Bandièra01 1180x150: Comuna de Tolosa

Actualitats

Obama tròba lo Dalai Lama malgrat las protèstas chinesas

Malgrat la tension evidenta qu’aquesta trobada poiriá desvelhar, lo president estatsunidenc, Barack Obama, a rescontrat dins l’Ostal Blanc, un autre còp, lo cap esperital de Tibet, lo Dalai Lama. Lo govèrn chinés a mostrat son malèsser en tot confirmar qu’aquel rescontre “farà mai marridas las relacions de fisança e cooperacion entre los dos païses”.
 
La reünion, totun, s’es facha dins las cambras particularas de l’Ostal Blanc, e non pas dins las oficialas. Aital o a volgut Obama per mostrar son afeccion personala al Dalai Lama e, tanben, per mostrar las preocupacions qu’a sus Tibet e son identitat fòrça particulara. Mas la trobada es estada vista coma una intromission per los chineses. “Los afars de Tibet son d’afars solament dels chineses, e pas cap d’autre país a drech d’i interferir”, çò confirmèt Lu Kang, pòrtavotz del Ministèri dels Afars Exteriors chinés. En mai d’aquò, Lu Kan acusèt lo Dalai Lama de manténer una politica independentista jos lo parapluèja de la religion en Tibet.
 
 
Trobadas polemicas
 
Aquestes darrièrs ans, de mai en mai de caps politics internacionals an refusat de rescontrar lo Dalai Lama per paur de la reaccion chinesa. Aital, quand en 2012 David Cameron lo rescontrèt, China protestèt fòrça e anullèt divèrsas trobadas comercialas posterioras amb de politicians angleses per mostrar lo sieu malèsser. Aquò afectèt las relacions comercialas d’ambedós païses.
 
Totun, l’administracion de Barack Obama e el personalament an ja rescontrat en divèrsas ocasions lo Dalai Lama, coma se debanèt ja en 2014 e 2015. Ara la trobada s’es facha a la Cambra de las Mapas, residéncia particulara de l’Ostal Blanc, e non al Burèu Oval, ont Obama recep de costuma los caps d’estat del Mond entièr.
 
Per tant, aquela trobada se poiriá considerar mai coma un rescontre personal d’Obama, puslèu que coma un rescontre oficial. Aital o a confirmat lo secretari de premsa de l’Ostal Blanc, Josh Earnest. “Pr’amor que lo president a una granda estimacion per la preservacion de las tradicions religiosas, culturalas e lingüisticas tibetanas”, çò diguèt.
 
E tot aquò se passa mentre que los tibetans contunhan de luchar per lor libertat. Aquestes darrièrs ans, mai de 140 tibetans se son brutlats amb lo fuòc per o demostrar e mai de 100 000 tibetans demòran en Índia a l’exili amb lo Dalai Lama. Malgrat aquela trobada, la lucha per la libertat de Tibet, doncas, contunha.
 
 
 
 
Christian Andreu
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
2.

Està ben que es trobe amb lo Dalai Lama, mas tamben es podria reunir amb los mafiosos que l'imperi a introduit a Siria de l'EI e non sortiria tan ben parat.

  • 0
  • 0
Pirolet
1.

China pòt bramar. De tot biais ja l'escotem de sobra!

  • 4
  • 0

Escriu un comentari sus aqueste article