Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasCarcassés

Atemptat en Carcassés: lo procuraire de la Republica detalha la cronologia dels faches

Tres jorns après l’atemptat terrorista que daissèt quatre mòrts a Carcassona e Trebes, François Molins es tornat suls elements de l’enquèsta en cors

Lo procuraire de la Republica de París, François Molins, faguèt diluns una conferéncia de premsa a prepaus de l’atemptat terrorista que patiguèron Carcassona e Trebes lo 23 de març passat, que daissèt un tragic bilanç de quatre personas mòrtas. Molins tornèt suls elements de l’enquèsta en cors, çò rapòrta Midi Libre.
 
“Lo vidèo de susvelhança de la botiga a permés de determinar precisament la cronologia dels faches”, çò diguèt Molins. Segon el, lo jorn de l’atemptat, lo terrorista, Radouane Ladkim, aviá prèviament daissat sa sòrre a l’escòla, puèi dobriguèt lo fuòc suls ocupants d’una veitura en tuant lo passatgièr e en nafrant grèvament al cap lo menaire. Après panar la veitura, anèt far fuòc sus de militars e se refugièt dins lo Super U de Trebes.”
 
“En arribant, se dirigiguèt devèrs la caissa numèro 6 ont abatèt un emplegat de la botiga abans de se gandir a la caissa 2 e tuar un client”, çò precisèt lo procuraire en tot apondre que los gendarmas poguèron constatar que Radouane Lakdim reteniá una persona en ostatge e l’utilizava coma bloquièr uman”.
 
Aquí Molins saludèt l’accion eroïca del gendarma Arnaud Beltrame, en tot especificar que “lo comandant intrèt dins la sala dels còfres ont Radouane Ladkim s’èra refugiat amb l’ostatge. Contactèt sos collègas en lor demandant de quitar los luòcs e indicant que lo preneire d’ostatges demandava la liberacion de Salah Abdeslam e menaçava de o far tot sautar, fasent allusion als explosius retrobats sus plaça [...]. Radouane Ladkim se serviguèt egalament del comandant Beltrame coma bloquièr uman. Lo GIGN intervenguèt après ausir dos còps de fuòc raprochats, puèi un tresen. L’autopsia del còrs del gendarma a mes en evidéncia plusors lesions a la traquèa e al laringe qu’an entraïnat una destressa respiratòria e son decès”.
 
Lakdim fasiá totjorn l’objecte d’un “seguit efectiu” pels servicis d’entresenha en març de 2018. Èra fichat «S» dempuèi 2014, puèi èra inscrich a partir de novembre de 2015 al Fichièr dels Senhalaments per la Prevencion de la Radicalizacion de Caractèr Terrorista (FSPRT) en rason de sos “ligams supausats amb l’esfèra d’influéncia salafista locala”, çò precisèt François Molins.
 
En mai d’aquò, encara se sospiècha la companha del terrorista, e mai aquesta refuse d’èsser associada a l’atemptat. Se tracta d’una joventa de 18 ans presentada coma convertida a l’islam e fichada «S». Aviá pas pus de contactes telefonics amb Lakdim mas, segon lo procuraire, auriá tengut d’escambis via una aplicacion.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tèsta de Gèis
1.

Quand parlatz del sénher Molins, doblidetz pas se senhalar son "accent catalan" coma fan cèrts mèdias franceses. An pas encara dich s'èra "rocailleux", qu'o sàpia.
Encara urós, malgrat aquelas remarcas, sa competéncia es pas contestada. Mas sabi pas çò que ven faire aquel tipe de remarca dins un article que parla pas de lingüistica.

  • 6
  • 3

Escriu un comentari sus aqueste article