Bandièra01 1180x150: Comuna de Tolosa

Actualitats

Lo Lis: las economias de Macron precarizan la Calandreta que risca de desparéisser

La supression dels contractes ajudats an menat l’escòla occitanofòna a una situacion desesperanta. La còla de la Calandreta s’apèla al prefècte del departament

| Calandreta deu Lis
La rintrada arriba al mièg del desespèr per la Calandeta del Lis (Vath d’Aussau), après que l’administracion francesa a decidit la supression dels contractes d’acompanhament dins l’emplec CAE-CUI. Aquela decision obliga l’escòla de suspendre la gardariá de fin de jorn per manténer la del matin e poder respondre almens als besonhs urgents dels parents que trabalhan. En consequéncia, la regenta de mairala se tròba de vèspre sens nada ajuda. Cal prene en compte que dins las zònas ruralas, los desplaçaments dels parents son de costuma longs.
 
Segon un comunicat mandat per la Calandreta del Lis, se “la situacion e demorèsse atau, lo dusau contracte non seré pas arrenovelat tanpòc au mes de genèr e la Calandreta deu Lis que seré dens l’impossibilitat de foncionar”. E mentre que se prèga per un melhorament, la precarizacion dels emplegats de l’escòla occitanofòna d’Aussau es a aumentar.
 
Lo govèrn francés anoncièt aqueste estiu la supression dels contractes CAE-CUI, d’ajudas a l’emplec que fins ara an permés de far foncionar la Calandreta del Lis. Los dos contractes que ne beneficiava aquela escòla se devián renovelar, un en agost de 2017 e l’autre en genièr de 2018. Mas Pòl Emplec los assabentèt del refús de renovelament d’un dels contractes lo 30 d’agost passat, quatre jorns abans la rintrada.
 
Ara la còla de la Calandreta s’apèla al prefècte del departament “tà que hàcia beneficiar la nosta escòla, e totas las qui n’an hrèita, de las derogacions per l’educacion previstas per la dauna ministra deu tribalh e que sian atau mantienguts los contractes CAE-CUI tà perméter un foncionament corrècte aus nostes establiments”.
 
La Calandreta del Lis comencèt de foncionar en 2002, en prenent la seguida de l’escòla publica que foguèt barrada pel ministèri francés de l’educacion dicha nacionala. Alara, la comuna contactèt la Federacion Departamentala de las Escòlas Calandreta per demorar pas sens nada escòla.
 
Las escòlas Calandreta son d’escòlas associativas laïcas gratuitas qu’asseguran una mission de servici public d’ensenhament de l’occitan, en contracte amb l’administracion francesa.
 
 

 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

La cultura per la dreta es una nosa, e per l'extrema dreta crema los libres e treu las pistolas.

  • 0
  • 0
Ernest Guevara Jr.
1.

Las econimias ultraliberala (del Macron e de qualque autre rascle que siá) o precarizan tot a despart dels revenguts faraonics de la finançalha internacionala !

  • 10
  • 3

Escriu un comentari sus aqueste article