Bandièra01 1180x150: Comuna de Tolosa

Actualitats

Carcin: la cinquena edicion del festenal Escambis a agut luòc amb grand succès

L’ajuda financièra dels diferents partenaris a permés qu’aquela manifestacion se debane aquesta annada encara dins lo quadre del patrimòni cultural

Per la cinquena edicion del Festenal Escambis, l'associacion Aquí l’Òc convidèt lo grop mitic Nadau a Solhac, lo divendres 18 de mai.
 
A 9 oras del ser, lo president e un membre del conselh d’administracion ramentèron l’objectiu d’aquela associacion e presentèron las diferentas activitats. Puèi, pendent doas oras, las 700 personas del palais dels congrèsses foguèron enfachinadas per la musica e reprenguèron còr la màger part de las cançons de Nadau. A la fin d’aquel concèrt, qualques personas d’Aquí l’Òc montèron sus l’empont e cantèron "L'Immortèla" amb lo grop e en comunion amb lo public. Una plan polida serada!
 
Lo dissabte a Banas èra organizat tota la jornada un mercat artisanal e lec amb la preséncia d’un panieraire, d’un rodièr, d’una escrivana, d’una pintra, d’un productor de fragas, entre d’autres. Los dròlles an pogut profechar dels jòcs de fusta.
 
L'aprèp-miègjorn, Gaston Basalgas presentèt son libre reeditat sus la toponimia dels noms de lòcs de Carcin davant una trentena de personas plan interessadas. Puèi, Bernat Bergé pivelèt pichons e grands amb de contes en occitan e en francés.
 
Lo grop carcinòl Cal Camina animèt lo trad’apèro, puèi un repais foguèt partejat en preséncia de la deputada Huguette Tiégna e del cònsol màger de Banas Christian Larraufie que saludèron la vitalitat de l’associacion Aquí l’Òc. Enfin, la jornada s’acabèt per un concèrt-balèti animat per Cal Camina, Castanha e Vinovèl e las Balutinas qu’estrambordèron los nombroses dançaires.
 
Lo dimenge aprèp-miègjorn, dins la glèisa de Sent Joan de la Ginèsta, lo public aprecièt las polidas voses dels Gojats del Porti d’Argentat. Es un còr d'òmes que canta solament en occitan, amb un acordeon, una guitarra, una cabreta, una vièla.
 
Seguiguèt lo duo gardés de talent Calèu, dos autors compositors que meton en musica lors tèxtes mas tanben de poèmas occitans d’uèi.
 
Los benevòls de l'associacion Aquí l’Òc, que se son investits plenament dins l’organizacion materiala e dins l’acuèlh del public e dels artistas, an contribuit a la reüssida del Festenal Escambis, coma n’an testimoniat de nombrosas personas.
 
L’ajuda financièra dels diferents partenaris —Cauvaldor, la region qu’a pres lo nom d’Occitània, l’IEO e lo departament d’Òlt, sens oblidar las comunas de Solhac, Banas e Sent Joan de la Ginèsta— a permés qu’aquela manifestacion se debane aquesta annada encara dins lo quadre del patrimòni cultural.
 
 
 
 
Associacion Aquí l'Òc

 
 
 

 


abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Abram Auvèrnhe
3.

Òu ! Aquela chançon totjorn me balha la charn de pola ! Gramací Nadau.

  • 2
  • 0
Pas sup
2.

Los carcinòls son pas d'escagaròls !
Endavant carcin !

  • 4
  • 0
Pirolet
1.

Aquí l’òc, una associación que bolèga : òsca!

  • 3
  • 0

Escriu un comentari sus aqueste article