Bandièra01 1180x150: Comuna de Tolosa

Actualitats

La Sostrana: protèsta desesperada dels salariats de GM&S

Après sièis meses de lucha per empedir lo barrament de l’usina, se tròban ara fàcia a una liquidacion de l’usina imminenta. Embarrats dins l’usina, menaçan de la far sautar

| Corinne CHEVRETON
Los salariats de GM&S, una usina de pèças per automobilas situada a la Sostrana (Marcha), son estremats dins l’usina dempuèi dijòus passat en protèsta contra lo redreiçament judiciari que provocarà lo barrament del sit. Exigisson una reünion amb lo grop PSA, Renault e amb lo president elegit de França Emmanuel Macron. Vòlon demandar a aquelas societats, que son los principals clients de GM&S, un engatjament per barrar pas l’usina.
 
Après sièis meses de lucha per empedir lo barrament de l’usina, se tròban ara fàcia a una liquidacion de l’usina imminenta. Davant aquela situacion desesperanta, los salariats se son embarrats dins l’usina e cada jorn destruson un esplech. En mai d’aquò, an installat de bombonas de gas e menaçan de las far sautar.
 
De personalitats e d’elegits locals an vesitat lo sit e an manifestat lor sosten als salariats. Dins aquel sens, lo deputat cònsol de Garait (Nauta Marcha), del Partit Socialista, acusava PSA e Renault de “non-assisténcia a departament en perilh” sus l’antena de France Info.
 
De son costat, Jean-Baptiste Moreau, candidat de La Republica en Marcha pel departament de Cruesa (qu’es lo que pertòca aproximativament lo país lemosin de Marcha), a declarat a La Montagne que s’amassarà uèi amb Macron a París. “Evidentament li vau parlar d’aqueu dorsier, qu’a ja entre las mans perque los salariats li avián remés” quand èra ministre.
 
Moreau assegura que ne farà un subjècte de primièr plan un còp que serà elegit. Mas los salariats de GM&S pòdon pas esperar entrò al 18 de junh, car la liquidacion aurà agut luòc.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jiròni B. La Sostrana
3.

Adiu amics,

Si podetz modifiar lo nom occitan de la Souterraine ?
En occitan lemosin actuau, qu'es La Sostrana (o La Sotrane), prononçat "la soutrane" en marchés, "lo soutrano" en lemosin.

Mercés plan.

  • 0
  • 0
Guilhèm Thomas Tolosa
2.

#1 L'article de la Setmana sus Yara e Air Liquide o mostrèt plan tanben.

  • 1
  • 0
Felip Martel Montpelhier
1.

Amb aqueu tipe d'eveniment, se vei clarament çò qu'es vertadierament l'estatut de las PME dins aqueu païs. Ni per los coblets lirics sus "l'entrepresa", "totes entrepreneires", e tot aquò, la realitat es que bona part, senon la majoritat de las PME son en fach presonieras de lors donaires d'òrdre, las grandas entrepresas, e qu'a la limita, lor chadrè benlèu un jorn capir qu'an mai d'interesses comuns amb lors salariats que non pas amb los grands matadors dau MEDEF, lors salaris a detz chifras e lors bonus proporcionats. Dins lo Jura, l'i avia agut aquela entrepresa de lunetaria plantaa per LVMH, aüra avèm doas grandas firmas automobilas "francesas" que decidan de tuar una entrepresa dins una region ja sinistraa. Aquelos que sabon, los "economistas", los "jornalistas economics", los politicians "realistas" e socio-liberaus nos van explicar qu'aquò es la vita, las leis d'aram de l'economia… Los obriers, bé, que se despatolhen. Benlèu lo novèu president farè quauque ren. Mai probablament, explicarè que pòt pas ren far.

  • 9
  • 0

Escriu un comentari sus aqueste article