Bandièra01 1180x150: Comuna de Tolosa

Actualitats

Escòcia: l’SNP met en marcha un macrosondatge per mesurar lo sentiment independentista après lo Brexit

Se compta amb la participacion d’almens dos milions de personas, e los resultats seràn publicats lo 30 de novembre, qu’es la fèsta nacionala d’Escòcia

La primièra ministra escocesa, Nicola Sturgeon, a presentat un macrosondatge per mesurar lo sentiment independentista del pòble escocés après lo Brexit. “Escòcia votèt de far partida del Reialme Unit en 2014, mas aquel país a cambiat. Per aquela rason, cresi qu’es l’ora que lo nòstre partit dirigisca un nòu debat sus l’independéncia” çò diguèt dijòus passat la cap del Partit Nacional Escocés (SNP) en presentant lo nomenat National Survey. “Lançam uèi l’exercici d’escota mai important de l’istòria de l’SNP. Volèm comprene dins lo detalh cossí lo mond se senton ara a respècte d'Euròpa, del Brexit e de l’independéncia. Volèm saber qualas son las preocupacions de las gents e quinas questions se pausan. Volèm bastir, s’es possible, una via de consens per l’avenir”, çò precisèt. Se compta amb la participacion d’almens dos milions de personas e los resultats se faràn publics lo 30 de novembre, qu’es la fèsta nacionala d’Escòcia.
 
 L’opinon d’almens dos milions de personas es lo lindal que se marca lo National Survey per que lo sondatge siá representatiu dels cinc milions d’escocesses amb drech de vòte. Per far participar tant de mond, an mes en linha un sit web que, un còp que l’usatgièr s’identifica, pòt respondre a las 12 questions del sondatge. Pasmens, Sturgeon anoncièt que l’SNP esperava mobilizar sos militants —aperaquí 120 000 personas— per pausar las questions als domicilis pòrta per pòrta. Lo projècte es totalament finançat pel partit e pas brica per l’argent public.
 
Lo sondatge prepausa de questions sul referendum d’independéncia de 2014, lo Brexit e un possible segond referendum. En mai d’aquò, se demanda d'avalorar l’importància de l’independéncia, de l’economia, dels servicis publics, de las pensions, de l’immigracion o dels dreches umans.
 
Podètz veire aquí lo format del National Survey e totas sas questions.

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Imaginatz un sondatge aital en França o en Espanha?! Te mandan lo GIGN e la Garda Civila!

  • 3
  • 0

Escriu un comentari sus aqueste article