Bandièra01 1180x150: Comuna de Tolosa

Actualitats

Polemica per l’incorporacion d’una torera sus las listas electoralas de Macron

La nominacion de Marie Sara per la 2a circonscripcion de Gard (Costièra de Nimes) a provocat de criticas contra lo president per aver causit una persona que “tortura” e “executa” d’animals

| Change.org
L’incorporacion de Marie Sara, una celèbra torera nimesenca, sus las listas del partit de Macron per las eleccions legislativas a levat la polemica. Sara es cap de lista de la 2a circonscripcion de Gard (aperaquí la Costièra de Nimes), qu’es una de las doas unicas circonscripcions qu’ara son a las mans del Front Nacional. De fach, segon Marie Sara, foguèt lo quite Macron que li demandèt d’intrar en politica per “defendre lei valors dau territòri e combatre la sorniera dau Frònt Nacionau”.
 
La nominacion de la torera a provocat las protèstas dels animalistas qu’an criticat Macron d’aver mes sus una lista una persona que “tortura” e “executa” d’animals. Dins un article fòrça dur publicat dins Libération, lo jornalista Aymeric Caron explica al nòu president francés çò qu’es la corrida:
 
“Alavetz, agachatz tornarmai d’imatges de corrida, se o avètz pas jamai fach. Observatz la lança del picador que talha los ligaments de la nuca per que l’animal baisse lo cap, aquela lança qu’insistís e que torna. Vejatz las banderilhas coloradas que contunhan l’obratge en esquinçant la carn. L’animal agoniza dins l’incompreneson de çò que patís, mentre que lo public exulta. Al bot d’un tròp long quart d’ora, l’espasa s’enfonza puèi entre las espatlas del supliciat, plusors còps se necessari, e un ponhal dins lo crani l’acaba se refusa de morir. Sembla qu’aquò es d’art, una metafòra de la mòrt, lo combat de l’òme contra sa pròpria animalitat, o una craca del genre.”
 
Enfin, dins l’article, Caron exigís una substitucion de la candidata, “es encara temps de la remplaçar”, çò precisa en assegurant que “de milions de franceses espèran un tal gèst” del president.
 
“La corrida serà abolida un jorn. Saique seretz pas vos lo president que se’n poirà enorgulhir. Mas siatz pas, almens, lo que l’aurà tornada metre al lum”, çò conclutz.
 
En mai d’aquò, s’es lançada una peticion en linha sus Change.org contra l’investidura de la torera.
 
Nascuda dins la region de París amb lo nom de Marie Leconte Bourseiller, Marie Sara venguèt una afogada de la corrida a 16 ans, e desvolopèt sa carrièra de torera a Nimes a partir de 1991.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pascau
7.

#6 Bonas novèlas, aquò! Mercés!

  • 1
  • 0
Piroet
6.

#1 Sus Catalonha Nòrd cal nuançar. Dempuèi dos ans i a pas pus de corridas a Cotlliure. Demòra pas que Ceret e Millars. E la feria de Millars es a pèrdre de succès pauc a cha pauc. Sens lo Borquin se pòt que la "tarde" de novilhada dure pas gaire.

  • 3
  • 0
Francesc Palma
5.

Acò rai, que ninguen la voti . S'ha de votar pas als torturadors e torturadoras.

  • 5
  • 0
Pascau
4.

#1 Mèma los Nadau que jògan en totas las "ferias", la societat Pernod-Ricard que promòu en mème temps la corrida e ua identitat "du Sud"... be cranhi qu'ajas rason.

çò qui poderé cambiar las causas e las mentalitats qu'ei de har pression sus l'Euròpa tà qu'arreste de subvencionar la corrida : qu'ei ua industria qui viu "devath perfusion", coma plan d'autas.

  • 13
  • 0
Felip Martel Montpelhier
3.

Bon, lo casting dels candidats En marche...Lo solet ponch positiu es que per se batre contra lo FN Collard, aver la practica de correr darrier de gròs buòus li pòt ajuar.

  • 17
  • 11

Escriu un comentari sus aqueste article