Bandièra01 1180x150: Comuna de Tolosa

Actualitats

Lo govèrn espanhòl estúdia d’aplicar los estats d’alèrta, d’excepcion e de sètge en  Catalonha e Aran

Espanha avertís la Comission de Venècia d’aquesta possibilitat per arrestar l’independentisme. Lo Conselh d’Euròpa met en question la legalitat espanhòla

Lo govèrn espanhòl estúdia la possibilitat d’establir l’estat d’alèrta, d’excepcion e de sètge, per arrestar lo procès independentista en Catalonha
Lo govèrn espanhòl estúdia la possibilitat d’establir l’estat d’alèrta, d’excepcion e de sètge, per arrestar lo procès independentista en Catalonha | Ivan McClellan
Lo govèrn espanhòl estúdia la possibilitat d’aplicar l’article 116 de la Constitucion espanhòla, que permet d’establir l’estat d’alèrta, d’excepcion e de sètge, per arrestar lo procès independentista en Catalonha e Aran, en cas que l’aplicacion de l’article 155 de la Constitucion, que cèrca de suspendre las atribucions del govèrn autonòm de la Generalitat, siá insufisent, çò publicava El Periódico divendres passat.
 
Segon aquel jornal, lo govèrn espanhòl auriá mandat un escrich a la Comission de Venècia per justificar la legalitat de la reforma qu’a facha del Tribunal Constitucional. Mas la Comission de Venècia, qu’es un organisme consultatiu del Conselh d’Euròpa compausat d’expèrts independents en drech constitucional, publica uèi un tèxt fòrça critic a l’esgard de la cort constitucionala espanhòla e mòstra son chepic per la coercicion qu’ela exercís contra d’elegits catalans.
 
 
Los estats d’alèrta, d’excepcion e de sètge
 
Segon la legalitat espanhòla, se pòt declarar los estats d’alarma, d’excepcion o de sètge “quand de circonstàncias extraordinàrias fan impossibla lo mantenement de la normalitat mejançant los poders ordinaris de las autoritats competentas”.
 
L’estat d’alèrta se pòt activar dins tot lo territòri de l’estat o solament dins una partida, “quand se produson de catastròfas, de calamitats, de desastres publics coma de tèrratrems, d’inondacions, d’incendis urbans o forestièrs o d’accidents de granda amplor” e tanben en cas de crisis sanitàrias, de situacions de penuria o de paralisi dels servicis publics. Se declarèt un còp en 2011 durant una cauma dels contrarotlaires aerians, e se militarizèt l’espaci aerian.
 
L’estat d’excepcion se pòt activar “quand lo liure exercici dels dreches e libertats dels ciutadans, lo foncionament normal de las institucions democraticas, lo dels servicis publics essencials per la comunautat, o quin autre aspècte que siá d’òrdre public son tan grèvament alterats que l’exercici dels poders ordinaris seriá insufisent per lo restablir o lo manténer”.
 
L’estat de sètge se pòt aplicar quand “se produtz o menaça de se produire una insurreccion o un acte de fòrça contra la sobeiranetat o l’independéncia d’Espanha, son integritat territoriala o l’òrdre constitucional, que se pòsca pas resòlver per d’autres mejans”. Dins aquel cas, lo govèrn “designarà l’autoritat militara” que “jos sa direccion deurà executar las mesuras per aplicar al territòri concernit per l’estat de sètge”.
 
Lo pòrtavotz del govèrn espanhòl, Íñigo Méndez de Vigo, assegurèt as jornalistas qu’el sabiá pas qual èra lo contengut de l’escrich del govèrn espanhòl a Venècia. “Lo govèrn deu aver presentat sas allegacions, e esperarà ara de veire çò que ditz la Comission de Venècia”. Segon Méndez de Vigo, s’agís d’“un tèma juridic d’a fons malaisit”.
 
 
La Comission de Venècia met en question la legalitat espanhòla
 
Mas, lo quite divendres, la Comission de Venècia emetèt un comunicat fòrça critic a l’esgard del Tribunal Constitucional espanhòl, que se publica uèi diluns oficialament.
 
La Comission de Venècia reconeis que i a pas d'estandards europèus sul tèma mas avertís que l’actitud espanhòla es “una excepcion” perque atribuís a la cort  constitucionala de dreches que li pertòcan pas e que son normalament assumits per “d’autres poders de l’estat”. Dins aquel sens, sollicita de l’estat espanhòl que reconsidère las mesuras excepcionalas qu’a atribuidas al Tribunal Constitucional e que permeton, per exemple, de perseguir los elegits catalans. Atal, se recobrariá “la percepcion de la cort constitucionala coma un arbitre legal”, çò precisa la comission.
 
La comission se mòstra particularament inquieta per la possibla coercicion contra d’elegits catalans de la part del Tribunal Constitucional espanhòl.
 
 
Pressions del govèrn espanhòl
 
Lo govèrn espanhòl se faguèt quichant per rebaissar lo ton del jutjament e las criticas de la reforma del Tribunal Constitucional. L’agéncia ACN rapòrta que “las pressions espanhòlas capitèron pas d’escafar totalament lo ton critic” de la Comission de Venècia dins son rapòrt.
 
 
Responsa de Puigdemont
 
“Davant la menaça de l’estat d’excepcion, volèm bastir un país de gents excepcionalas”, çò respondèt dissabte lo president de la Generalitat de Catalonha, Carles Puigdemont çò rapòrta VilaWeb.
 
“L’estat espanhòl a de modernofobia perquè considèra que los cambiaments prigonds li pòrtan tòrt”, çò apondèt. Dins aquel sens, acusèt Espanha de “se bonquerizar” e de cambiar las leis per ensajar de blocar los cambiaments.
 
Puigdemont, que parlava dins l’encastre del congrès de la Joventut Nacionalista de Catalonha (JNC), diguèt que la responsa de la Comission de Venècia èra un avertiment a Espanha que “va pas plan”, e que “per aquel camin finirà coma una seguida de païses que son justament pas los qu’òm imagina quand òm pensa a de païses de tradicion democratica”.
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

"Tàrrega" Igualada (PP.CC.)
6.

Aquest estat, i els estats que es porposen, que sel's fotin pel...
Jo nomès vull un País lliure,i això no es un pecat, no un atac res, es que no es prou clar, ens han fotut tan de tot, que ja es imposlbe viure amb ells,
Si no els agrada, que s'hi possin...
Ho vol la majoria del poble Català.
Apa que s'aguantin, que si no tornaran els Almogàvers.
Despertaferro!
Viisca la Terra...Lliure!
L'Ernest, "El Tàrrega".

  • 0
  • 0
francesc palma
5.

Què pensin qu' ara son a l'UE e que franco es mort, es mort; hitler e mussolini tamben.

  • 8
  • 0
Gwenn
4.

Mai es gròs, mai aquò passa... Se ditz en tot cas... Aquò sembla a la granòta qu'a pas encara comprés que l'aiga èra ja a bolhir...

  • 4
  • 0
marta
3.

Joan Molin / Montpelhièr - Gràcies, però no caldrà. Sí ens anirà bé sentir-vos al costat els propers mesos. Com cantaven els Obrint pas:
Si et tinc a prop
em sento segur i més fort,
no em fa por l'enemic
ni cap mandra l'infinit.
La revolta serà
més dolça si et tinc a mà
per poder-te abraçar
quan ho haguem aconseguit.

  • 9
  • 0
George Orwell
2.

Omenatge a Catalonha !

  • 6
  • 0

Escriu un comentari sus aqueste article