Bandièra01 1180x150: Comuna de Tolosa

Actualitats

L’armada iraquiana a conquistat finalament Falluja

| IOM Iraq
Pendent aquesta dimenjada e après qualques setmanas de combats, l’armada iraquiana a conquistat los darrèrs quartièrs de la vila iraquiana de Falluja. La fugida de milièrs de personas, que fugissián los darrièrs combats entre aquela armada e los soldats de l’Estat Islamic, a provocat una crisi umanitària car las agéncias d’ajuda als refugiats se pòdon pas ocupar de tant de mond.
 
La conquista finala de Falluja comencèt divendres, quand l’armada iraquiana intrava dins lo centre istoric de la vila. Lo combat s’èra desvolopat pendent qualques setmanas. La resisténcia finala dels darrièrs soldats de l’Estat Islamic foguèt petita e, fin finala, la bandièra irquiana poguèt èsser quilhada sul bastiment del govèrn, de la ràdio e de la television.
 
L’atac final aguèt luòc quand l’armada irquiana comencèt l’assaut sus l’espital de Falluja, la bastissa que qu’èra estada la tòca de l’armada de Daish quand l’organizacion jihadista aviá capturat aquela vila iraquiana. Aquel edifici èra un objectiu de totes pr’amor qu’èra estat tanben utilizat per Daish coma quartièr general. Aital, e après la conquistar amb l’ajuda de las fòrças aerianas estatsunidencas, la television iraquiana poguèt anonciar finalament que Falluja èra liberada.
 
Pendent las darrièras oras, l’Estat Islamic aviá decidit d’abandonar sas posicions militaras e aviá permés que de milièrs de civils poguèsson fugir Falluja. Aquò foguèt considerat per l’armada iraquiana coma un bon fach estrategic pr’amor que fins a divendres èran estats utilizats coma escuts umans. Per aquela rason la fugida finala de l’armada de Daish permetèt qu’aquelas personas se poguèsson salvar in extremis.
 
“Daish a pas mai lo poder de defende Falluja”, çò diguèt lo Coronèl Jamal Lateef, de l’armada iraquiana, après los darrièrs combats en la vila, “sas linhas defensivas son collapsadas e per tant la batalha finala per la liberacion de Falluja es estada tan rapida”. Puèi òm aprenguèt que las darrièras tropas jihadistas avián fugit cap als barris del nòrd e de l’oèst de la vila. Totun, Falluja èra ja segura.
 
 
La lucha per liberar Falluja comencèt en 2015
 
L’aliança qu’a liberat aquela vila iraquiana a de sòcis divèrses e estranhs. Los bombardaments aerians estatsunidencs an ajudat l’armada iraquiana pendent qualques meses e son govèrn tanben a criticat la preséncia de las tropas sunnitas iranianas dins la coalicion. Amb l’ajuda aeriana poguèron èsser destruches dos grands canons de Daish que permetián pas l’intrada dins la vila de las tropas aliadas.
 
La victòria de l’armada iraquiana foguèt tanben celebrada pel govèrn d’aquel país. Malgrat aquò, ara la tòca es la vila iraquiana de Mossol, encara en mans dels jihadistas. Mas la conquista de Falluja es estada fòrça celebrada pr’amor qu’es solament a mens de 65 quilomètres de Bagdad, la capitala d’Iraq. La conquista de Falluja en 2013 per Daish èra estada lo simbòl de l’expansion d’aquel estat terrorista pendent las darrièras annadas, bòrd qu’èra la vila jos lo poder de l’Estat Islamic pendent mai de temps.
 
Una analisi estrategica sus çò que s’es passat se basa sus la fin del sosten de tropas de tribus localas, qu’an quitat Daish per anar cap a de posicions contràrias. Aital, divèrsas fonts d’informacion militaras an confirmat que los soldats tribals locals aurián cregut finalament que la victòria de l’armada irquiana èra inevitabla e que caliá pensar mai a lors familhas. Una istòria tant anciana coma l’istòria del quite Mond. Ara lo problèma mai grand es de sonhar las mai de 10 000 familhas qu’an fugit Falluja aquestes darrièrs jorns.
 
 
 
 
Christian Andreu

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Francesc Palma de Mallorca
1.

Una bona nova aquesta, esperem que caigan d'altras e tot l'EI.

  • 0
  • 0

Escriu un comentari sus aqueste article