Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasNarbonés

Ciutadans, al Forum!

La Dintrada ven un forum de discussions, de reflexions, d’alargament de las tematicas a l’entorn de l’occitan

L’occitanisme es arribat als quatre camins. Es per aquela rason que fasèm evolucionar “la Dintrada” devèrs un vertadièr forum ciutadan occitan dobèrt a totas las sensibilitats de l’occitanisme. Aquel eveniment tractarà de las tres problematicas seguentas:
 
— Primièr, la causida dels estajants de Miegjorn-Pirenèus e de Lengadòc-Rosselhon de batejar la granda e novèla region “Occitanie”. Aquesta irrupcion imprevista e impensada d’una region “Occitanie” apèla una revision del logicial de las associacions e movements occitans.
 
— D’autre caire, la plaça de mai en mai bèla del numeric e d’Internet  impacta fòrça lo biais de viure sa cultura, las relacions professionalas e tanben socialas. Plan conscients d’aquesta evolucion, cèrts operators (ÒcTele, Lo Cirdòc, Lo Congrès…) trabalhan a refortir la preséncia de la lenga e de la cultura occitanas sus aqueles espandis nòus. Mas aquò es pro? E lo numeric pòt remplaçar los escambis tradicionals?
 
— Enfin, un autre factor ven transformar las regions occitanas: la demografia. D’efièch, lo nombre d’estajants de las regions nòstras quita pas de créisser. La principala rason d’aquel espandiment demografic es l’arribada regulara e importanta de personas eissidas del nòrd de França, e tanben d’autres païses. La marginalizacion institucionala de l’occitan lo condemna a desaparéisser. Pr’aquò, los qu’arriban an de còps mai d’interès que los occitans per la “lenga nòstra”! Cossí transmetre nòstra cultura? Occitània es a mand de venir multiculturala? O es ja?
 
Aquí los problèmas que se pausan e que los occitans devon afrontar se vòlon pas passar a la trapa de l’istòria! Es aital qu’avèm fach evolucionar lo concèpte de “la Dintrada” qu’èra abans una universitat politica. Me sembla uèi indispensable de s’adreiçar a la generacion novèla d’occitans e de lor prepausar un luòc e un temps per enfaciar lor avenidor!
 
La Dintrada ven doncas un forum de discussions, de reflexions, d’alargament de las tematicas a l’entorn de l’occitan. Tot un cadun se deu sentir lo bennvengut per aquel rendètz-vos que se vòl pedagogic, de bon abordar, e ont totòm aurà la possibilitat de s’exprimir mercés a d’obradors en pichons grops.
 
La causida de metre la Dintrada al Palais del Trabalh de Narbona es pas un azard: idealament plaçada entre Tolosa e Montpelhièr, a tres minutas de la gara, la venguda de totas es aital facilitada. De notar enfin que l’inscripcion se fa a gratis, e qu’un repais serà prepausat (pagant) a miegjorn a l’Ostal d’Occitània mercés a un partenariat amb Convergéncia Narbonesa.
 
Per aver totas las entresenhas suls intervenents, l’accès, o encara vos inscriure, vos cal agachar sus: ladintrada.eu.
 
 
 
 Uc Jourde
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Enric Mala Tèsta
5.

Occitania es a mand de venir multiculturala ? O es ja ? E ont vivètz ? Occitania es ja monoculturala francesa, despuèi al mens 50 ans… Per ara, ne sèm a ensajar, coma d'estrangièrs exiliats dins un paíd lonhdan, a far valer qu'existissèm coma minoritat exotica. Aquí ne sèm…

  • 9
  • 1
Lo raiòu Cevenas
4.

La resulta d'aquel espandiment demografic dona d'èr a colonizacion e fai sentir lo fach viugut coma una colonizacion. Aquí ce que pense personalament. Per de qué ? Perque nòstra lenga e nòstra cultura son estadas minorizadas e atacadas per la Republica mès tanben delaissadas per de classas socialas socitosas de lurs enterès e de lur prestigi per las unas, socitosas de lur sobrevida e de lur dignitat per las autras. Ajustatz los reflèsses enconscients de copiatge dau modèle pus present sus lo territòri e los complèsses menant au retipatge dau modèle dominant e mediatizat, semblaretz encara mai que sètz colonizats per los nombrós Autres. Totes los marcaires de nòstra identitat saguèsson fòrts, assumits, vesibles e ausibles, nòstre sentiment de colonizacion sariá laugieiret e los nombrós Autres sariáun pas una menaça per nautres, que automaticament aqueles Autres s'assatariáun d'espereles a la predomiança identitària que trovariáun sus plaça.
A l'arrivar, atrapan pas que lenga francesa cantarèla e accent franchimand engaunhat o d'origina : un no man's land occitan finalament ! Vivèm pas que las consequenças dals comportaments d'aqueles que nos an precedits emb dau pes de lurs decisions sus los comportaments actuaus. Vejaicí per de qué avèm totes la responsabilitat de ce que nos es trasmés e que manlevam a las generacions que venon.

E pièi, la... "colonizacion", ieu i crese mens qu'avans. Sustot quand vese los elegits locaus liberar sens vergonha despièi las annadas 60-70 tant de tèrras lauradissas per betonar tant e mai. E sustot quand vese la generacion "baby-boom" que vendon lur patrimòni familhau a tròç per faire mai de sòus.
Ven un moment que fau saupre ce que volèm. Podèm pas de lònga parar la man per faire pacha e aissejar a la fin còntra aquel que voliá pas forçadament nos encromir.
O dison pro los còntes tradicionaus : demandar d'ajuda per provesir sos enterès materiaus o egoïstas es pas jamai a gratis. Es aquí lo diable que ròda, esperant que li bailetz vòstra anma ! Es aquò, voldre los sòus amai los pòrcs. Mès quant d'occitans consentisson d'o enfaçar ce que denóncie quí ?

  • 13
  • 0
francesc palma
3.

Es una bona causa de parlar sus aquestas causas. La tv terrestra es lo mai important, la region Occitània e lo País Catalan han de far una tv; calen pas molts de diners, e emetre per contactar amb lo gran public, las novas, los comunicats per far fargar l'anima occitana, las costums, la cultura, la pensada plítica, la creacion artistica, la cusina, lo rubbi, lo futbol,...tot.

  • 4
  • 0
Terric Lausa Quilhan
2.

"la rason d’aquel espandiment demografic es l’arribada regulara e importanta de personas eissidas del nòrd de França, e tanben d’autres païses"

> del "nòrd" de França? Non. Arriban de França tot simplament per una rason tota simpla: Occitània es pas França. E òc, arriban de França dins l'encastre de çò que s'apèla la colonizacion demografica

  • 17
  • 1
Nom
1.

1- la causida del luòc e las explicas me fan riser : :-)

2- Internet segur es un novèl mejan de comunicacion, remplaçarà lo sistemp relacional tradicional : espèri pas !
L'occitan deu èsser sul malhum per contre çò que me sembla lo mai tener pressa es l'aelhoracion dels sits actuals (parli pas per jornalet, nimai los sits emblematics) e la melhorença es a dos nivèls :
a- lo contengut (diser la meteissa s causas ambe variantas pichonas servís pas a ren)
b- lo design

3- la questions qu'an trach a cossi, per dequé l'occitanisme atreva recampa pas mai de mond me sembla èsser doblidada

4-La question de la socializacion de l'occitan me sembla tanben doblidada.

Clavarai per una remarca generale : dins totis los sistems, organizacions, associacions, se troba un rastel dels servicis, de las fonccions. Per l'occitanisme ai pas trobat un quicòm d'atal.

E clavarai de clavar en me desencusent d'entantinar lo monde, d'aver totjorn de remarcas destimborladas e en me desencusent un còp mai de pas poder èsser a-n-aquel forum occitaniste, vist que sarai en vacanças ... luenc de vos mas prèp pel còr coma ça disia "Silig Tutung" del costat de tcha-tchéou a la sia plan aimada nebòda.

  • 6
  • 1

Escriu un comentari sus aqueste article