Bandièra01 1180x150: Comuna de Tolosa

Actualitats

Rugbi de XIII: camin de crotz pascal pels Dragons

Lo temps de Pascas es totjorn particular en Super League amb quatre partidas de jogar dins una quinzenada

Una aficha originala pels rescontres del dimenge 25 de març a la Grassa: Val d’Orbieu-Sant Laurenç de la Crabarissa (Federala) e Ferrals de las Corbièras-Vilanòva de Menerbés (Elèit 2)
Una aficha originala pels rescontres del dimenge 25 de març a la Grassa: Val d’Orbieu-Sant Laurenç de la Crabarissa (Federala) e Ferrals de las Corbièras-Vilanòva de Menerbés (Elèit 2)
Dragons: los cambiaments càmbian pas res
 
Qualques modificacions èran portadas al XIII catalan pel desplaçament cò d’Hull FC: permutacion Mead-Gigòt amb lo retorn del provençal a l’arrièr, intrada de Langi a la dobertura per jogar amb Lucàs Albèrt a la mesclanha, reposicionament de Greg Bird en segonda linha.
 
Tot aquò, per viure un scenari ja conegut: dins lo primièr temps, dominacion catalana mas los angleses menan 12-4 a la pausa; al retorn dels vestiaris, Hull FC marca d’intrada e ajusta tres ensages abans l’ora de jòc. La revòlta de fin de partida, amb dos ensages marcats, pòt pas capvirar un planchòt amar: 42-16 per Hull FC. Los Dragons demòran mai que jamai tancats a la darrièra plaça.
 
Al menut: una partida a Salford divendres, abans las recepcions d’Huddersfield (diluns de Pascas) e Wigan (dissabte 7 d’abril) a Brutus. Cal èsser d’un optimisme a tota espròva per esperar lo reviscolament catalan. Anem vai: qui sap?
 
Leeds s’es fait susprendre a domicili per Castleford: 24-25. Warrington bat Wakefield: 34-24 e Widnes a la victòria contra Salford: 24-16. St-Helens ganha cò d’Hull-KR 30-6 e Wigan cartona fàcia a Huddersfield: 48-10.
 
 
Tolosa manca pas de vam
 
En Championship, lo Tolosa Olimpic signa una brava victòria a Blanhac fàcia a Halifax 38-6 abans d’anar a Londres divendres e de reçaupre Toronto diluns 2 en debuta de vèspre per una partida que serà retransmesa en dirècte per BeInSpòrt.
 
 
Los Dragonets mai fòrts que los campions
 
En Elèit 1, dissabte, Lesinhan deu esperar la darrièra minuta per batre Sent Gaudenç: 14-13. A Sant Estève, los Dragonets tenon a distància los campions limosencs: 22-8 e s’installan en primièra plaça al classament.
 
Dimenge, Palau se deu contentar d’un magrinèl punt d’escart per batre Tolosa: 35-34, alara que Carcassona, mercé a un Herrero vertadièr farfadet a la dobertura, pren la mesura de Vilanòva: 29-6. Avinhon plega del costat d’Albi: 29-10.
 
 
Plaça als quarts de la Copa
 
La dimenjada de Pascas veirà se debanar los quarts de finala de la Copa: dissabte, Vilagalhenc-Argon, sol salvat d’Elèit 2, reçauprà Albi (15h, a Vilagalhenc). A 17h30, a Carcassona, revenge de la finala de 2017 entre l’AS Carcassona e l’FC Lesinhan. Dimenge, Limós reçauprà Palau a l’Agulha, alara que la partida Dragonets-Avinhon se jogarà en dobertura del rescontre de Supeliga entre Huddersfield e los Dragons.
 
 
Un punt sus l’NRL
 
En Austràlia, aprèp 3 jornadas del campionat NRL , solas doas esquipas an signat 3 victòrias: los Dragons de Sant Jòrdi Illawarra e los Combatents neozelandeses. En contra, doas esquipas demòran sus tres desfaitas: los Raiders e Parramatta. Los Bròncos devon anar al punt en aur per batre los Tigres 9-7.
 
 
La reconversion de Gui Vigorós
 
Gui Vigorós portèt las colors de Montpelhièr, Marselha e Cavalhon e tanben del XIII de França. Foguèt conselhièr tecnic regional, coentraïnaire de la seleccion nacionala e tanben arbitre. Un còp recaptats los crampons, a pres la guitarra e vira en interpretant de cançons francesas.
 
Atal, aqueste divendres 30 de març, al convit de l’MJC e de l’ASC XIII, serà jol tibanèl de l’estadi Domèc a Carcassona per cantar Brassens e Ferrat (18h30: se manja un bocin; 20h30: cançons de Brassens e Ferrat e, dins la segonda part, tiratge al sòrt entre las cançons de Brassens demandadas pel public). Se marcar al prèp del sèti de l’ASC: +33(0)4 68 47 74 74; a.s.c.13@oran...
 
 
 
 
Alan Roch

 
 
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch
1.

La finala del campionat se debanarà a l'Estadium d'Albi lo dissabte 30 de junh :
https://www.ffr13.fr/actualite-a-la-une/albi-pour-la-finale-du-championnat-de-france/

  • 1
  • 0

Escriu un comentari sus aqueste article