Bandièra01 1180x150: Comuna de Tolosa

Actualitats

Una atraccion toristica per tuar de “terroristas palestinians”

Lo sit, en Cisjordania, prepausa de viure a la primièra persona una accion terrorista, per que lo torista pòsca aprene de primièra man cossí agís l’armada israeliana

Una societat israeliana nomenada Calibre 3 prepausa una atraccion toristica per “tuar de terroristas palestinians”, çò rapòrta Television de Catalonha. La societat, qu’es tanben una acadèmia militara, a transformat un camp militar dins los territòris ocupats de Cisjordania en pargue tematic. Atal, lo conflicte de l’estat d’Israèl amb lo pòble palestinian es vengut un afar toristic.
 
Lo sit prepausa de viure a la primièra persona una accion terrorista, per que lo torista pòsca aprene de primièra man cossí agís l’armada israeliana. I a tot plen de reconstitucions en dirècte, realizadas per de soldats. Cada an i passan aperaquí 20 000 toristas eissits sustot d’Euròpa, de l’America latina, de Russia, de China, e fòrça josieus estatsunidencs. Los toristas pagan 115 dolars per participar a l’atraccion e vivon, durant doas oras, la reconstitucion d’un atemptat kamikaze dins un mercat de Jerusalèm e puèi una ataca amb de cotèls.
 
Los toristas recebon un cors exprès per aprene a tirar amb d’armas de fuòc e aprenon de nocions basicas de “krav maga”, l’art marciala de las fòrças de seguretat israelianas.
 
Lo sit es recomandat amb cinc estelas per Tripadvisor, ont los comentaris soslinhan que fòrça menors se i son amusats en participant a aquelas activitats.
 
 
“O auriá somiat un josieu a Auschwitz”
 
Lo fondador e director del sit, Sharon Gat, explica al jornan israelian Haaretz que per el es important que los clients sàpian perqué transformèt l’acadèmia militara en sit toristic. “Me demandèri s’un josieu dins lo camp d’Auschwitz auriá agut pogut somiar qu’una acadèmia d’aquela sòrta existiriá en Israèl e que formariá de membres de l’armada alemanda [...], puèi me diguèri de dobrir aqueste sit al public per mostrar lo camin qu’a fach lo pòble josieu dins los darrièrs 75 ans”.
 
 
Indignacion en çò dels palestinians
 
L’emplaçament d’aquel sit dins los territòris ocupats a indignat los palestinians, mai que mai los de las vilas pròchas. Tanben de grops d’activistas an condemnat aquelas activitats; considèran qu’es de cinisme de profechar del conflicte entre Palestina e l’estat d’Israèl per ganhar d’argent.
 
Totun, segon lo jornan israelian Haaretz, l’afar se pòrta plan e l’idèa s’estend endacòm mai en Israèl.
 
 

 

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

E Passa Que T Ai Vist Lo Clapàs (Montpelhièr)
5.

Dempuèi que l'òme es òme, es totjorn espantant de veire amb quina facilitat la victima d'ièr pòt se mudar en borrèl d'uèi, en tota bona consciènça.

  • 13
  • 0
Lo raiòu Cevenas
4.

Vergonhassa ! Aquò's pas un jòc ni un mercat la violença ! N'i a pas pro coma aquò ?! Vergonhassa !

  • 11
  • 0
francesc palma
3.

Los fachistas israelians son tan fachas coma los italians, los nazis, o de qualsevol país del mond.

  • 11
  • 0
Aaaron Blumenfeld Tel Aviv
2.

La Shoah comme excuse et prétexte éternel à toutes les vilenies d'Israël et des sionistes. Attention Jornalet, vous allez être repérés comme antisémites !

  • 4
  • 12
Enric Mala Tèsta
1.

O auriá somiat un josieu a Auschwitz ? A Auschwitz, probablament los preisonièrs aurián somniat del mejan d'erradicar de crebaduras tals coma los conceptor d'una orror coma aquesta.

  • 10
  • 0

Escriu un comentari sus aqueste article