Bandièra01 1180x150: Comuna de Tolosa

Actualitats

“La Dintrada” a reüssit a renovelar lo discors e lo “personal” occitanistas

Bilanç del Forum Ciutadan Occitan de setembre 2017

Lo forum ciutadan occitan “La Dintrada” se debanèt a Narbona lo 16 de setembre.  La jornada se debanèt fòrt plan e 80 personas assistiguèron a las diferentas taulas redondas e debats.
 
Un dels objectius èra de renovelar lo discors e lo “personal” occitanistas: lo public aguèt lo plaser d’escotar de personas novèlas qu’avián de causas importantas de dire. Per un còp las femnas èran majoritarias dins las presas de paraula, es pas sovent que se vei aquò dins los encontres occitans! La causida èra tanben de partir de testimoniatges concrets, professionals o personals, qu’ancorèron los debats dins la realitat. Aguèrem tanben d’apòrts scientifics de la part d’universitaris que saupèron definir los mots, los concèptes, que portèron d’exemples venguts d’autres païses, e qu’ajudèron a melhor comprene los enjòcs.
 
La dimension participativa èra tanben una tòca d’aquel encontre. Aquí lo bilanç es mai nuançat. Foguèt una bona capitada lo matin amb d’escambis rics sus la tematica “Occitània multiculturala?” seguits per un pichon trabalh per grops de tres personas. De papieròts mirgalhats floriguèron sul panèl previst per aquò, amb de proposicions: çò que cal melhorar, çò que cal arrestar, çò que cal inventar! 
 
Per contra, de ser, se passèt pas aital. La rason màger es la manca de temps: lo debat suls “Enjòcs del numeric” se deguèt arrestar a 16h, per daissar de temps a la tresena tematica. Los obradors previstes se poguèron pas téner, mentre que mai d’un participant esperava aquò… damatge!
 
Lo tresen debat “Region ‘Occitanie’, que fasèm?” prometiá d’esser lo mai caud.. e foguèt efectivament lo mai passionat! Las intervencions un pauc mai longas que previst, daissèron pauc de temps al public per s’exprimir, alara que justament, lo mond dins la sala trepejavan e cremavan d’enveja de far saber lor posicion!
 
Se l’eveniment en se es important, la tòca es tanben de noirir la reflexion occitanista al delà d’aquela polida jornada. Totas las presas de paraula son estadas enregistradas, e de contribucions escrichas son tanben estadas culhidas. Faràn l’objecte d’una publicacion dins los meses avenidors. Mas podèm sens esperar dobrir qualques dralhas:
 
Lo tresen debat sul nom de la region lengadociana mostrèt clarament la manca de reflexion de l’occitanisme sus una organizacion politica del país. Fòrça preocupats a refortir e afirmar l’unitat de la lenga occitana, los occitanistas an pas elaborat de projècte clar e sustot consensual d’organizacion territoriala. Lo debat del matin, e en particular la cercaira Sabine Choquet, insistiguèt sus l’ancoratge territorial per metre en plaça una politica lingüistica amb l’exemple de Soïssa o de Canadà… Al delà de las batèstas sul nom de las regions, fa ara besonh de soscar a una revendicacion territoriala apevada sus la lenga e sas variantas, e tanben de prene en compte las constrenchas e las dinamicas territorialas, economicas e socialas.
 
“Internet es una revolucion, tan bèla coma la revolucion del Neolitic”, çò expliquèt Benjamin Assié, director del CIRDÒC. Tot lo mond foguèron d’acòrdi per dire que lo “big data” esperava pas los occitans per se metre en plaça! Aicí es clarament la manca de “productivitat” en matèria culturala qu’es estada mesa en evidéncia. Per accedir a una visibilitat minimala (per exemple esser reconeguts per Google) caldriá de milierats de paginas en occitan. La produccion audiovisuala es tanben flaca, tant coma la Wikipèdia en òc, etc. Doncas apèl a la mobilizacion generala: escrivètz, parlatz, filmatz, e sustot acceptatz de partejar!
 
La còla de l’ADEO qu’organiza La Dintrada amb l’ajuda de Convergéncia Narbonesa, vos anóncia son intencion d’organizar una edicion 2018 del forum dins lo meteis esperit!
 
 
 
 
Uc Jourde
 
 
            
        
    
fffff fffff
 Las chifras

80 participants;
13 intervenents: 7 femnas e 6 òmes ;
6 jornalistas animators;
10 benevòls;
1 salariat de mièg temps ;
2 500 vistas sus Facebook ;
15 000 vistas sus Twitter
 
   

 
La Dintrada sus la television de Barcelona


 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mèfi! 31
6.

Sembla l'acamp d'un microcòsme simpatic, mès ont es la societat civila, la que viu dins la vida veraia?
De véser las conclusions...

  • 5
  • 1
Lafontan
5.

#4 Me sembla que la "Dintrada" preten pas èsser lo sol eveniment de l'annada. Urosament avèm un fum d'associacions e de moviments occitanistas que trabalhan de longa tot l'an e tanben maites eveniments. Podètz per ex junher lo laboratòri d'idèias e ostal d'edicion ADEO: http://www.adeo-oc.eu/

  • 2
  • 0
Lo raiòu Cevenas
4.

A l'an que ven ? A l'autom de 2018 solament ? Avèm lo temps de petafinar.
E ben, bòn astre per "La Sortida"... los pès davant ! E viva la tracidion occitana !

  • 4
  • 3
MC M
3.

#2 Òc. Emai sus dos ò tres jorns.

Mi sembla que l'a mejan aquí de far un eveniment que recampa l'occitanisme. Un pauc coma èra l'estivada a passat temps, emai en mièlhs.

Une mena de fête de l'Huma occitane, ont lo conviviau e lo politic s'entremesclan.

  • 4
  • 0
Lafontan
2.

Òsca per aquel forum ! Me sembla que seria interessant per l'an que ven de lo dobrir a de questions pertocant la joventut e de lor far de mai en mai de plaça...Benlèu doas jornadas per aprigondir e un moment festiu a la serada e La Dintrada vendrà lèu un eveniment incontornable per l'occitanisme e Occitània en general...

  • 4
  • 0

Escriu un comentari sus aqueste article