Bandièra01 1180x150: Comuna de Tolosa

Actualitats

Rugbi de XIII: un calandron fa la prima

Los 10 punts al pè de Lucas Albèrt, ancian escolan de la Calandreta de Carcassona, permeton als Dragons de batre Hull KR
Los 10 punts al pè de Lucas Albèrt, ancian escolan de la Calandreta de Carcassona, permeton als Dragons de batre Hull KR
Lo mes de març reviscòla lo vam dels Dragons:
 
— dels Dragons de Sant Jòrdi Illawarra, caps de fila per la represa del campionat NRL
 
— dels Dragons Catalans, que lo president Guasch contèt dins una entrevista qu’aviá causit lo nom del club en referéncia a la fèsta catalana de Sant Jòrdi mas tanben del nom del club australian.
 
Los Dragons Catalans dobrisson lor comptador
 
L’entamenada de la sason es catastrofica pels catalans: 4 desfaitas en seguida. Es doncas amb una bòla al ventre que los Sang e Aur dintrèron sus la pelena de Brutus aqueste dissabte en fin de vèspre fàcia a Hull KR. La partida foguèt plan canina: 8-8 a la pausa. Tiernley a marcat un ensag sus una passa al pè de Greg Bird. Lucas Albèrt a ensacat la transformacion e tanben una penalitat. Dins lo segond temps, novèla passa al pè, aqueste còp de Lucas Albèrt per Foad Yaha, e ensag. Los catalans menan 16-10, mas pachacan una pauma dins l’en-but. Hull KR torna encara a egalitat. A 9 minutas de la fin, l’èx-calandron Lucas Albèrt passa la penalitat de la victòria al grand solatjament dels 7000 espectators. Victòria de confirmar tre dissabte amb la recepcion de Warrington.
 
Dijòus, Leeds aviá ganhat contra l’autra esquipa d’Hull, lo FC: 20-16. Divendres, Saint Helens ganhèt 30-12 a Warrington e Huddersfield 28-16 a Widnes. Dimenge, victòria de Wigan sus Wakefield 30-18 e Castleford domina Salford 22-8.
 
 
Tolosa plen de vam
 
En Championship, polida victòria del Tolosa Olimpic cò dels Dewsbury Rams: 40-20.Los tolosans pòdon preparar dins la mai granda serenitat la venguda a Blanhac d’Halifax lo dissabte 24 de març.
 
 
NRL: doas partidas deslocalizadas a Perth
 
La sason australiana comencèt dijòus amb la victòria clara dels Dragons de Sant Jòrdi fàcia als Bròncos: 34-12; al classament, los Dragons son atal los primièrs caps de fila de la sason. Divendres, los Cavalièrs batèron Manly 19-18 al punt en aur. Los Vaquièrs impausèron lor lei a las Làmias 20-12.
 
Dissabte, doas partidas se jogavan a Perth, sus la còstièra oèst del continent: aprèp 5000 km de desplaçament l’esquipa d’Auckland ganhèt fàcia als Lapinons 32-20, alara que lo campion Melbourne s’impausava 36-18 als Dògols. A Sydney, los Tigres batián los Pols: 10-8. Dimenge, las Pantèras baton los Anguialas 24-14 alara que los Titans gardan dos punts d’avantatge fàcia als Raiders: 30-28. La NRL demanda als arbitres de susvelhar que los jogaires talonan efectivament la palma per jogar los tenguts.
 
 
Elèit 1: Avinhon en forma
 
Una sola partida de ratrapatge del calendièr èra al programa de l’Elèit 1 aqueste dissabte: Avinhon bat Vilanòva 24-4 e torna a nautor de Limós e dels Dragonets al classament. Aquesta dimenjada, los provençals reçaupràn Lesinhan. Son tanben al programa de la dimenjada: lo desplaçament de Carcassona a Sent Gaudenç, de Limós a Vilanòva qu’a licenciat l’entraïnaire David Ellis aprèp la desfaita d’Avinhon. Tolosa reçauprà Albi e dèrbi catalan a Palau del Vidre que reçauprà los Dragonets.
 
 

 
Alan Roch
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Batko
1.

I a tanben dens la còla de l'Olimpica de Tolosa XIII un cèrt Nicolau Bianchini, ancian calandron e tanben hilh de Patric Bianchini, ensenhaire occitan de la Calandreta tanben.

  • 3
  • 0

Escriu un comentari sus aqueste article