Primièra Guèrra Mondiala”.
 
 
Lo genocidi
 
Lo 24 d’abril de 1915, uèi fa cent ans, las autoritats turcas arrestèron sèt cents intellectiuals armènis a Constantinòple (uèi Istambol). Aquel jorn, conegut coma lo Dimenge Roge, marca lo jorn que comencèt lo genocidi d’aquel pòble de tradicion crestiana en mans del regim ultranacionalista dels Joves Turcs. En un pauc mai d’un an, se calcula que tuèron 1,5 milion d’armènis e que 850 000 foguèron desplaçats e menats en las infernalas Marchas de la Mòrt, a de camps de concentracion alonhats de lors regions. Las minoritats assiriana e grèga de l’empèri tanben foguèron chapladas amb de centenats de milièrs de mòrts pendent aquel periòde.
 
La tòca èra l’eliminacion fisica del pòble armèni dins lo territòri de l’estat turc, e mai s’una lei turca de 2007 enebís de parlar de genocidi e sosten que la populacion turca foguèt victima dels armènis. Segon la version oficiala, Constantinòple (Istambol) aviá paur d’una solidaritat crestiana entre armènis e russes pendent la Primièra Guèrra Mondiala, e amb aquel pretèxt reprimiguèron durament una revòlta dins la region de Van en abril de 1915.
 
 
La memòria
 
A l’ora d’ara, la memòria del genocidi se manten solament dins la jove Republica d’Armenia, nascuda en 1990 a partir del desmembrament de l’URSS, e dins los païses ont la diaspòra armènia es nombrosa.
 
Fins a la mocion d’Alemanha, França èra lo primièr país a impulsar d’iniciativas per reconéisser lo genocidi e a ensajat dos còps de ne penalizar la negacion, mas a mal capitat. Lo Parlament Europèu reconeis lo genocidi dempuèi 1987 gràcias a la pression de qualques eurodeputats franceses.
 
La posicion francesa sus lo genocidi armèni se pòt explicar perque los armènis son nombroses dins l’Occitània jos administracion francesa, mai que mai a Marselha e Valença.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L\'Avana
6.

Alemanha reconeis lo genocidi armèni e provòca una crisi amb Turquia : tant melhor ! E s'un genocidi correspond a l'exterminacion d'un pòble, França es plan en avan!ça sus Truquia ! E çò pièger, ppas una santa puta traça de sang subras sas mans assinas. Li basta d'escantir les lengas, totes los pòbles s'escafan…

  • 1
  • 0
Hayastan Erevan
5.

En bon occitan: "armèni" (masculin) e "armènia" (femenin). Evitatz "armenian" e "armeniana".

  • 2
  • 0
Felip Martèl Montpelhier
4.

#3 Tot se vau pas. Los presoniers de guèrra alemands èran presoniers de guèrra, justament, pas civius. Se los americans los an efectvament laissat murir de fam (los dau mens que son pas estats empleats per los estats que lo Reich avian occupat per la reconstruccion e lo desminatge), es pas per volontat genocidària, mai probabalment per negligéncia e incapacitat a gerir un nombre considerable de presoniers (en URSS es estat piéger, mas vist lo biais que los alemands avian tractat los presoniers russis dins lors camps...) Un n'arresta pas jamai amb la locha entre los planhs legitims dels uns e dels autres e lo pichon juec de saber qual es qu'a començat. Dins lo cas turc, chau puèi pas eissubliar que a) minimisan tant coma poion lo nombre de morts) b) qu'avian ja començat de s'"ocupar" dels armenians en 1896 e que l'i a pas de rason de pensar que los armenians en 14 o avian eissubliat, elos) c) qu'après, los turcs se son "ocupats" dels grecs e dels curds (contunhan, d'alhors).

  • 6
  • 0
Batko
3.

#2 Evaluar çò qu'estoc un genocidi o pas es pas aisit. Dis que cau comernçar l'istòria per la debuta. Dens los famoses (mes pas coneguts) "camps de la Vath deu Rhin" los Americans an deishat los presonèrs alemands se morir sens minjar ni tampauc béver. Lo responsable s'apèra Eisenhower. Lo nombre de victimas puja segon uns istorians a 1 milion. Lo parlament alemand a pas debatut s'èra o pas un genocidi.
Generalament, crimi vòu pas díser automaticament genocidi.

  • 1
  • 4
francesc palma de mallorca
2.

Voler pas reconeisser sa història, no la canvia, la pot pas canviar. Portar-se a la població armenia a uns desets sense preocupar-se de donar-los menjar ni beure es un genocidi. Pas com fou lo que feren los nazis, mas de 800.000 a 1,500.000 armenis moriren per lo translat.

  • 3
  • 0

Escriu un comentari sus aqueste article