Bandièra01 1180x150: Comuna de Tolosa

Actualitats

Aprene l’occitan

| CollegeDegrees360

Amb la rintrada, arriban qualques propòstas interessantas per aprene la lenga, per s’i alfabetizar o per n’aprigondir la coneissença. Aicí vos en listam qualques unas.


Aprenèm l’occitan
 
Aprenèm l’occitan a fach una reformulacion radicala per s’adaptar al contèxt actual d’ensenhament de l’occitan. Al delà de melhorar lo sit, sul sit aprenemloccitan.com i podètz trobar d’entresenhas actualizadas de las activitats. E una lista dels corses e dels estagis que se debanan per tot lo país.
 
 
Amb accent aranés
 
Se sètz interessats d’aprene l’occitan aranés, lo Conselh General d’Aran vos prepausa de corses presencials dins totes los nivèls a Vielha (Val d’Aran) e a Barcelona (Païses Catalans).
 
Las inscripcions se pòdon far entre lo 17 e lo 30 de setembre per telefòn, al +34 973 64 18 01, o per e-mail.
 
Al delà, l’aranés tanben se pòt aprene en linha.
 
 
Amb accent de las Valadas
 
A Draonier (Val Maira), l’Espaci Occitan organiza un cors gratuit en uèch leiçons entre lo 4 d’octòbre e lo 29 de novembre, e es destinat als operators toristics, ensenhaires, trabalhadors de l’administracion e simples afogats.
 
Cal far las inscripcions abans lo 28 de setembre per e-mail.
 
Lo cors en linha de l’Espaci Occitan començarà lo 1r d’octòbre e se pòt seguir dins quatre nivèls. Per lo seguir, tanplan se cal inscriure per e-mail fins al 28 de setembre.
 
 
A Barcelona

Al delà dels corses d’aranés qu’ofrís lo Conselh General d’Aran, a Barcelona se pòt aprene l’occitan general al CAÒC. Los corses son dins totes los nivèls segon lo plan d’estudis del quadre referencial europèu.
 
Podètz descargar la fuèlha informativa, o vos inscriure al telefòn al +34 284 36 34, o per e-mail.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jacme Tolosa
5.

Siatz totes de pilkunnussija! :-)

  • 5
  • 1
Gerard-Joan Barceló Pèiralata
3.

#2 Non, que quand arribam sus sa pagina 'http://www.aprenemloccitan.com/), vesèm "apprenons l'occitan"...

  • 4
  • 0
BOURDON Auloron
2.

#1 Mes lo nom deu site qu'ei lhèu dab lo vèrbe a l'indicatiu...

  • 1
  • 0
Gerard-Joan Barceló Pèiralata
1.

Òsca per toteis aqueleis iniciativas ! Pasmens, marca mau qu'un sit consacrat a l'aprendissatge de la lenga nòstra pòsca aver dins son nom una error gramaticala. "Aprenèm l'occitan" vòu dire, per ieu, "nous apprenons l'occitan", es un present de l'indicatiu. "Apprenons l'occitan" (imperatiu) se diriá "aprengam l'occitan".

  • 5
  • 2

Escriu un comentari sus aqueste article