Bandièra01 1180x150: Comuna de Tolosa

Actualitats

LGV Atlantica: los traçats son validats

Aprovat lo traçat de las linhas Bordèu-Tolosa e Bordèu Irun

Lo 6 d'abriu, lo traçat de las linhas naveras Bordèu-Tolosa e Bordèu-Irun estoren aprovadas per decision ministeriala. Lo còst, estimat au minimum a 12 miliards d'euros, pausa questions. La purmèira partida de las òbras entre Tors e Bordèu començarà au mes de junh. L'amira es de religar París a Tolosa en 3h15 e París a Madrid via Irun.


Es una decision importanta presa après annadas de debats ahucats. Lo traçat es finalament validat, maugrat una opausicion hòrta en Occitània e au Bascoat. Mès los anti LGV n'estancan pas la luta, au moment d'aquera validacion deu traçat. Contestan tostemps l'utilitat economica e las consequéncias ecologicas. De l'aute costat, lo lobbying de mantuns agents economics e politics a favor de la LGV a finit per portar fruta. Sustot per las pressions deus presidents de las regions Aquitània e Mijorn-Pirenèus, defensors de las navèras linhas LGV.
 
Mès en periòde de crisi, lo finançament public-privat causit peu projècte es de mau apitar. En març de 2010, lo grop Vinci ganhèt l'aperet d'aufèrta per la construccion e l'espleitacion pendent cinquanta ans de la seccion Tors-Bordèu. Per financiar los 7,8 miliards d'aquera linha, seràn sollicitadas de subvencions de l'Estat francés e de las colectivitats locaus, e empronts garantits per l'Estat francés e Réseau Ferré de France (RFF).
 
Aqueth foncionament agrada pas forçadament aus elegits. La region Peitau-Charantas e sa presidenta Segolène Royal o voloren pas pagar. Egau, lo president d'Òlt e Garona, Pierre Camani, hadot sàber que perpausaré en amassada extraordinària de refusar de pagar per la linha Bordèu-Tolosa qui passa plan per la soa contrada."Lo departament n'a pas los mejans". Paradoxaument aqueth medish departament participèt au finançament de la seccion Tors-Bordèu.
 
Adara, l'amira de RFF es d'aprestar l'enquèsta d'utilitat publica, prevista peu purmèir semèstre de 2013.


Pèir-Joan Masdiset

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tederic Merger Tonens
6.

Adishatz !
A perpaus deu "paradòxe" deu departament d'Out e Garona qui finançaré Tours-Bordèu e pas Bordèu-Tolosa : n'es pas tant paradoxau qu'aquò, pr'amor que la LGV Tours-Bordèu hè guanhar ua òra suu trajècte Paris-Agen, quan Bordèu-Tolosa n'u hè pas guanhar gran causa (sustot damb ua gara a "Agen-Campanha").
Aprèps, qu'es ua marca d'alienacion de totjorn créser que lo desvolopament economic e va arribar de las ligasons damb Paris.
Que soi autant contra lo "tot TGV" que contra l'anti-TGVisme primari. Que'vs prepausi de legir aquò :
http://railgascogne.canalblog.com/archives/2012/04/07/23957184.html ("2050 : pour une réactivation du X ferroviaire de Bourriot-Bergonce !"). Que s'agis de trobar un compromis inteligent énter l'aspiracion a la vistessa, las finanças publicas, l'environament, los besonhs previsibles de transpòrt de "fret", l'economia d'energia...

  • 2
  • 0
Julien Sent-Miquèu de Riufred
5.

Mercés Pèir-Joan Masdiset per aquèth article (en gascon deu nòrd per los que pensan que se parla sonque bearnés dens tota la Gasconha... enqüèra un còp, parlam econòmia, miliards d'euròs, catastròfa ecologica ; parlatz linguistica...) !

@Faidits : "Per anar de Bordèu a Niça, cal entre 9 e 10 oras!!!!!"
Òc, mes dab lo TGV, Bordèu-París 2h + París-Niça 3h = Bordèu-Niça 5h !
Es lo progrés a la francesa ! (ironia, solide)

  • 5
  • 0
garric
4.

En efècte, París-Tolosa, s'en cagam. Mès Tolosa-Bordèu, m'en cagui pas, qu'es una ligason transversala occitana. Es necite d'aveire una LGV de Bordeù a Niça, se volem qu'Occitània existisca un jorn...

  • 2
  • 0
Faidit Comuns
3.

De Tolosa a París en 3h15 ????
NOS EN CAGAM!!!

Per anar de Bordèu a Niça, cal entre 9 e 10 oras!!!!!
Per anar de Marselha a Lemotges, cal entre 8 e 9 oras!!!!
Per anar de Pau a Clarmont d'Auvèrnhe, cal entre 10 e 11 oras !!!!
Sovent cal transitar per París (Apreciarem al passatge lo còst ecologic)
E parlarem pas de las linhas secondàrias....

La SNCF es utís de colonisacion del País d'Òc.

Vergonha a la SNCF e a Réseaux Ferrés de France!
Vergonha!

E dire que de milièrs d'occitans an "pujat" a París per trabalhar als camins de fèrre!

Despertem-nos! Indignem-nos!

  • 3
  • 0
Pèir Vilac
2.

En occitan, pensi. Mai concretament en occitan de Joan-Pèir Masdiset ;-) (Çampar qu'es gascon de Bordèu)

  • 0
  • 4

Escriu un comentari sus aqueste article