Era associacion Eth Ostau Comengés qu’é plan coneguda pr’amor deth sòn trebalh de cuelhuda e de transmission deth patrimòni culturau immateriau de Varossa, de Comenge e de Coserans. Que huc atau convidada eth 30 de novembre pera Universitat de Lhèida (Catalonha) ara celebracion deth 2d anniversari deth classament deras hèstas deth huec deth solstici d’estiu deths Pirenèus ath patrimòni culturau immateriau dera umanitat. En aquera ocasion, davant universitaris, elijuts e organizaires de huecs de Sent Joan venguts d’Andòrra, de Catalonha e d’Occitània, Matiu Fauré que presentèc ua seleccion d’extrèts vidèo de practicas e de credenças tradicionalas cuelhudas peth Ostau Comengés sus eth tèma deth soltici d’estiu, en particular era preparacion e era cremacion deth halhar (aperat tanben har o haro). 
 
Ara primavera, ua delegacion deth Ostau Comengés qu’aviá dejà participat ath simpòsi de Reus (Catalonha) sus eras hèstas deth huec ena Mediterranèa. Era invitacion ara ceremònia deth 30 de novembre qu’é donc ua reconeishença suplementària deth trebalh de terren que mia era associacion nà cuélher de preciosis testimoniatges e saber-hèr sus Sent Joan e nà perméter naths abitants de tornà’s apropriar aqueth patrimòni. 
 
Eth Ostau Comengés qu’a atau previst diferentas animacions e activitats sus aqueth tèma pendent eth hestau Passa-Pòrts qu’organizarà en 2018. Eth 10 de març, ua caminada sus Eths camins de Sent Joan que serà organizada a Ponlat, ath costat de Montrejau. Eth 6 d’abriu, ua conferéncia seguida d’ua taula arredona que’s passarà ena sala deras hèstas de Montrejau sus eth tèma “Eths huecs de Sent Joan e UNÈSCO”, en preséncia d’especialistas de Comenge, dera Val d’Aran, de Pallars Sobirà e dera Universitat de Pau e, eth endeman, qu’é previst un estagi de fabricacion de halhòts, halhars portatius qu’alugan en halhar principau e que hèn tornejar pera net de Sent Joan.