Bandièra01 1180x150: Comuna de Tolosa

Actualitats

crotz-tolosaCreated with Sketch.Lengadòc

Tolosa e Montpelhièr: an manifestat per l’occitan a la television

Lo Collectiu Occitan revendica d’emissions jornalièras en occitan dins la television publica

Doas manifestacions simultanèas se debanèron dissabte passat a Tolosa e a Montpelhièr per revendicar l’occitan cada jorn a la television, en seguissent la crida del Collectiu Occitan, qu’amassa un desenat de movements occitanistas dont Convergéncia Occitana, lo CRÈO, la Confederacion Calandreta, lo Partit Occitan, EELV Occitània, País Nòstre, lo Partit de la Nacion Occitana, Esquèrra Revolucionària Occitana, Bastir, Macarèl e l’Associacion Zou.
 
En seguida de la manifestacion que se tenguèt l’8 de novembre passat a Tolosa, aquesta segonda accion de protèsta revendica totjorn “l’occitan cada jorn a la television, es a dire a France 3”, e ansin lo Collectiu Occitan precisa  que “la mobilizacion es d’aitan mai necita que i a una ventolada de reduccions de crèdits a la television publica”. La revendicacion es neta e clara, s’exigís una “vertadièra television de país” amb de redaccions localas.
 
En mai d’aquò,  lo Collectiu Occitan tanben demanda un rescontre amb lo director regional de France 3 Occitanie. “Una cadena qu’a de redaccions dins las ciutats del territòri, que filma lo país, lo representa dins son quotidian, sa diversitat”, çò reclama lo collectiu del temps qu’assegura que l’occitan es essencial per una television melhora.
 
A Tolosa, l’acamp aguèt luòc sus la Plaça Roosevelt. Aquí, lo cantador Mans de Breish diguèt als jornalistas de La Dépêche que “la tele deu jogar egalament aquel ròtle e nos ajudar a transportar la nòstra identitat regionala”. Dins aquel sens, çò afirmèt l’emblematic musician, “los cantaires sèm aquí per acomplir aquel tasca, mas sola, la lenga dels trobadors risca de s’amortar un jorn. L’occitan es tanben la lenga de l’emocion, sufís de se remembrar la partida de cartas de Marcel Pagnol per la comprene, quitament los que la parlan pas se senton tocats per aquelas paraulas, per aquel accent”. A Montpelhièr, l’acamp se tenguèt sus la Plaça de la Comèdia.
 
 
De criticas de l’IEO
 
De son caire, l’Institut d’Estudis Occitans (IEO) a publicat un comunicat per criticar que las manifestacions sián “preparadas dins la confusion e la precipitacion”, e en precisant que l’IEO fasiá pas partida del Collectiu Occitan.
 
Segon l’IEO, per organizar de manifestacions cal prene lo temps necessari per permetre una mobilizacion eficaça, e el se revendica coma l’iniciaire de las grandas manifestacions occitanas e demanda un trabalh de totas las associacions per “organizar una revendicacion coërenta, eficaça e representativa en favor de l’occitan”.
 
 

 

 


abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Laval Joan-Pèire Narbona
20.

De tot biais , lo Collectiu Occitan contunha la batèsta amb una acampada dijous 15 de febrièr a 18 oras a l'Ostal d'Occitania de Tolosa .
- Bilanç de las 2 manifestacions de Tolosa e Montpelhièr
- Aprép la reunion del Collectiu amb lo Director de France 3 -Occitanie
- Mocions de sosten de las comunas e organisacion de novèlas manifestacions .
UNION E ACCION !
Joan-Pèire Laval .

  • 2
  • 5
Marius Blénet
19.

#3#14 Julian e Joan-Claudi aprendrètz que las integracions a França Television aquò depend d'una dubertura de pòste qu'es decidida au nivèu nacionau. Ren se pòt pas faire sonqu'a Tolosa. Podetz contunhar de vos imaginar çò que volètz, au mens vos ocuparà. Per informacion, comencèri de trabalhar a França 3 amb de remplaçaments e soi pas ieu que candidatèri, es la còla occitana de FR3 que cercava monde e que contactèt mantunas personas. Deguèri passar un entreten amb lo cap-redactor de Tolosa e la DRH e son eles que prenguèron la decision amb lo cap d'edicion daus programas en occitan. Las vòstras atacas sus una manipulacion qu'a per tòca pas qu'un profiech personau daissa gaire de dobte sul vòstre biáis de pensar. Serètz brave de pas vestir los autres de la vòstra mentalitat merdosa.

  • 8
  • 15
casa mars
18.

#17 Perqué siam en democracia e que la paraula es liura. Supòrtas pas la critica ? Tomba ben, nautres te suportam pas.

  • 12
  • 8
Laval Joan-Pèire Narbona
17.

Mas perqué , perqué ,perqué ... lo Jornalet daissa publicar d'atacas personalas e tant de marridas causas que fan pas que desesperar un pauc mai cada jorn los que se mobilisan encara ?
Joan-Pèire Laval .

  • 3
  • 11
Optimista !
16.

A legir los comentaris, me sembla que los occitanistas mancan vertadièrament d'optimisma ! Fin finala, n'i a qu'an adoptada la pensada desfachista d'uèi... E lo pauc que son, pecaire, se disputan coma de dròlles de mairalas puslèu que de se sostener.
Me pensi que cada pichona accion es totjorn quicòm d'util.
Me soveni, sabi pas ont ai legit aquò, que los galleses an capitat a far viura la lor lenga, per que un deputat galles se batèt per una cadena de television dins las annadas 90. Aquèla cadena marcha dempuèi e a acostumat lo mond del païs de Galla a entendre sa lenga, a l'aimar, a la se tornar apropriar per tornar trobar son identitat. E çò important me sembla es que se fa pas contra la lenga inglesa que demòra la lenga del reialme. Cultivar son identitat regionala en complement de son identitat nacionala, çò que permetria benlèu d'evitar las oposicons simplificatriças e esterilas, benlèu auriam a aprendre d'aquel mond, cresetz pas ?
La television, lo ser, en tornant del trabalh, sèm plan a la dobrir per se distraire, se cambiar las idèas e 10 mn o mai d'occitan cada ser, seria ja un bon començament per installar un pauc la lenga pels ostals, per la tornar descobrir, per la far aimar...

  • 5
  • 7

Escriu un comentari sus aqueste article