Bandièra01 1180x150: Comuna de Tolosa

Actualitats

Lo jutge espanhòl qu’a encarcerat los politicians catalans es cridat per la justícia bèlga lo 4 de setembre

Carles Puigdemont e sos ministres exiliats an denonciat a la justícia bèlga lo jutge espanhòl Pablo Llarena que considèran qu’a otrapassat sas foncions

Christophe Marchand, avocat dels elegits catalans, anoncièt ièr dins una conferéncia de premsa a Brussèlas que la justícia bèlga aviá decidit d’apelar a comparéisser lo jutge espanhòl Pablo Llarena, lo qu’a entamenat lo procès per rebellion contra los politicians catalans en preson o en exili. Aquela compareissença, prevista lo 4 de setembre, seguís una procedura començada pels elegits catalans exiliats, que se pensan que lor drech a la presompcion d’innocéncia es escarnit , mai que mai après las declaracions que Llarena faguèt lo 22 de setembre passat a Uviéu (Astúrias).
 
D’efièch,  lo jutge Llarena diguèt, dins l’encastre de jornadas consagradas als delictes economics e a la responsabilitat penala de las entrepresas, que los politicians catalans encarcerats èran pas de presonièrs politics, e qu’èran meses en examen per “de comportaments que lo còde penal mençona e que, independentament de la rason que los a menats a los cometre, devon èsser meses en examen”. Aquelas declaracions foguèron publicadas dins divèrses mèdias espanhòls. Segon l’èx-conselhièr Toni Comín, las paraulas del jutge espanhòl sortissián de “son encastre jurisdiccional” malgrat que pertoquèsson l’afar jutjat, e mancan als dreches dels acusats.
 
De fach, lo president catalan exiliat, Carles Puigdemont, e sos ministres tanben en exili forçat Toni Comín, Meritxell Serret e Lluís Puig, anoncièron ièr qu’avián presentat una denóncia contra jutge Llarena, puèi que considèran que lor son pas garentidas las condicions d’un jutjament just e que lo jutge a otrapassat sas foncions.
 
Après remarcar que los mandats d’arrèst internacionals que Llarena aviá faches contra los elegits exiliats avián pas reüssit, eles an ara decidit de passar a l’accion e de denonciar a la justícia internacionala lo jutge Pablo Llarena. ”Nos sèm exiliats justament per aquò” —çò diguèt Carles Puigdemont— ”Sèm pas perseguits per la justícia mas per l’ideologia d’un jutge”.
 
Amb aquela nòva estrategia, Puigdemont espera d’obténer tanben l’excaceracion dels presonièrs politics.
 
 

 
 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Espanha (Castelha) ha estat molt tancada e apartada de la resta d'Europa, ara es lo moment de posar-se al dia.

  • 3
  • 0
Mèfi ! 31
1.

Sembla qu'en espanhòl, rebellion e desoubediéncia fosquèssen synonymes, tal coma prejutjat e jutjament. Tot açò justifica la detencion preventiva de durada indeterminada.
Rens de politic aquí dedins...
En defòra dels catalans, pauc d'indignacion en Espanha davant le terrorisme d'estat.
Aquell jutge practica le terrorisme politic; s'es legal, Espanha es pas un estat de dreit.

  • 5
  • 0

Escriu un comentari sus aqueste article