Bandièra01 1180x150: Comuna de Tolosa

Actualitats

Madrid: començament del jutjament dels uèch joves d'Altsasu

Son acusats de terrorisme per una bagarra nocturna de bar que i participèron dos policièrs de la Gàrdia Civila sens unifòrme que foguèron nafrats, e riscan de penas de fins a 62 ans de preson

| Altsasu gurasoak
Comencèt ièr lo jutjament a l'Audiéncia espanhòla (un tribunal d'excepcion especializat en delictes de terrorisme) d’uèch joves d'Altsasu (Bascoat). Son acusats de nafraduras, de terrorisme e de menaças terroristas, e riscan de penas de fins a 62 ans de preson.
 
La 15 d’octòbre de 2016, a cinc oras del matin, se tenguèt un bagarra nocturna de bar dins la vila d'Altsasu (Bascoat). Dos agents de la Gàrdia Civila sens unifòrme e lors companhas foguèron nafrats. Lo ministèri public acusa set gojats e una gojata. Tres d'eles son en detencion provisòria dempuèi lo 14 de novembre de 2016.
 
La defensa a totjorn denonciat que sián acusats de terrorime, car s'agissiá d'una bagarra de bar, ont los policièrs èran a beure un còp sens portar l'unifòrme.
 
Al jutjament i participa coma observaira una delegacion d'Amnestia Internacionala (AI). L'organizacion aviá ja demandat dins un comunicat que se levèsse las cargas de terrorisme e a mostrat son chepic per las garentidas del procès, pr'amor que las autoritats judiciàrias an refusat "de pròvas importantas e de testimònis importants que presentava la defensa". AI ditz que velharà a l’aplicacion del drech internacional e a la compareissença de totas las partidas en plena egalitat de condicions.
 
"Es un exemple del biais qu'Espanha aplica una legislacion ont se son espandits de biais desproporcionat los tipes de terrorisme, en s'alonhant dels critèris de clartat e precision exigits pel drech penal e per divèrses raportaires de las Nacions Unidas", çò ditz Esteban Beltrán, director d’Amnestia Internacionala dins l’estat espanhòl.
 
 
Manifestacion a Pampalona
 
Cinquanta mila personas, segon los organizaires, manifestèron dissabte passat a Pampalona per demandar justícia pels uèch joves enseguits. Los manifestants cridavan: "Aquò es pas de terrorisme".
 
La manifestacion la sosteniá oficialament lo Parlament de Navarra, qu'aviá aprovat una declaracion institucionala en favor de la protèsta.
 
 
 


abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

La justicia en Espanya està sota vigilancia europea. Hitler se suicidet, e a Mussolini lo pelaren.

  • 0
  • 0
Felip Martèl Montpelhier
1.

Aquela "justicia" espanhòla es dins lo pur deliri… Mas poèm supausar que se d'azard la dona Cifuentes arriba en procés, la justicia serè fòrça mai indulgenta.

  • 5
  • 0

Escriu un comentari sus aqueste article