Bandièra01 1180x150: Comuna de Tolosa

Actualitats

Espanha: casuda de Mariano Rajoy

La mocion de censura presentada pel PSÒE reüssirà uèi amb lo sosten dels partits bascos e catalans e de l’esquèrra espanhòla. Pel Partit Popular demòra solament lo supòrt de Ciutadans

La mocion de censura prepausada pel cap dels diches socialistas obrièrs, Pedro Sánchez, recep lo sosten dels autonomistas bascos, dels independentistas bascos e catalans e de l’esquèrra espanhòla de Podèm
La mocion de censura prepausada pel cap dels diches socialistas obrièrs, Pedro Sánchez, recep lo sosten dels autonomistas bascos, dels independentistas bascos e catalans e de l’esquèrra espanhòla de Podèm | EFE
La mocion de censura prepausada pel partit socialista espanhòl (PSÒE) trobarà una responsa uèi, e s’anóncia la fin del govèrn de Mariano Rajoy en Espanha. Aqueste còp, lo cap dels diches socialistas obrièrs, Pedro Sánchez, recep lo sosten dels autonomistas bascos, dels independentistas bascos e catalans e de l’esquèrra espanhòla de Podèm.
 
La mocion se presentèt ièr après que foguèt renduda publica la senténcia de l’Afar Gürtel, un afar politicofinancièr qu’implica un presumit ret de corrupcion ligat al Partit Popular (PP), e qu’en mai de condemnar a la preson certans membres importants del partit, condemna lo quite partit per s’èsser enriquit illegalament.
 
Per tant, se se confirma uèi çò que los partits anoncièron dins la sesilha d’ièr al Congrès dels Deputats espanhòl, Rajoy tendrà solament lo supòrt de son partit e de Ciutadans, e Pedro Sánchez vendrà lo nòu president del govèrn espanhòl.
 
Se Rajoy demissionèsse abans lo vòte, servariá l’estatut de president en foncions fins que lo parlament votèsse per un autre candidat o que se convoquèsse de nòvas eleccions. Pasmens a anonciat que demissionariá pas.
 
 
La question de Catalonha e Aran
 
Malgrat que la question de Catalonha siá estada presenta dins totas las intervencions, Sánchez s’es limitat a dire que negociarà amb lo govèrn de la Generalitat de Catalonha, e mai se siá vantat de sosténer la suspension del govèrn de la Generalitat e la repression politica. Pasmens, Sánchez a lo sosten dels independentistas catalans e de Podèm amb de condicions sus aquel subjècte: los primièrs demandan un dialòg bilateral dins l’encastre del drech internacional e los segonds la construccion d’un estat que reconesca las nacions catalana e basca.

 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
8.

#7 Enfin, un pichon grand jorn, que, en mai de las insoléncias de Sanchez als catalans, a al cuol lo terminator Alfonso Guerra, lo Collot d'Herbois del TSOE, aquel que minèt la pacha entre Zapatero e Catalonha e se faguèt aital complici del PP.

  • 5
  • 0
Abram Auvèrnhe
7.

Aquò-ès un jorn grand per Euròpa e per la demoracia !

  • 1
  • 0
Felip Martèl Montpelhier
6.

Aparentament doncas, C's an votat contra la censura, ni per lors vertuosas consideracions cntra la corrupcion : aparentament, entre mond de drecha, un se sosten, emai C's sotenguesse PP coma la còrda sosten lo penjat, en esperant que se rompe las cervicalas. Mas los electors de C's se deurian pausar de questions, totun…
Vist la tve, ont un defilat d'orators e d'entrevistats de tot peal (pas vist de catalanistas totun). C's es estat aqui d'una discrecion granda.

  • 11
  • 0
E Passa Que T Ai Vist Lo Clapàs (Montpelhièr)
5.

Rajoy e tota sa còla de messorguièrs fotuts defòra ! Una plan bona novèla per Catalonha e portam naut un brinde frairenal al Puigdemont. Ara qu'aqueles neo-franquistas dau PP, tan simpatics per Brussèlas, son escampats e plan escampats, la situacion pòt que se melhorar al Principat. Aquò dich, emai que lo PSOE e Pedro Sánchez siaguessen pas Ciutadanos (que de longa se ten a l'espèra) cal totjorn téner en ment que l'esquèrra espanhola es çò primièr espanholista abans d'ésser d'esquèrra. Wait and see e vigilància companhs !

  • 17
  • 0
Joan Marc
4.

Abans i aviá la drecha espanholista e autoritària que reprimèt Catalonha. Ara es l’esquèrra espanholista qu’ajudèt lo quite Rajoy per installar l’estat d’excepcion ( article 155 ). Fa pauc aquesta nòva palhassa voliá una lei que permeta acusar de rebellion los independentistas sens qu’i aja violéncia. Fins ara a pas condemnat l’existéncia de presonièrs politics en Espanha. Abans parlava d’un cambiament de la constitucion espanhòla per far un estat federal ! Amb quina majoritat ? Per cambiar la constitucion cal una ampla majoritat. La tercera via de Sánchez es una carrièra bòrnia o un agantacolhon ?

  • 22
  • 0

Escriu un comentari sus aqueste article