S'es fach public lo resultat oficial del referendum d’independéncia del Curdistan meridional, que la victòria de l’“òc” es assegurada de longa tòca: 92,73%. Totun, la donada mai estrambordanta es la participacion, qu’es arribada al 78%. Una chifra fòrça nauta, mai que mai, se prenèm en compte l’oposicion de las autoritats iraquianas, iranianas e turcas sus aquel vòte, e que lo secretari general de l’ÒNU a dich que pòt destabilizar la region. La jornada se debanèt sens nat incident.
 


 
La seguida
 
Lo resultat es pas constrenhent. Ara cal far d’eleccions parlamentàrias e la cambra deurà aprovar de leis que permetan de ratificar lo resultat del vòte. Segon lo president del govèrn sud-curd, Mesûd Barzanî, la declaracion d’independéncia deuriá arribar abans doas ans.
 
 
De menaças
 
La jornada del vòte se tenguèt pacificament e sens incidents, Mas l’estat central, Iraq, jutja que la votacion es illegala, e Turquia e Iran  —amb de milions de curds dins lors pròprias frontièras—se i opausan. Tanben Washington —aliat principal del govèrn autonòm curd— refusava la votacion, e mai en aquel cas s’ofrisca per facultar una mediacion entre Erbil e Bagdad que pòsca menar a un referendum pachat a una data posteriora. Dijòus passat, Ankara, Teheran e Bagdad anoncièron de “contramesuras” se lo referendum fin finala aviá luòc.
 
 
De represalhas
 
Lo president de Turquia, Recep Tayyip Erdoğan, a anonciat lo barrament de la frontièra coma represalha al referendum. Avertís que son país poiriá quitament blocar las exportacions de petròli del Curditan meridional. "Avèm la valvula. Se la barram, aquela question s'acaba", çò a dich Erdoğan a respècte de l’oleoducte que mena lo petròli que Curdistan expòrta devèrs Euròpa.
 
De son costat, lo govèrn iranian avertís qu’a tanben barrat sas frontièras, tan terrèstras coma aerianas, amb lo Curdistan meridional, una mesura adoptada “a la demanda del govèrn iraquian”, segon un pòrtavotz dels afars exteriors de l'executiu de Teheran.