Lo comissari europèu de l’Ajuda Umanitària, Christos Stylianides, anoncièt diluns passat una ajuda de 18 milions d’èuros per metre remèdi a la deterioracion a l’èst d’Ucraïna a causa de l’aument dels combats entre las fòrças governamentalas e los milicians separatistas pròrusses.
 
“L’auça recenta de la violéncia a l’èst d’Ucraïna e sa repercussion sus la populacion civila son un grand chepic”, çò avertiguèt lo comissari, pendent sa vesita a Bajmut, a l’èst d’Ucraïna.
 
Stylianides expliquèt que l’ajuda europèa serviriá a las organizacions umanitàrias per cobrir de besonhs “urgents” de lotjament, noiridura, suènhs medicals, aiga e servicis sanitaris, e soslinhèt lo besonh de sostar los civils “d’un costat e de l’autre de la linha de front” a l’èst d’Ucraïna.
 
“Es crucial que l’ajuda arribe a totas las personas vulnerablas afectadas pel conflicte, rapidament, d’un biais segur e imparcial”, çò soslinhèt.
 
L'UE a mobilizat tanben de sosten —noiridura, aiga, combustible, candelas e tesas, matalasses, vestimenta d’ivèrn, materials de construccion e medicaments e d'esquipaments medicals— pels residents d’Adviyika, la vila mai afectada per la montada dels combats, qu'entre lo 29 de genièr e lo 5 de febrièr daissèron 17 000 personas sens d’aiga, electricitat e calfatge pendent gaireben una setmana.
 
L'UE e los estats membres an culhit mai de 399 milions d’èuros en ajuda umanitària e de sosten a la recuperacion per Ucraïna dempuèi lo començament de 2014.
 
A l'entorn del 50% de l’ajuda umanitària comunautària es adreiçada a las personas dins lo besonh dins las zònas contrarotladas pels rebèls, segon çò que precisèt l’executiu comunautari dins un comunicat.
 
L’ajuda umanitària de l’UE es destinada a la populacion mai vulnerabla, quina que siá la zòna del conflicte ont viscan o qu’ajan fugit, e sosten non solament los desplaçats intèrnes mas tanben los que se son anats en Bielorussia e Russia e qu’an besonh de supòrt.
 
Aperaquí 2,8 milions de personas an degut quitar lors ostals pel conflicte a l’èst d’Ucraïna.