Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcAlbigésCaunés

La Salvetat d'Agot: una comunautat faissista gangrena la vila

A l’entorn de 14 000 signataris sus Change.org demandan a l'estat e a la Miviludes qu’arrèsten “la propaganda racista, antisemita e omofòba del grop ultradrechista Les Brigandes”

| Fagairolles34
Un grop d’abitants de la Salvetat d’Agot (Caunés) es ara victima de menaças, insults e intimidacions après qu’an reagit contra una comunautat ultradrechista que s’i es installada dempuèi 2015. An un grop de musica dobèrtament xenofòb apelat Les Brigandes ont de gojatas que —en tot presicar çò que nomenan “lo grand remplaçament”— publican de cançons racistas e de vidèos ont fan de saludacions nazis, e quitament i participan d’enfants amb las caras descobèrtas.
 
A l’entorn de 14 000 signataris sus Change.org demandan al procuraire de la Republica, al prefècte e quitament a la Miviludes (Mission Interministeriala de Vigilància e de Lucha contra las Derivas Sectàrias) qu’arrèsten “la propaganda racista, antisemita e omofòba del grop ultradrechista Les Brigandes”.
 
 
De menaças e intimidacions
 
Segon un reportatge que lo ven de publicar Europe 1, los abitants de la vila que s’opausan al grop faissista o pagan car. Entre intimidacions e menaças, Christophe Pourprix viu un infèrn. El abita davant la colònia que lòtja lo grop xenofòb e es el lo qu’a lançat la peticion sus Change.org. Se sent sol. “Sèm plan pauques. Se i deu aver una desena de signaturas d’abitants de la Salvetat sus la peticion. O las gents se’n foten, o an paur. O alara es que lors prepauses lor convenon fòrt plan...”. Pourprix se sent abandonat e desesperat: “Rescontrèrem lo cònsol fa un pauc mai d’un an, e nos respondèt que nos caliá lor vendre l’ostal. Puèi, i aguèt pas de seguida”.
 
Christophe Pourprix a prevengut la Miviludes mas espèra desenant una accion de l’estat per qu’aquel gropuscul siá perseguit per incitacion a l’òdi e que la comunautat siá dissòuta al pus lèu possible.
 
 
Un caval de Tròia
 
Arribèron a la Salvetat en mai de 2015. Èran de joves, notadament de gojatas e de filhas mascadas d’anti-Femen e ultracatolicas, vestidas de camisas blancas e solièrs envernissats. Faguèron lo plaser del cònsol màger que i vesiá una benediccion que fariá gardar la 4a classa de l’escòla e que portarián un novèl vam als comèrcis après la sason estivala. Foguèron aculhidas coma l’elèit musical e en contrapartida donavan de concèrts gratuits dins las tavèrnas de l’encontrada e anavan los dimenges legir de contes als vièlhs.
 
Lo grop s’èra infiltrat dins las associacions de la vila, dins la ràdio locala, dins los capmases, a l’escòla e quitament capitèron a logar un local gràcias a la comuna ont an installat un luòc de discussions e una librariá ont se pòt quitament crompar lo libre Mein kampf. En febrièr d’arunan Le Point desvelava la vertadièra identitat d’aquel grop.
 
Les Brigandes difusan qualques cançons sus Internet e an publicat cinc CD en autoproduccion jos de títols que mòstran lors tendéncias: Le Grand Remplacement, France Notre Terre, Foutez le camp, J’élucubre à Sion e On a le temps de rien.
 
 
Un grop sectari
 
Segon lo compte rendut del conselh municipal del 28 de setembre de 2016 de la Salvetat d’Agot, la prefectura del departament d’Erau identifica coma una sècta la comunautat que ne fan partida Les Brigandes. Joël Labruyere, un òme d’una trentena d’annadas que compausariá las cançons, es identificat coma lo goró de la sècta per la Miviludes. Son associacion Barka Productions amassa tres collectius, las cantadoras de Les Brigandes e dos autres diches Ultra Sixties e Les Salvetoises, un nom que pren lo gentilici del vilatge en francés.
 
 
Manipulan l’imne occitan
 
Enfin, cal soslinhar que Les Brigandes fan servir Se Canta, amb una pronóncia de còps aproximativa, coma introduccion d’una propaganda violentament antiestatsunidenca e implicitament nostalgica de l’Ocupacion nazi, dins lor videoclip “Comme on devient américain”.
 


 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Se cal unir amassar, non sa'n de daissar pas compissar. S' eles los fachas vesen qu' han una oposicion seriosa, se n'aniran del poble.

  • 0
  • 0
Joan Fotre
2.

Sembla que lo liam de la peticion fonccionèsse pas... Aquí-lo tornamai :

https://www.change.org/p/mr-le-procureur-de-la-r%C3%A9publique-stop-a-la-propagande-raciste-antisemite-et-homophobe-du-groupe-ultra-droite-des-brigandes-d7dbe503-318f-40ae-8a47-67e24a2bb16d?

  • 3
  • 1
Joan Fotre
1.

Sembla que lo liam de la peticion fonccionèsse pas... Aquí-lo tornamai :

https://www.change.org/p/mr-le-procureur-de-la-r%C3%A9publique-stop-a-la-propagande-raciste-antisemite-et-homophobe-du-groupe-ultra-droite-des-brigandes-d7dbe503-318f-40ae-8a47-67e24a2bb16d?recruiter=442448766&utm_source=share_petition&utm_medium=copylink&utm_campaign=share_petition

  • 1
  • 1

Escriu un comentari sus aqueste article