Un grop de parents de las comunas d'Ibòs e d'Aussun de Tarba (País de Tarba) se son mobilizats après demandar dempuèi tres ans l'occitan a l'escòla publica d'aquelas doas vilas. Dempuèi los tres ans de demanda de la dobertura d'una filièra bilingüa, l'educacion francesa dicha nacionala lor la refusa cada còp. Ara an lançat una peticion en linha sus mesopinions.com per amassar de signaturas de sosten.
 
Demandan a las autoritats pertinentas (lo DSDEN del departament e lo rectorat de l'Acadèmia de Tolosa) de s'i engatjar e de trobar de solucions per que lors enfants pòscan exercir lo drech d'aprene tanben en occitan.
 
D’efièch ramentan que, lo 26 de genièr de 2017, se signèt una convencion quadre per l'ensenhament de l'occitan entre lo Ministèri de l'Educacion francés, la region dicha Nòva Aquitània, la region qu'a pres lo nom d'Occitània e l'Ofici Public de la Lenga Occitana (ÒPLO). "E se contunharà de non aplicar pas los tèxtes signats?”, se demandan.
 
De remembrar qu'aquela convencion programa la produccion de material pedagogic en occitan, dont un libre de matematicas nivèl CP que serà distribuit gratuitament dins los sits bilingües. En mai d’aquò, recupèra las doas oras d’occitan opcionalas en 5a, que foguèron reduchas a una per la reforma del collègi, e prevei que “l’afectacion dels professors certificats d’occitan serà limitada, s’es possible, a dos establiments o mai”. Per quant als pòstes, planifica una reparacion per recuperar de pòstes de professor d’occitan, prevei tanben de borsas “Ensenhar” pels estudiants que voldrián devenir de professors, e assegura que l’estat deu velhar d’organizar de formacions en occitan dins las diferentas filièras universitàrias.
 
Aquela convencion es una primièra en la matèria e se deu aplicar a las circonscripcions educativas, apeladas acadèmias, de Bordèu, Limòtges, Montpelhièr, Peitieus e Tolosa.


 

---

Podètz signar en clicant aicí.