Bandièra01 1180x150: Comuna de Tolosa

Actualitats

Ua setmana d’immersion a Vilanuèva d’Òlt

Bernat Vernhièras guida una classa d’occitan lengadocian
Bernat Vernhièras guida una classa d’occitan lengadocian | EOE 2016

Despuish 43 ans, l’Escòla Occitana d’Estiu que permet a ahuecats de la lenga nosta d’estar en immersion pendent ua setmana entà apregondir las lors coneishenças. Vaduda ua institucion, lo nombre d’estagiaris a l’escòla d’Òlt e Garona non dèisha d’aumentar dab las annadas.


L’Escòla Occitana d’Estiu (EOE) qu’estó apitada en 1976 per tres occitanistas: Marcèu Esquieu, Crestian Rapin e Joan Rigouste. Despuish 2009, l’associacion qu’ei vaduda la seccion departamentau de l’Institut d’Estudis Occitans. Qu’organiza cors de lenga nosta taus adultes en Òlt e Garona (Agen, Cocumont, Marmanda...). L’associacion que ven dens la soa botiga de Vilanuèva d’Òlt libes dab lo diccionari francés/occitan de Cristian Rapin e lo Lexic Tot en Un occitan/francés e francés/occitan de Joan-Claudi Sèrras, CD dab los darrèrs albums de Vox Bigerri, la Talvera o Du Bartàs e DVD com Lo Gruffalò e Kerity, l’Ostal dels contes. L’EOE/IEO qu’ei tanben un centre de ressorsas documentàrias. Que podetz tornar trobar documents àudio e escriuts estudiats pendent estagis d’ivèrn o d’estiu: arreviradas, arreproèrs, cantas e tèxtes de conferéncias. Mes l’associacion qu’ei vaduda ua institucion dab l’eveniment que perpausa cada annada despuish 43 ans: la soa Escòla Occitana d’Estiu.
 
Que s’engatja a ensenhar la lenga e a desvolopar la soa utilizacion dab estagis, conferéncias, projeccions de filmes e talhèrs pendent ua setmana au mes d’agost. Los mainatges de 5 a 9 ans que son pres en carga cada dia a “L’escoleta d’estiu” e los joens de 10 a 16 ans a “L’escòl’ados”. Atau, los dròlles que s’amusan e qu’aprenen capvath activitats manuaus, artisticas, ludicas e esportivas. Los joens qu’averàn talhèrs a l’entorn deu vidèo. Que realizaràn un filmòt sus la basa d’un scenari e un filme d’animacion dab ustilhs numerics. Las lors creacions que seràn presentadas a la serada deus estagiaris lo dijaus de ser. Lhèu tà ua possibla difusion sus ua webtèle occitana (dab l’acòrd de las familhas plan segur)? L’EOE qu’i sosca.
 
Patrici Gentié que hè partida deus organizaires de l’Escòla despuish un vintenat d’annadas. Que participè a la purmèra edicion mes “sonque tà véder los espectacles”, abans de s’inscríver tà seguir cors. “Tà la 43au edicion, que i a tostemps la partida classica, l’escòla, conferéncias e divèrs talhèrs mei que mei sus la toponimia mes tanben sus la cultura e la lenga catalanas, çò’nse digó. Que i a ua delegacion deu CAÒC (Cercle d’Agermanament Occitano-Català) qui perpausa cada annada un talhèr. La serada deu divés de ser que’s ditz d’aulhors “serada occitanocatalana”, pr’amor que mian un grop”.
 
Taus adultes, cada dia, cors de lenga de tres dialèctes (lengadocian, gascon e lemosin). “Qu’avèvam a ua epòca un talhèr interdialectau qui permetèva a monde de confrontar lo lor dialècte e de parlar amassa e atau facilitar l’intercompreneson deus dialèctes, çò digó Patrici Gentié, mes que l’avem estancat pr’amor qu’avèvan l’escadença d’escambiar en dehòra deu cors”.
 
Talhèrs que seràn perpausats lo vrèspe e los estagiaris qu’averàn la causida enter divèrs tèmas com ua iniciacion a la toponimia, conversacion “escotar e tornar díser”, lo conde, la literatura orau, los mites, la descobèrta deu país “dens las peadas de l’istòria”, etc.
 
Que poderatz causir enter divèrs tèmas de conferéncias cada dia, dus a tres proposicions sus l’actualitat, la literatura o enqüèra l’istòria. Cada ser, ua animacion musicau qu’ei perpausada. Augan, Jean-Marc Leclercq que jogarà lo 14 d’agost lo son espectacle “A cappelloop”. Shens nat instrument, sonque la soa votz e clacats de las soas mans e dits, e ritme a la boca, que auhereish composicions e sons loopings vocaus pendent ua serada pleada de poesia. Camille en Bal e Bric a Drac que seràn cargats de har bolegar los aprenents los autes sers! Dimèrcs 16 d’agost, lo documentari Era Hèsta deth Pòrc de l’Ostau Comengés que serà projectat au licèu de la vila. Lo filme que serà seguit d’escambis e d’un bal.
 
En mejana, l’Escòla Occitana d’Estiu qu’arcuelh enter 120 e 150 estagiaris la setmana. Que son nombrós los qui tornan d’ua annada a l’auta tà complir lo lor nivèu d’occitan. “Que coneishi ua gojata de 25 ans qui despuish l’atge de 6 ans n’a pas mancat mei d’ua o duas Escòlas Occitanas d’Estiu. E los sons pairs ne son quitament pas dens lo mitan o dens l’associacion! (arríders)”, çò’nse hidè Patrici.
 
L’ajust de dus estagis especializats qu’auré interessat drin mei de monde segon los organizaires: la canta tradicionau e la formacion aus Temps d’Activitats Periescolaras (TAP). Los diluns e dimars, un cors de canta tradicionau a dança qu’ei d’ara enlà animat per Pèire Boissière. Compositor, condaire e formator en canta, Sénher Boissière qu’ei vadut ua referéncia en matièra de canta d’inspiracion tradicionau en Occitània. Qu’estó format dab cantaires e cantairas qu’encontrè mercés a enquèstas a comptar de 1975 en Auvèrnhe o enqüèra en Gasconha. Uei lo dia, que canta tradicionau a dança mes tanben musica deus trobadors, catalanas e deus poètas de lenga d’òc que hiquè en musica. Los dimèrcs, dijaus e divés de la setmana de l’EOE, ua formacion que serà dispensats taus animators de TAP entà’us balhar los elements e poder assegurar ua iniciacion a la lenga e a la cultura occitanas dens las escòlas.
 
 
 
 
Fanny Lartigot
 
Inf.: Escòla Occitana d’Estiu, 16 carrièra de Pujols - 47300 Vilanuèva d’Òlt
www.eoe-oc.org, Tel.: +33(0)5 53 41 32 43; eoe(a)wanadoo.fr
 
 
 
Aqueste article es estat publicat dins La Setmana, amb qui Jornalet ten un acòrdi de cooperacion.
 

 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc Palma
12.

Hi som estat fa mai de vint ans, un record per pas oblidar.

  • 1
  • 0
z
11.

#10 L'espèr fa viure.

  • 0
  • 3
T.
10.

Occitània es un sièti :
. d'un costat los de l'artilheria gròssa que bombardan cada jorn, tota la santa jornada, shens ces ni pausa.
. de l'aute costat , los assietjats que se defenden com pòden , damb cotèths, coteràs pèiras , artilheria pichona a còps.
700 annadas que lo sièti se perlonga .
N'es pas un prat batalhèir , un contra un , on se poiré héser au cintèir , leiaument o quitament un David contra un Goliath.
Adara los poderos arroinan las muralhas, los putz , los an emposoats e assecats , lo minjar manca ... Los assiejats sont magres, secalhs com carassons. ahamiats, la set los crama .
Çò de curiós es que demòran de cabonhàs ,de capborruts que NE VÒLEN PAS PLEGAR !

  • 5
  • 0
nom
9.

"dels problèmes de l'occitanisme es de pas aver pogut convéncer los Occitans" e es totjorn lo problèma mager.
Lo problèma mager es a dos nivèls, tornar fa parlar los que coneisson la lenga... mas ambe qual ?
Balhar lo gost d'aprener la lenga als occitans desoccitanizats.

L'occitanisme a fa mèca..... a-n-aqueles dos nivèls ...

La question es per de qué ? E aqui cal arrestar d'anar recaçar lo per de qué ençò dels autres, amai s'an una responsabilitat, la primièra responsabilitat es la dels occitanistes...

  • 1
  • 3
Lo raiòu Cevenas
8.

#7 Avètz rason dinc totes los detalhs de vòstre comentari. Malerosament per nautres...

  • 25
  • 0

Escriu un comentari sus aqueste article